ರಕ್ತದಾನ ಅನ್ನೋದು ಮಾನವೀಯತೆಯ ಅತ್ಯುತ್ತಮ ರೂಪ. ಕೆಲವೇ ನಿಮಿಷಗಳಲ್ಲಿ ಮಾಡೋ ಈ ಸೇವೆ ಅನೇಕ ಜೀವಗಳಿಗೆ ಹೊಸ ಉಸಿರು ಕೊಡುತ್ತೆ. ಆದರೆ ಸರಿಯಾದ ಸಿದ್ಧತೆ ಇಲ್ಲದೇ ರಕ್ತದಾನ ಮಾಡಿದರೆ ತಲೆಸುತ್ತು, ಆಯಾಸ, ದುರ್ಬಲತೆ ಅಂತ ಸಮಸ್ಯೆಗಳು ಎದುರಾಗಬಹುದು. ಇದಕ್ಕೆ ಮುಖ್ಯ ಕಾರಣ – ರಕ್ತದಾನಕ್ಕೂ ಮುನ್ನ ತೆಗೆದುಕೊಳ್ಳುವ ಆಹಾರ. ದೇಹಕ್ಕೆ ಬೇಕಾದ ಶಕ್ತಿ, ಕಬ್ಬಿಣ ಮತ್ತು ನೀರಿನ ಅಂಶ ಸರಿಯಾಗಿದ್ದರೆ ರಕ್ತದಾನ ಸುಗಮವಾಗುತ್ತದೆ. ಹಾಗಾದ್ರೆ ರಕ್ತದಾನಕ್ಕೆ ಮೊದಲು ಏನು ತಿನ್ನಬೇಕು? ಏನು ತಪ್ಪಿಸಬೇಕು? ಇಲ್ಲಿದೆ ಸಂಪೂರ್ಣ ಮಾಹಿತಿ.
ರಕ್ತದಾನಕ್ಕೂ ಮುನ್ನ ತಿನ್ನಬೇಕಾದ ಆಹಾರ
- ಕಬ್ಬಿಣಾಂಶಯುಕ್ತ ಆಹಾರ: ಹಿಮೋಗ್ಲೋಬಿನ್ ಮಟ್ಟ ಕಾಪಾಡಲು ಪಾಲಕ್, ಮೆಂತ್ಯ ಸೊಪ್ಪು, ಬೀಟ್ರೂಟ್, ಒಣದ್ರಾಕ್ಷಿ, ಖರ್ಜೂರ, ಬೆಲ್ಲ, ಬೇಳೆಕಾಳುಗಳು ಉಪಯುಕ್ತ.
- ಪ್ರೋಟೀನ್ ಇರುವ ಆಹಾರ: ಹಾಲು, ಮೊಸರು, ಬೇಳೆ, ಕಡಲೆಕಾಯಿ ದೇಹದ ಶಕ್ತಿಯನ್ನು ಹೆಚ್ಚಿಸುತ್ತದೆ.
- ಲಘು ಉಪಹಾರ: ರಕ್ತದಾನಕ್ಕೆ 2–3 ಗಂಟೆ ಮೊದಲು ಉಪ್ಪಿಟ್ಟು, ಅವಲಕ್ಕಿ, ದಲಿಯಾ, ಓಟ್ಸ್ ಅಥವಾ ಕಡಿಮೆ ಎಣ್ಣೆಯ ಸ್ಯಾಂಡ್ವಿಚ್ ತಿನ್ನುವುದು ಉತ್ತಮ.
- ದ್ರವಾಹಾರ: ಸಾಕಷ್ಟು ನೀರು, ಎಳನೀರು, ನಿಂಬೆ ಜ್ಯೂಸ್, ಕಡಿಮೆ ಸಕ್ಕರೆಯ ಹಣ್ಣಿನ ಜ್ಯೂಸ್ ಕುಡಿಯಬೇಕು.
ರಕ್ತದಾನಕ್ಕೂ ಮುನ್ನ ತಪ್ಪಿಸಬೇಕಾದವು
- ಅತಿ ಎಣ್ಣೆಯುಕ್ತ ಹಾಗೂ ಕರಿದ ಆಹಾರ
- ಹೆಚ್ಚು ಕಾಫಿ ಅಥವಾ ಟೀ
- ಮದ್ಯಪಾನ (ಕನಿಷ್ಠ 24 ಗಂಟೆ ಮೊದಲು ಸಂಪೂರ್ಣ ನಿಷೇಧ)
- ವೈದ್ಯರ ಸಲಹೆ ಇಲ್ಲದೆ ಆಸ್ಪಿರಿನ್ ಅಥವಾ ನೋವು ನಿವಾರಕಗಳು
ಸರಿಯಾದ ಆಹಾರ ಮತ್ತು ದ್ರವಾಹಾರದಿಂದ ರಕ್ತದಾನ ಸುರಕ್ಷಿತವಾಗುತ್ತದೆ. ಸ್ವಲ್ಪ ಜಾಗ್ರತೆ ನಿಮ್ಮ ಆರೋಗ್ಯವನ್ನು ಕಾಪಾಡುವುದರ ಜೊತೆಗೆ, ಮತ್ತೊಬ್ಬರ ಜೀವನವನ್ನು ಉಳಿಸುವ ಶಕ್ತಿಯನ್ನೂ ನಿಮಗೆ ನೀಡುತ್ತದೆ.
