ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಆಧ್ಯಾತ್ಮಿಕ ನಾಯಕ ಮತ್ತು ‘ಆರ್ಟ್ ಆಫ್ ಲಿವಿಂಗ್’ ಸಂಸ್ಥಾಪಕರಾದ ರವಿಶಂಕರ್ ಗುರೂಜಿ ಅವರಿಗೆ ಪ್ರತಿಷ್ಠಿತ 2025ರ ವರ್ಲ್ಡ್ ಲೀಡರ್ ಫಾರ್ ಪೀಸ್ ಆಂಡ್ ಸೆಕ್ಯೂರಿಟಿ ಪ್ರಶಸ್ತಿಯನ್ನು ನೀಡಿ ಗೌರವಿಸಲಾಗಿದೆ. ಬೋಸ್ಟನ್ ಗ್ಲೋಬಲ್ ಫೋರಂ ಮತ್ತು ಎಐ ವರ್ಲ್ಡ್ ಸೊಸೈಟಿ ಜಂಟಿಯಾಗಿ ಈ ಗೌರವವನ್ನು ಪ್ರದಾನ ಮಾಡಿದ್ದು, ಗುರೂಜಿ ಅವರ ಜಾಗತಿಕ ಶಾಂತಿಸ್ಥಾಪನೆ, ಸಮನ್ವಯತೆ ಮತ್ತು ಮಾನವೀಯ ನಾಯಕತ್ವದ ಅಸಾಧಾರಣ ಕೊಡುಗೆಯನ್ನು ಈ ಪ್ರಶಸ್ತಿ ಪರಿಗಣಿಸಿದೆ.
ಈ ಮನ್ನಣೆಯು ಜಾಗತಿಕ ವೇದಿಕೆಯಲ್ಲಿ ಭಾರತದ ಪ್ರಾಚೀನ ಜ್ಞಾನ ಮತ್ತು ನೈತಿಕ ಮಾರ್ಗದರ್ಶನದ ಪ್ರಭಾವವನ್ನು ಮತ್ತೊಮ್ಮೆ ದೃಢಪಡಿಸಿದ್ದು, ದೇಶದ ‘ವಿಶ್ವಗುರು’ ಪಾತ್ರವನ್ನು ಎತ್ತಿಹಿಡಿದಿದೆ.
ಪ್ರಶಸ್ತಿಯ ಹಿನ್ನೆಲೆ ಮತ್ತು ಗುರೂಜಿ ಕೊಡುಗೆ:
2015ರಲ್ಲಿ ಆರಂಭವಾದ ಈ ವಿಶೇಷ ಪ್ರಶಸ್ತಿಯು, ಜಾಗತಿಕ ಶಾಂತಿ ಮತ್ತು ನೈತಿಕ ಪ್ರಗತಿಯನ್ನು ಮುನ್ನಡೆಸುವಲ್ಲಿ ನೈತಿಕ ಧೈರ್ಯ, ದೂರದೃಷ್ಟಿಯ ಆಡಳಿತ ಮತ್ತು ಸಹಾನುಭೂತಿಯನ್ನು ಸಾಕಾರಗೊಳಿಸುವ ವಿಶ್ವ ನಾಯಕರಿಗೆ ನೀಡಲಾಗುತ್ತದೆ. ಈ ಹಿಂದೆ ಜಪಾನ್‌ನ ಅಬೆ ಮತ್ತು ಜರ್ಮನಿಯ ಆಂಜೆಲಾ ಮರ್ಕಲ್ (2015), ಯುಎನ್‌ನ ಬನ್ ಕೀ ಮೂನ್ (2016), ಫಿನ್ಲ್ಯಾಂಡ್‌ನ ಸೌಲಿ ನೀನಿಸ್ತೋ (2018), ಉಕ್ರೇನ್ ಅಧ್ಯಕ್ಷ ವೊಲೋದಿಮರ್ ಝೆಲೆನ್ಸ್ಕಿ ಮತ್ತು ಉಕ್ರೇನ್ ಜನತೆ (2022) ಹಾಗೂ ಫ್ರಾನ್ಸ್‌ನ ಇಮ್ಮಾನ್ಯುಯೆಲ್ ಮಾಕ್ರಾನ್ (2024) ಈ ಗೌರವಕ್ಕೆ ಪಾತ್ರರಾಗಿದ್ದರು.
