ನಮ್ಮ ದಿನನಿತ್ಯದ ಊಟದಲ್ಲಿ ಅನ್ನಕ್ಕೆ ವಿಶೇಷ ಸ್ಥಾನವಿದೆ. ಆದರೆ ವರ್ಷಗಳಿಂದ ಬಿಳಿ ಅಕ್ಕಿಯನ್ನೇ ಅವಲಂಬಿಸಿಕೊಂಡಿರುವ ನಾವು, ಅದರ ಆರೋಗ್ಯ ಪರಿಣಾಮಗಳ ಬಗ್ಗೆ ಹೆಚ್ಚು ಗಮನ ಹರಿಸುವುದಿಲ್ಲ. ಬಿಳಿ ಅಕ್ಕಿ ತಕ್ಷಣ ಶಕ್ತಿ ನೀಡಿದರೂ, ಅದರಲ್ಲಿ ಪೋಷಕಾಂಶಗಳು ಕಡಿಮೆ ಹಾಗೂ ಗ್ಲೈಸೆಮಿಕ್ ಸೂಚ್ಯಂಕ ಹೆಚ್ಚು. ಇದರಿಂದ ತೂಕ ಹೆಚ್ಚಳ, ಮಧುಮೇಹ ಮತ್ತು ಮೆಟಾಬಾಲಿಕ್ ಸಮಸ್ಯೆಗಳ ಅಪಾಯ ಹೆಚ್ಚಾಗುತ್ತದೆ. ಹೀಗಾಗಿ ಬಿಳಿ ಅಕ್ಕಿಗೆ ಪರ್ಯಾಯವಾಗಿ ಪೌಷ್ಟಿಕಾಂಶ ಸಮೃದ್ಧ ಅಕ್ಕಿಗಳನ್ನು ಆಹಾರದಲ್ಲಿ ಸೇರಿಸಿಕೊಳ್ಳುವುದು ಅತ್ಯಂತ ಅಗತ್ಯ.
- ಕಪ್ಪು ಅಕ್ಕಿ (Black Rice): ಮಣಿಪುರ ಮತ್ತು ಅಸ್ಸಾಂನಲ್ಲಿ ಬೆಳೆಯುವ ಈ ಅಕ್ಕಿ ‘ಚಕ್ ಹಾವೊ’ ಎಂದೇ ಪ್ರಸಿದ್ಧ. ಆಂಥೋಸಯಾನಿನ್ ಎಂಬ ಶಕ್ತಿಶಾಲಿ ಉತ್ಕರ್ಷಣ ನಿರೋಧಕ ಹೊಂದಿದ್ದು, ಹೃದಯ ಆರೋಗ್ಯ ಮತ್ತು ರೋಗನಿರೋಧಕ ಶಕ್ತಿಗೆ ಸಹಕಾರಿ.
- ಕೆಂಪು ಅಕ್ಕಿ (Red Rice): ಕೇರಳ, ತಮಿಳುನಾಡು ಹಾಗೂ ಅಸ್ಸಾಂನಲ್ಲಿ ಜನಪ್ರಿಯವಾದ ಈ ಅಕ್ಕಿ ಫೈಬರ್ನಲ್ಲಿ ಸಮೃದ್ಧ. ರಕ್ತದ ಸಕ್ಕರೆ ನಿಯಂತ್ರಣ ಮತ್ತು ತೂಕ ಇಳಿಕೆಗೆ ಸಹಾಯ ಮಾಡುತ್ತದೆ.
- ನವರ ಅಕ್ಕಿ (Navara Rice): ಕೇರಳದ ಔಷಧೀಯ ಅಕ್ಕಿ ಎಂದೇ ಖ್ಯಾತಿ ಪಡೆದ ನವರ ಅಕ್ಕಿ, ಶಿಶುಗಳಿಂದ ವೃದ್ಧರವರೆಗೆ ಎಲ್ಲರಿಗೂ ಪೌಷ್ಟಿಕ. ಆಯುರ್ವೇದದಲ್ಲಿ ಇದರ ವಿಶೇಷ ಬಳಕೆ ಇದೆ.
- ಕಪ್ಪು ಜೀರಿಗೆ ಅಕ್ಕಿ: ಒಡಿಶಾದ ಕೋರಾಪುಟ್ ಪ್ರದೇಶದಲ್ಲಿ ಬೆಳೆಯುವ ಈ ಅಕ್ಕಿ, ಪರಿಮಳ ಮತ್ತು ವಿಶಿಷ್ಟ ರುಚಿಗೆ ಹೆಸರುವಾಸಿ. ಜೀರಿಗೆ ಕಾಳಿನಂತಿರುವ ರೂಪ ಇದಕ್ಕೆ ವಿಭಿನ್ನತೆ ನೀಡುತ್ತದೆ.
- ಬಿದಿರಿನ ಅಕ್ಕಿ (Bamboo Rice): ಮಧುಮೇಹಿಗಳಿಗೆ ಅತ್ಯುತ್ತಮ ಆಯ್ಕೆ. ಕಡಿಮೆ ಗ್ಲೈಸೆಮಿಕ್ ಸೂಚ್ಯಂಕ ಹೊಂದಿರುವುದರಿಂದ ರಕ್ತದ ಸಕ್ಕರೆ ಏರಿಳಿತವನ್ನು ನಿಯಂತ್ರಿಸುತ್ತದೆ.
- ಬ್ರೌನ್ ರೈಸ್ (Brown Rice): ಪೂರ್ಣ ಧಾನ್ಯವಾಗಿರುವುದರಿಂದ ಫೈಬರ್, ವಿಟಮಿನ್ ಮತ್ತು ಖನಿಜಗಳಲ್ಲಿ ಸಮೃದ್ಧ ಈ ಅಕ್ಕಿಯು ಜೀರ್ಣಕ್ರಿಯೆಗೆ ಉತ್ತಮ.
