ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಈ ವರ್ಷ ತೆರೆಕಂಡ ಮೂರು ಸೂಪರ್ ಹಿಟ್ ಸಿನಿಮಾಗಳಲ್ಲಿ ಒಂದು ವಿಷಯ ಕಾಮನ್ ಆಗಿದೆ. ಅದೇನೆಂದರೆ ಸಿನಿಮಾದ ಮುಖ್ಯ ಮೇಲ್ ಕ್ಯಾರೆಕ್ಟರ್ ಸ್ತ್ರೀವೇಶ ಧರಿಸಿರುವುದು. ಮೂರು ಹಿಟ್ ಸಿನಿಮಾಗಳು, ಮೂರು ಹಿಟ್ ಪಾತ್ರಗಳು ಯಾವುದು ನೋಡಿ..
ಅಕ್ಟೋಬರ್ 2ರಂದು ತೆರೆಕಂಡ ಕಾಂತಾರ ಚಾಪ್ಟರ್ 1ರ ಕ್ಲೈಮ್ಯಾಕ್ಸ್ನಲ್ಲಿ ಡಿವೈನ್ ಸ್ಟಾರ್ ರಿಷಬ್ ಶೆಟ್ಟಿ ಚಾಮುಂಡಿ ದೇವಿ ರೂಪದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಮೂಲಕ ದೈವ, ದೇವಿ ಶಕ್ತಿಯನ್ನು ಪ್ರದರ್ಶಿಸಿದ್ದಾರೆ. ಗುಳಿಗ, ಪಂಜುರ್ಲಿ ದೈವಗಳೊಂದಿಗೆ ದೃಶ್ಯವೊಂದರಲ್ಲಿ ಶಕ್ತಿಶಾಲಿ ದೇವತೆ ಚಾಮುಂಡಿಯ ಆಹ್ವಾಹನೆಯೂ ಆಗಿದೆ. ದುಷ್ಟರನ್ನು ನಾಶಮಾಡುವ ದೈವಿಕ ಶಕ್ತಿಯನ್ನು ಇಲ್ಲಿ ಪ್ರತಿನಿಧಿಸಲಾಗಿದೆ. ಚಿತ್ರದುದ್ದಕ್ಕೂ ದೈವಗಳ ಮಹತ್ವ ಸಾರಿದ್ದು, ಕ್ಲೈಮ್ಯಾಕ್ಸ್ನಲ್ಲಿ ಬರುವ ಚಾಮುಂಡಿ ದೃಶ್ಯ ಪ್ರೇಕ್ಷಕರನ್ನು ರೋಮಾಂಚನಗೊಳಿಸಿತ್ತು.
ಅತಿ ಕಡಿಮೆ ಬಜೆಟ್ನಲ್ಲಿ ನಿರ್ಮಾಣಗೊಂಡು ನಿರೀಕ್ಷೆಗೂ ಮೀರಿದ ಕಲೆಕ್ಷನ್ ಮಾಡಿದ ಈ ವರ್ಷದ ಕನ್ನಡ ಸಿನಿಮಾ ‘ಸು ಫ್ರಮ್ ಸೋ’. ಜುಲೈ 25ರಂದು ಕನ್ನಡದಲ್ಲಿ ಬಿಡುಗಡೆಯಾದ ಈ ಕಂಟೆಂಟ್ ಸಿನಿಮಾ, ಕೆಲವೇ ದಿನಗಳಲ್ಲಿ ಬಹುಭಾಷೆಗಳಲ್ಲಿಯೂ ತೆರೆಕಂಡು ಸೂಪರ್ ಹಿಟ್ ಆಗಿದೆ. ಸ್ಥಳೀಯ ಕಾನ್ಸೆಪ್ಟ್ ಒಳಗೊಂಡ ಕಾಮಿಡಿ ಡ್ರಾಮಾವನ್ನು ಜೆ.ಪಿ.ತುಮಿನಾಡ್ ನಿರ್ದೇಶಿಸಿ, ನಟಿಸಿದ್ದಾರೆ. ಚಿತ್ರದ ಪ್ರಮುಖ ಪಾತ್ರ ಅಶೋಕ (ಜೆ.ಪಿ ತುಮಿನಾಡ್)ನನ್ನು ಆವರಿಸಿದ್ದ (ಅಸಲಿಗೆ ಯಾವುದೇ ಪ್ರೇತ ಇರಲಿಲ್ಲ) ಸೋಮೇಶ್ವರದ ಸುಲೋಚನಾ ಎಂಬ ಪ್ರೇತವನ್ನು ಓಡಿಸುವ ಕಠಿಣ ಕೆಲಸವನ್ನು ಗ್ರಾಮಸ್ಥರು ಮಾಡುತ್ತಾರೆ. ಇಲ್ಲಿ ಗಂಡಸಿನ ದೇಹದ ಮೇಲೆ ಹೆಣ್ಣು ಪ್ರೇತ ಆಹ್ವಾಹನೆಯಾಗುತ್ತದೆ, ಕ್ಲೈಮ್ಯಾಕ್ಸ್ನಲ್ಲಿ ಲೇಡಿ ಗೆಟಪ್ನಲ್ಲೇ ಜೆ.ಪಿ.ತುಮಿನಾಡ್ ಸ್ತ್ರೀಶಕ್ತಿ ಪ್ರದರ್ಶಿಸಿದ್ದಾರೆ.
ಕ್ರಿಸ್ಮಸ್ಗೆ ತೆರೆಕಂಡಿರುವ 45 ಶೀರ್ಷಿಕೆಯ ಚಿತ್ರದಲ್ಲಿ ಶಿವಣ್ಣ ಲೇಡಿ ಗೆಟಪ್ನಲ್ಲಿ ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸಿದ್ದಾರೆ. ಕ್ಲೈಮಾಕ್ಸ್ನಲ್ಲಿ ಬರುವ ಅವರ 11 ಅವತಾರಗಳಲ್ಲಿ ಲೇಡಿ ಗೆಟಪ್ ಕೂಡಾ ಒಂದು. ಅತ್ಯಂತ ರೂಪವತಿಯಾಗಿ ಹ್ಯಾಟ್ರಿಕ್ ಹೀರೋ ಕಾಣಿಸಿಕೊಂಡಿದ್ದು ಇಂಥ ಸಿನಿಮಾವನ್ನು ಈವರೆಗೆ ನೋಡೇ ಇರಲಿಲ್ಲ ಎನ್ನುವಂಥ ಅಭಿಪ್ರಾಯಗಳು ಹೆಚ್ಚು ಕೇಳಿಬಂದಿವೆ.