ಬಿಜಿಎಫ್ ಪ್ರಕಾರ, ರವಿಶಂಕರ್ ಗುರೂಜಿ ಅವರು 180ಕ್ಕೂ ಹೆಚ್ಚು ದೇಶಗಳಲ್ಲಿ ಶಾಂತಿ ಮತ್ತು ಸಮನ್ವಯತೆಗಾಗಿ ತಮ್ಮ ಮಾನವೀಯ ಪ್ರಭಾವವನ್ನು ಬೀರಿದ್ದಾರೆ. ಕೃತಕ ಬುದ್ಧಿಮತ್ತೆ ಮತ್ತು ಡಿಜಿಟಲ್ ಯುಗದಲ್ಲಿ ಅವರು ನೀಡುತ್ತಿರುವ ನೈತಿಕ ಮಾರ್ಗದರ್ಶನವನ್ನು ಫೋರಂ ವಿಶೇಷವಾಗಿ ಗುರುತಿಸಿದೆ. ಯಾವುದೇ ಪೂರ್ವೋದ್ದೇಶ ಅಥವಾ ಪಕ್ಷಪಾತ ಹೊಂದಿಲ್ಲದ ವ್ಯಕ್ತಿ ಎಂದು ಗುರೂಜಿ ಅವರನ್ನು ಬಣ್ಣಿಸಿದೆ.
ಸಂಘರ್ಷ ಪೀಡಿತ ಪ್ರದೇಶಗಳಲ್ಲಿ ನಿರ್ವಹಿಸಿದ ಪ್ರಮುಖ ಪಾತ್ರ:
ಗುರೂಜಿ ಅವರ ಪ್ರಾಯೋಗಿಕ ಮತ್ತು ಕರುಣಾಮಯಿ ಶಾಂತಿ ವಿಧಾನಕ್ಕೆ ಅನೇಕ ಸಂಘರ್ಷ ಪೀಡಿತ ಪ್ರದೇಶಗಳಲ್ಲಿ ಅವರು ವಹಿಸಿದ ಪಾತ್ರವೇ ಸಾಕ್ಷಿ. ಕೊಲಂಬಿಯಾದಲ್ಲಿ 52 ವರ್ಷಗಳ ಕಾಲ ನಡೆದಿದ್ದ ಫಾರ್ಕ್ ಮತ್ತು ಸರ್ಕಾರದ ನಡುವಿನ ಸಶಸ್ತ್ರ ಕದನವನ್ನು ಅಂತ್ಯಗೊಳಿಸುವಲ್ಲಿ ಗುರೂಜಿ ಮಧ್ಯಸ್ಥಿಕೆ ವಹಿಸಿದ್ದರು. ಇದಲ್ಲದೆ, ಇರಾಕ್, ಶ್ರೀಲಂಕಾ, ಮಯಾನ್ಮಾರ್, ವೆನಿಜುವೆಲ್ಲಾ ಮತ್ತು ಕಾಶ್ಮೀರದಂತಹ ಸೂಕ್ಷ್ಮ ಪ್ರದೇಶಗಳಲ್ಲಿ ಶಾಂತಿ ಸ್ಥಾಪನೆಗಾಗಿ ಅವರು ಮಹತ್ವದ ಕೆಲಸ ಮಾಡಿದ್ದಾರೆ.
ಗುರೂಜಿ ಸಂದೇಶ: ‘ಶಾಂತಿ ಕಾರ್ಯರೂಪಕ್ಕೆ ಬರಬೇಕು’
ಪ್ರಶಸ್ತಿ ಸ್ವೀಕರಿಸಿದ ನಂತರ ಮಾತನಾಡಿದ ರವಿಶಂಕರ್ ಗುರೂಜಿ, ಜಾಗತಿಕ ಆಡಳಿತದಲ್ಲಿ ಆಧ್ಯಾತ್ಮಿಕ ಮತ್ತು ಶಾಂತಿ ಶಿಕ್ಷಣವನ್ನು ಅಳವಡಿಸಬೇಕೆಂದು ಬಲವಾಗಿ ಒತ್ತಾಯಿಸಿದರು. “ಶಾಂತಿಯು ಕೇವಲ ಮಾತುಗಳಿಂದ ಬರಲು ಸಾಧ್ಯವಿಲ್ಲ, ಅದನ್ನು ಕಾರ್ಯರೂಪಕ್ಕೆ ತರಬೇಕು. ಭದ್ರತೆಗಾಗಿ ನಾವು ಬಹಳಷ್ಟು ಮಾಡುತ್ತೇವೆ, ಆದರೆ ಶಾಂತಿಯ ಮೇಲೆ ಬಹಳ ಕಡಿಮೆ ಗಮನ ಕೊಡುತ್ತೇವೆ. ಶಾಂತಿ ಸ್ಥಾಪನೆ ಅತ್ಯವಶ್ಯಕ,” ಎಂದರು. ಕೊನೆಯದಾಗಿ, “ಒತ್ತಡಮುಕ್ತ, ಹಿಂಸಾಮುಕ್ತ ಜಗತ್ತಿನ ಕನಸನ್ನು ಕಾಣೋಣ” ಎಂಬ ಕರೆ ನೀಡಿದರು.
