ಬೆಳ್ಳಿಯ ಆಭರಣಗಳು ನಮ್ಮ ಸಂಸ್ಕೃತಿಯಲ್ಲಿ ಪ್ರಮುಖ ಸ್ಥಾನ ಹೊಂದಿವೆ. ಮದುವೆ, ಹಬ್ಬ ಹಾಗೂ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಬೆಳ್ಳಿಯ ಆಭರಣಗಳನ್ನು ಧರಿಸುವುದು ಸಾಮಾನ್ಯ. ಆದರೆ ಕಾಲಕ್ರಮೇಣ ಬೆಳ್ಳಿ ಆಭರಣಗಳು ಗಾಳಿ, ತೇವಾಂಶ ಮತ್ತು ಬೆವರಿನ ಸಂಪರ್ಕದಿಂದ ಕಪ್ಪಾಗುತ್ತವೆ. ಇದರಿಂದ ಅವು ಹೊಳಪು ಕಳೆದುಕೊಂಡಂತೆ ಕಾಣುತ್ತವೆ. ಇಂತಹ ಸಂದರ್ಭದಲ್ಲಿ ಮನೆಯಲ್ಲೇ ಕೆಲವು ಸರಳ ವಿಧಾನಗಳಿಂದ ಬೆಳ್ಳಿಯ ಆಭರಣಗಳನ್ನು ಮತ್ತೆ ಹೊಳೆಯುವಂತೆ ಮಾಡಬಹುದು.
ಬೇಕಿಂಗ್ ಸೋಡಾ
ಮೊದಲು ಬೇಕಿಂಗ್ ಸೋಡಾ ವಿಧಾನ ಅತ್ಯಂತ ಸರಳ. ಒಂದು ಬಟ್ಟಲಿನಲ್ಲಿ ಬಿಸಿ ನೀರನ್ನು ತೆಗೆದುಕೊಂಡು, ಅದರಲ್ಲಿ ಸ್ವಲ್ಪ ಬೇಕಿಂಗ್ ಸೋಡಾ ಹಾಕಿ ಆಭರಣವನ್ನು ನೆನೆಸಿಡಬೇಕು. ನಂತರ ಸಣ್ಣ ಬಟ್ಟೆಯಿಂದ ಒರೆಸಿದರೆ ಆಭರಣಕ್ಕೆ ಮತ್ತೆ ಹೊಳಪು ಬರುತ್ತದೆ.
ಟೂತ್ ಪೇಸ್ಟ್
ಟೂತ್ ಪೇಸ್ಟ್ ಕೂಡ ಉತ್ತಮ ಕ್ಲೀನರ್ ಆಗಿ ಕೆಲಸ ಮಾಡುತ್ತದೆ. ಮೃದುವಾದ ಬ್ರಷ್‌ಗೆ ಟೂತ್ ಪೇಸ್ಟ್ ಹಚ್ಚಿ ಆಭರಣವನ್ನು ಸವಿ ಒರೆಸಿದರೆ ಕಪ್ಪು ಮಸುಕು ಹೋಗುತ್ತದೆ.
ನಿಂಬೆಹಣ್ಣಿನ ರಸ ಮತ್ತು ಉಪ್ಪು
ನಿಂಬೆಹಣ್ಣಿನ ರಸ ಮತ್ತು ಉಪ್ಪಿನ ಮಿಶ್ರಣವೂ ಪರಿಣಾಮಕಾರಿ. ಈ ಮಿಶ್ರಣವನ್ನು ಬೆಳ್ಳಿಯ ಆಭರಣಕ್ಕೆ ಹಚ್ಚಿ ಸ್ವಲ್ಪ ಹೊತ್ತು ಇಟ್ಟು ನಂತರ ತಣ್ಣೀರಿನಲ್ಲಿ ತೊಳೆದು ಒರೆಸಿದರೆ ಉತ್ತಮ ಫಲಿತಾಂಶ ಸಿಗುತ್ತದೆ.
ಕೆಲವರು ಬೆಳ್ಳಿಯ ಆಭರಣಗಳನ್ನು ಬಾಳೆಹಣ್ಣು ಸಿಪ್ಪೆಯಿಂದಲೂ ಒರೆಸಿ ಸ್ವಚ್ಛಗೊಳಿಸುತ್ತಾರೆ. ಸಿಪ್ಪೆಯೊಳಗಿನ ನೈಸರ್ಗಿಕ ಎನ್ಜೈಮ್ಸ್ ಆಭರಣದ ಕಪ್ಪು ಮಸುಕನ್ನು ತೆಗೆಯಲು ಸಹಕಾರಿ.
ಒಟ್ಟಾರೆ, ಮನೆಯಲ್ಲೇ ಇರುವ ಸಾಮಾನ್ಯ ವಸ್ತುಗಳನ್ನು ಬಳಸಿ ಬೆಳ್ಳಿಯ ಆಭರಣಗಳನ್ನು ಸುಲಭವಾಗಿ ಕ್ಲೀನ್ ಮಾಡಬಹುದು. ಆದರೆ ಸ್ವಚ್ಛಗೊಳಿಸುವಾಗ ಮೃದುವಾದ ಬಟ್ಟೆ ಅಥವಾ ಬ್ರಷ್ ಬಳಸಿ ಎಚ್ಚರಿಕೆಯಿಂದ ಕೆಲಸ ಮಾಡುವುದು ಮುಖ್ಯ. ಸರಿಯಾದ ನಿರ್ವಹಣೆ ಮಾಡಿದರೆ ಬೆಳ್ಳಿಯ ಆಭರಣಗಳು ವರ್ಷಗಳವರೆಗೆ ಹೊಳೆಯುತ್ತವೆ ಮತ್ತು ಆಕರ್ಷಕವಾಗಿ ಕಾಣುತ್ತವೆ.
