ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಕಿರುತೆರೆ ಖ್ಯಾತ ನಿರ್ಮಾಪಕಿ ಏಕ್ತಾ ಕಪೂರ್ ಅವರ ಜನಪ್ರಿಯ ಹಾರರ್ ಸರಣಿ ‘ನಾಗಿನ್-7’ ಈಗ ವಿಭಿನ್ನ ಪ್ರಚಾರದ ಮೂಲಕ ಭಾರಿ ಸದ್ದು ಮಾಡುತ್ತಿದೆ. ಇದು ಈಗಾಗಲೇ ಆರು ಸೀಸನ್ಗಳ ಮೂಲಕ ವೀಕ್ಷಕರನ್ನು ಸೆಳೆದಿದ್ದು ವ್ಯಾಪಕ ಅಭಿಮಾನಿ ಬಳಗವನ್ನು ಹೊಂದಿದೆ.
ಸದ್ಯ ಸೀಸನ್ 7ಕ್ಕೆ ಆರಂಭಕ್ಕೆ ಸಿದ್ಧತೆ ನಡೆಯುತ್ತಿದೆ. ಇದಕ್ಕಾಗಿ ಪ್ರಚಾರ ಆರಂಭವಾಗಿದ್ದು, ಮುಂಬೈ ಮೆಟ್ರೋ ಲೈನ್ 1 ಅನ್ನು ವಿಶೇಷ ಪ್ರಚಾರಕ್ಕಾಗಿ ಬಳಸಿಕೊಳ್ಳಲಾಗಿದೆ. ಸದ್ಯ ಈ ಹೊಸ ಅನಿಮೇಟೆಡ್ ಲುಕ್ ನೋಡಿ ಪ್ರಯಾಣಿಕರು ಆಘಾತ ಒಳಗಾಗಿದ್ದಾರೆ. ಈ ವಿಡಿಯೊ ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಮುಂಬೈ ಮೆಟ್ರೋ ರೈಲನ್ನು ಸಂಪೂರ್ಣವಾಗಿ ‘ನಾಗಿನ್’ ದೃಶ್ಯದ ಅನಿಮೇಟೆಡ್ ಮೂಲಕ ಕ್ರಿಯೇಟ್ ಮಾಡಲಾಗಿದ್ದು ಈಗ ಸೋಶಿಯಲ್ ಮೀಡಿಯಾದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ. ವೈರಲ್ ವಿಡಿಯೊದಲ್ಲಿ ಮುಂಬೈ ಮೆಟ್ರೋ ‘ನಾಗಿನ್ 7’ ನ ಜಾಹೀರಾತಾಗಿ ರೂಪಾಂತರಗೊಂಡಿದ್ದು, ರೈಲಿನ ಹೊರಭಾಗಕ್ಕೆ ಹಾವಿನ ಚರ್ಮದಂತಹ ವಿನ್ಯಾಸ ಮತ್ತು ‘ನಾಗಿನ್ 7’ ಬಣ್ಣ ಬಣ್ಣದ ಗ್ರಾಫಿಕ್ಸ್ ಹಚ್ಚಲಾಗಿದೆ. ಹಳಿಗಳ ಮೇಲೆ ರೈಲು ಹೋಗುತ್ತಿದ್ದಂತೆ ಅದು ಬೃಹತ್ ಹಾವು ಹರಿದಾಡುತ್ತಿರುವಂತೆ ಭಾಸವಾಗುತ್ತಿದ್ದು, ಇದನ್ನು ಕಂಡ ಪ್ರಯಾಣಿಕರೇ ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
