ಸಾಮಾನ್ಯವಾಗಿ ಮಾಂಸಾಹಾರಿಗಳು ಮಟನ್ ಎಂದರೆ ಕೇವಲ ಮಾಂಸಕ್ಕೆ ಮಾತ್ರ ಆದ್ಯತೆ ನೀಡುತ್ತಾರೆ. ಆದರೆ ಮಟನ್ ಕಾಲು ಅಥವಾ ‘ಪಾಯಾ’ ಸೇವನೆಯು ಅದ್ಭುತ ಆರೋಗ್ಯ ಪ್ರಯೋಜನಗಳನ್ನು ಹೊಂದಿದೆ ಎಂಬುದು ಅನೇಕರಿಗೆ ತಿಳಿದಿಲ್ಲ. ಆಯುರ್ವೇದ ಮತ್ತು ಆಧುನಿಕ ಪೌಷ್ಟಿಕಾಂಶ ಶಾಸ್ತ್ರ ಎರಡರಲ್ಲೂ ಇದರ ಮಹತ್ವವನ್ನು ಉಲ್ಲೇಖಿಸಲಾಗಿದೆ.
ಮಟನ್ ಕಾಲಿನಲ್ಲಿ ಹೇರಳವಾಗಿರುವ ಕ್ಯಾಲ್ಸಿಯಂ, ಮೆಗ್ನೀಸಿಯಮ್ ಮತ್ತು ಫಾಸ್ಪರಸ್ ಮೂಳೆಗಳನ್ನು ಬಲಪಡಿಸುತ್ತದೆ. ಇದರಲ್ಲಿರುವ ‘ಗ್ಲುಕೋಸಮೈನ್’ ಮತ್ತು ‘ಕೊಂಡ್ರೊಯಿಟಿನ್’ ಅಂಶಗಳು ಕೀಲು ನೋವು ಹಾಗೂ ಸಂಧಿವಾತದ ಸಮಸ್ಯೆಯನ್ನು ಕಡಿಮೆ ಮಾಡಲು ಸಹಕಾರಿ.
ಈ ಸೂಪ್ನಲ್ಲಿ ನೈಸರ್ಗಿಕ ಕೊಲಾಜೆನ್ ಅಧಿಕವಾಗಿರುತ್ತದೆ. ಇದು ಚರ್ಮದ ಸ್ಥಿತಿಸ್ಥಾಪಕತ್ವವನ್ನು ಕಾಪಾಡಿ, ಸುಕ್ಕುಗಳನ್ನು ತಡೆಯುತ್ತದೆ ಮತ್ತು ಕೂದಲು ಹಾಗೂ ಉಗುರುಗಳ ಆರೋಗ್ಯವನ್ನು ಹೆಚ್ಚಿಸುತ್ತದೆ.
ಶೀತ, ಕೆಮ್ಮು ಅಥವಾ ಜ್ವರ ಬಂದಾಗ ಬಿಸಿ ಬಿಸಿ ಮಟನ್ ಕಾಲು ಸೂಪ್ ಕುಡಿಯುವುದು ಉತ್ತಮ. ಇದು ದೇಹಕ್ಕೆ ತಕ್ಷಣದ ಶಕ್ತಿ ನೀಡುವುದಲ್ಲದೆ, ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಿ ಸೋಂಕಿನ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತದೆ.
ಇದರಲ್ಲಿರುವ ಅಮೈನೋ ಆಸಿಡ್ಗಳು ಜೀರ್ಣಾಂಗವ್ಯೂಹದ ಉರಿಯೂತವನ್ನು ಕಡಿಮೆ ಮಾಡುತ್ತವೆ ಮತ್ತು ಕರುಳಿನ ಆರೋಗ್ಯವನ್ನು ಸುಧಾರಿಸುತ್ತದೆ.
ಜಿಮ್ ಅಥವಾ ಕಠಿಣ ದೈಹಿಕ ಶ್ರಮ ಪಡುವವರಿಗೆ ಇದರಲ್ಲಿರುವ ಪ್ರೋಟೀನ್ ಅಂಶವು ಸ್ನಾಯುಗಳ ರಿಪೇರಿ ಮತ್ತು ಬೆಳವಣಿಗೆಗೆ ನೆರವಾಗುತ್ತದೆ.
