ಗ್ರೀನ್ ಎನರ್ಜಿ ಕ್ರಾಂತಿ: ಜರ್ಮನಿ, ಬ್ರಿಟನ್ ಸಾಲಿಗೆ ಸೇರಿದ ಭಾರತದ ಮೊದಲ ಗ್ರೀನ್ ಹೈಡ್ರೋಜನ್ ರೈಲು

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ಭಾರತೀಯ ರೈಲ್ವೆ ವಲಯದಲ್ಲಿ ಮತ್ತೊಂದು ಐತಿಹಾಸಿಕ ಮೈಲಿಗಲ್ಲು ಸ್ಥಾಪನೆಯಾಗಿದೆ. ದೇಶದ ಪ್ರಪ್ರಥಮ ಪರಿಸರಸ್ನೇಹಿ ‘ಹೈಡ್ರೋಜನ್ ರೈಲು’ ಸೇವೆಗೆ ಜುಲೈ 17ರ ಶುಕ್ರವಾರ ಬೆಳಗ್ಗೆ 7:40ಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರು ಚಾಲನೆ ನೀಡಲಿದ್ದಾರೆ. ಹರ್ಯಾಣದ ಜಿಂದ್ ನಿಲ್ದಾಣದಿಂದ ಹೊರಡಲಿರುವ ಈ ರೈಲು, 89 ಕಿಲೋಮೀಟರ್ ದೂರದ ಸೋನೆಪತ್ ಅನ್ನು ಬೆಳಗ್ಗೆ 9:40ಕ್ಕೆ ತಲುಪಲಿದೆ. ಇದರೊಂದಿಗೆ ಜರ್ಮನಿ, ಬ್ರಿಟನ್‌ನಂತಹ ಕೆಲವೇ ಜಾಗತಿಕ ದೇಶಗಳ ಪ್ರತಿಷ್ಠಿತ ಸಾಲಿಗೆ ಭಾರತವೂ ಅಧಿಕೃತವಾಗಿ ಸೇರ್ಪಡೆಯಾಗಿದೆ.

ವಿಶ್ವದಾಖಲೆ ಬರೆದ ಭಾರತದ ಹೈಡ್ರೋಜನ್ ಟ್ರೈನ್

ಚೆನ್ನೈನ ಐಸಿಎಫ್‌ (ICF) ನಲ್ಲಿ ಅತ್ಯಾಧುನಿಕ ತಂತ್ರಜ್ಞಾನದೊಂದಿಗೆ ವಿನ್ಯಾಸಗೊಳಿಸಲಾದ ಈ ರೈಲು ಜಾಗತಿಕ ಮಟ್ಟದಲ್ಲಿ ಹಲವು ದಾಖಲೆಗಳನ್ನು ಬರೆದಿದೆ:

• ಅತಿ ಶಕ್ತಿಶಾಲಿ: 3,200 ಹಾರ್ಸ್‌ ಪವರ್ ಹಾಗೂ 1,200 ಕಿಲೋ ವ್ಯಾಟ್ ಪ್ರೊಪಲ್ಷನ್ ಸಿಸ್ಟಮ್ ಹೊಂದಿದೆ.
• ಅತಿ ಉದ್ದದ ರೈಲು: 10 ಬೋಗಿಗಳನ್ನು ಹೊಂದಿರುವ ಇದು ವಿಶ್ವದ ಅತಿ ಉದ್ದದ ಜಲಜನಕ ರೈಲಾಗಿದೆ.
• ಗರಿಷ್ಠ ಸಾಮರ್ಥ್ಯ: ಒಂದೇ ಬಾರಿಗೆ 2,600 ಪ್ರಯಾಣಿಕರನ್ನು ಸಾಗಿಸುವ ಬೃಹತ್ ಸಾಮರ್ಥ್ಯ ಇದಕ್ಕಿದೆ.

ಕಾರ್ಯನಿರ್ವಹಣೆ ಮತ್ತು ಪರಿಸರ ಸ್ನೇಹಿ ತಂತ್ರಜ್ಞಾನ

ಈ ರೈಲು ಜಲಜನಕ ಮತ್ತು ಆಮ್ಲಜನಕದ ನಡುವಿನ ರಾಸಾಯನಿಕ ಪ್ರಕ್ರಿಯೆಯ ಮೂಲಕ ಇಂಧನ ಶಕ್ತಿಯನ್ನು ಉತ್ಪಾದಿಸುತ್ತದೆ. ಈ ತಂತ್ರಜ್ಞಾನದ ಅತಿ ದೊಡ್ಡ ವಿಶೇಷತೆಯೆಂದರೆ ಇದು ಶೂನ್ಯ ಮಾಲಿನ್ಯ ಹೊರಸೂಸುತ್ತದೆ. ಹೊಗೆಯ ಬದಲಾಗಿ ಕೇವಲ ನೀರಿನ ಆವಿಯನ್ನು ಮಾತ್ರ ವಾತಾವರಣಕ್ಕೆ ಬಿಡುಗಡೆ ಮಾಡುವುದರಿಂದ ಇದು ಸಂಪೂರ್ಣ ಪರಿಸರಸ್ನೇಹಿಯಾಗಿದೆ. 2018ರಲ್ಲಿ ಜರ್ಮನಿ ಜಗತ್ತಿನ ಮೊದಲ ವಾಣಿಜ್ಯ ಹೈಡ್ರೋಜನ್ ರೈಲನ್ನು ಪರಿಚಯಿಸಿತ್ತು, ಇದೀಗ ಭಾರತವು ಆ ಹೆಮ್ಮೆಯ ಹಾದಿಯಲ್ಲಿದೆ.