ಕಾಂತಿಯುತ, ಆರೋಗ್ಯಕರ ಚರ್ಮ ಪಡೆಯಲು ಹಲವಾರು ವಿಧಾನಗಳನ್ನು ಜನರು ಪ್ರಯತ್ನಿಸುತ್ತಾರೆ. ಮನೆಯಲ್ಲೇ ಸಿಗುವ ಪದಾರ್ಥಗಳಿಂದ ಫೇಸ್‌ಪ್ಯಾಕ್ ಅಥವಾ ಸ್ಕಿನ್‌ಕೇರ್ ಮಾಡುವುದು ಸಾಮಾನ್ಯ. ಅದರಲ್ಲಿ ಹೆಚ್ಚು ಪ್ರಸಿದ್ಧವಾದ ಒಂದು ಮನೆಮದ್ದು ಎಂದರೆ ನಿಂಬೆಹಣ್ಣಿನ ರಸ. ಇದು ಚರ್ಮದ ಹೊಳಪನ್ನು ಹೆಚ್ಚಿಸುತ್ತದೆ, ಕಲೆಗಳನ್ನು ಕಡಿಮೆ ಮಾಡುತ್ತದೆ ಎಂಬ ನಂಬಿಕೆ ಹಲವರಿಗೆ ಇದೆ. ಆದರೆ ನಿಂಬೆಹಣ್ಣಿನ ರಸವನ್ನು ನೇರವಾಗಿ ಮುಖಕ್ಕೆ ಹಚ್ಚುವುದೇ ಸುರಕ್ಷಿತವೇ ಎಂಬ ಪ್ರಶ್ನೆಗೆ ಉತ್ತರ ಇಲ್ಲಿದೆ.
ಕಡಿಮೆ pH ಮಟ್ಟದಿಂದ ಉಂಟಾಗುವ ಹಾನಿ
ನಿಂಬೆರಸದ pH ಮಟ್ಟ ಕಡಿಮೆ ಇರುವುದರಿಂದ ಅದು ಹೆಚ್ಚು ಆಮ್ಲೀಯ. ಇದು ಸೂಕ್ಷ್ಮ ಚರ್ಮ, ಮೊಡವೆ, ಎಕ್ಸಿಮಾ ಅಥವಾ ಇತರ ಚರ್ಮ ಸಮಸ್ಯೆಗಳಿರುವವರಿಗೆ ಅಪಾಯಕಾರಿಯಾಗಿದೆ. ವಿಶೇಷವಾಗಿ ನಿಂಬೆರಸ ಹಚ್ಚಿದ ಬಳಿಕ ಬಿಸಿಲಿಗೆ ಹೋಗುವುದು ಚರ್ಮದ ಮೇಲೆ ಗುಳ್ಳೆಗಳು, ಉರಿ ಹಾಗೂ ಕೆಂಪಾದ ಮಚ್ಚೆಗಳು ಕಾಣಿಸಿಕೊಳ್ಳುವ ಸಾಧ್ಯತೆಯನ್ನು ಹೆಚ್ಚಿಸುತ್ತದೆ.
ನೇರ ಬಳಕೆ ತಪ್ಪಿಸಿ
ನಿಂಬೆರಸವನ್ನು ಯಾವತ್ತಿಗೂ ನೇರವಾಗಿ ಚರ್ಮಕ್ಕೆ ಹಚ್ಚಬಾರದು. ಜೇನುತುಪ್ಪ ಅಥವಾ ಮೊಸರಿನೊಂದಿಗೆ ಮಿಶ್ರಣ ಮಾಡಿ ಬಳಸುವುದು ಸುರಕ್ಷಿತ. ಈ ವಿಧಾನ ಚರ್ಮಕ್ಕೆ ಪೋಷಕಾಂಶಗಳನ್ನು ಒದಗಿಸುವುದರ ಜೊತೆಗೆ ಆಮ್ಲೀಯತೆಯನ್ನು ಕಡಿಮೆ ಮಾಡುತ್ತದೆ.
ಅಲರ್ಜಿ ಪರೀಕ್ಷೆ ಮಾಡುವುದು ಅವಶ್ಯಕ
ನಿಂಬೆರಸ ಎಲ್ಲರ ಚರ್ಮಕ್ಕೂ ಸೂಕ್ತವಾಗಿಲ್ಲ. ಬಳಸುವ ಮೊದಲು ಮುಖದ ಒಂದು ಸಣ್ಣ ಭಾಗಕ್ಕೆ ಹಚ್ಚಿ ಪರೀಕ್ಷೆ ಮಾಡಿ. ಅಲರ್ಜಿ, ಉರಿ ಅಥವಾ ತುರಿಕೆ ಕಾಣಿಸಿದರೆ ತಕ್ಷಣ ಬಳಸುವುದನ್ನು ನಿಲ್ಲಿಸಿ.
ಬಳಸುವ ಅವಧಿ ನಿಯಂತ್ರಣ
ನಿಂಬೆರಸ ಮಿಶ್ರಿತ ಫೇಸ್‌ಮಾಸ್ಕ್ ಹಚ್ಚಿದರೆ 10–15 ನಿಮಿಷಕ್ಕಿಂತ ಹೆಚ್ಚು ಇಡಬಾರದು. ಬಳಿಕ ಮೃದುವಾದ ಬಟ್ಟೆಯಿಂದ ಮುಖ ಒರೆಸಿ, ಮಾಯಿಶ್ಚರೈಸರ್ ಹಚ್ಚಬೇಕು. ನಿಂಬೆರಸ ಚರ್ಮವನ್ನು ಬ್ಲೀಚ್ ಮಾಡುವುದರಿಂದ ಒಣಗುವಿಕೆ ಹೆಚ್ಚಾಗಬಹುದು.
ತಜ್ಞರ ಸಲಹೆಯ ಮಹತ್ವ
ನಿಂಬೆರಸ ಬಳಕೆಯಿಂದ ಉಂಟಾಗುವ ಕಿರಿಕಿರಿ ಸಾಮಾನ್ಯವಾಗಿ ಒಂದು ಅಥವಾ ಎರಡು ದಿನಗಳಲ್ಲಿ ಕಡಿಮೆಯಾಗುತ್ತದೆ. ಆದರೆ ತೀವ್ರ ಉರಿ, ದದ್ದು ಅಥವಾ ಅಲರ್ಜಿ ಕಂಡುಬಂದರೆ ತಕ್ಷಣ ಚರ್ಮ ತಜ್ಞರನ್ನು ಸಂಪರ್ಕಿಸಬೇಕು.
ನಿಂಬೆರಸವು ಸರಿಯಾಗಿ ಬಳಸಿದರೆ ಚರ್ಮಕ್ಕೆ ಲಾಭಕರ. ಆದರೆ ನೇರ ಬಳಕೆ ಅಪಾಯಕಾರಿಯಾಗಿದೆ. ಜೇನುತುಪ್ಪ, ಮೊಸರು ಮುಂತಾದ ಪದಾರ್ಥಗಳೊಂದಿಗೆ ಮಿಶ್ರಣ ಮಾಡಿ ಕಡಿಮೆ ಅವಧಿಗೆ ಮಾತ್ರ ಬಳಸಿ.(Disclaimer: ಈ ಲೇಖನವು ಸಾರ್ವಜನಿಕ ಮೂಲಗಳಿಂದ ಸಂಗ್ರಹಿಸಿದ ಮಾಹಿತಿಯಾಧಾರಿತವಾಗಿದೆ.)
