ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌:
ಬರ್ಮಿಂಗ್ಹ್ಯಾಮ್‌ನಲ್ಲಿ ನಡೆಯುತ್ತಿರುವ ಇಂಗ್ಲೆಂಡ್ ವಿರುದ್ಧದ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾ ಭರ್ಜರಿ ಪ್ರದರ್ಶನ ನೀಡಿ, ಗೆಲುವಿನತ್ತ ಭದ್ರ ಹೆಜ್ಜೆ ಹಾಕಿದೆ. ಮೊದಲ ಇನ್ನಿಂಗ್ಸ್‌ನಲ್ಲಿ ಇಂಗ್ಲೆಂಡ್ ತಂಡವನ್ನು 407 ರನ್‌ಗಳಿಗೆ ಆಲೌಟ್ ಮಾಡುವ ಮೂಲಕ ಭಾರತ 180 ರನ್‌ಗಳ ಮುನ್ನಡೆ ಪಡೆದುಕೊಂಡಿದೆ.
ಮೂರನೇ ದಿನದ ಕೊನೆಯಲ್ಲಿ ಭಾರತ 13 ಓವರ್‌ಗಳಲ್ಲಿ 64 ರನ್‌ಗಳನ್ನು ಗಳಿಸಿದ್ದು, ಜೈಸ್ವಾಲ್ 28 ರನ್‌ಗೆ ಔಟಾಗಿದ್ದಾರೆ. ಕನ್ನಡಿಗ ಕೆಎಲ್ ರಾಹುಲ್ ಅಜೇಯ 28 ಹಾಗೂ ಕರುಣ್ ನಾಯರ್ ಅಜೇಯ 7 ರನ್‌ಗಳೊಂದಿಗೆ 4ನೇ ದಿನದ ಆಟಕ್ಕಾಗಿ ಕ್ರೀಸ್‌ನಲ್ಲಿ ಉಳಿದಿದ್ದಾರೆ. ಹೀಗಾಗಿ ಭಾರತ ಒಟ್ಟು 244 ರನ್‌ಗಳ ಮುನ್ನಡೆ ಗಳಿಸಿದೆ.
ಇಂಗ್ಲೆಂಡ್ ಮೊದಲ ಇನ್ನಿಂಗ್ಸ್‌ನಲ್ಲಿ ಆರಂಭಿಕವಾಗಿ ಸಂಕಷ್ಟಕ್ಕೆ ಸಿಲುಕಿತು. 77 ರನ್‌ನಿಂದ ಆಟ ಆರಂಭಿಸಿದ ತಂಡ, ಸಿರಾಜ್ ಮಾರಕ ಎಸೆತದ ಎದುರು 7 ರನ್‌ಗಳಲ್ಲೇ ಜೋ ರೂಟ್ (22) ಮತ್ತು ನಾಯಕ ಬೆನ್ ಸ್ಟೋಕ್ಸ್ (0) ವಿಕೆಟ್‌ಗಳನ್ನು ಕಳೆದುಕೊಂಡಿತು. ಕೆಲವೇ ಕ್ಷಣಗಳಲ್ಲಿ ಇಂಗ್ಲೆಂಡ್ 84 ರನ್‌ಗಳಿಗೆ 5 ವಿಕೆಟ್‌ಗಳನ್ನು ಕಳೆದುಕೊಂಡಿತು.
ಆದರೆ ನಂತರ ಹ್ಯಾರಿ ಬ್ರೂಕ್ ಮತ್ತು ವಿಕೆಟ್ ಕೀಪರ್ ಜ್ಯಾಮಿ ಸ್ಮಿತ್ ತಮ್ಮ ನಡುವಿನ 300 ರನ್‌ಗಳ ಭರ್ಜರಿ ಜೊತೆಯಾಟದಿಂದ ಭಾರತಕ್ಕೆ ತೀವ್ರ ಹೊಡೆತ ನೀಡಿದರು. ಬ್ರೂಕ್ 234 ಎಸೆತಗಳಲ್ಲಿ 158 ರನ್ ಸಿಡಿಸಿದರು. ಸ್ಮಿತ್ 207 ಎಸೆತಗಳಲ್ಲಿ 184 ರನ್‌ಗಳನ್ನು ಅಜೇಯವಾಗಿ ಗಳಿಸಿದರು. ಈ ಜೋಡಿ 60.2 ಓವರ್‌ಗಳಲ್ಲಿ 303 ರನ್ ಪೇರಿಸಿದೆ.
ಭಾರತದ ಪರ ಮೊಹಮ್ಮದ್ ಸಿರಾಜ್ 70 ರನ್‌ಗೆ 6 ವಿಕೆಟ್ ಕಬಳಿಸಿ ತಮ್ಮ ಆಟ ಮುಂದುವರಿಸಿದರು. ಆಕಾಶ್ ದೀಪ್ ಕೂಡ ಉತ್ತಮ ಪ್ರದರ್ಶನ ನೀಡಿ 88 ರನ್‌ಗೆ 4 ವಿಕೆಟ್ ಪಡೆದರು. ಇಂಗ್ಲೆಂಡ್ ತಮ್ಮ ಕೊನೆಯ 4 ವಿಕೆಟ್‌ಗಳನ್ನು ಕೇವಲ 20 ರನ್‌ಗಳಲ್ಲಿ ಕಳೆದುಕೊಂಡಿತು.
ಭಾರತದ ಮೊದಲ ಇನ್ನಿಂಗ್ಸ್‌ನಲ್ಲಿ ನಾಯಕ ಶುಭ್‌ಮನ್ ಗಿಲ್ 387 ಎಸೆತಗಳಲ್ಲಿ 269 ರನ್ ಸಿಡಿಸಿ ಬೃಹತ್ ದ್ವಿಶತಕ ಬಾರಿಸಿದರು. ಜೈಸ್ವಾಲ್ 87 ಮತ್ತು ಜಡೇಜಾ 89 ರನ್‌ಗಳ ಬೆಂಬಲದಿಂದ ಭಾರತ 587 ರನ್‌ಗಳ ಬೃಹತ್ ಮೊತ್ತ ದಾಖಲಿಸಿತ್ತು.
ಟೀಂ ಇಂಡಿಯಾ ಈಗಾಗಲೇ 244 ರನ್‌ಗಳ ಮುನ್ನಡೆ ಹೊಂದಿದ್ದು, ಇನ್ನೂ ಎರಡು ದಿನಗಳ ಆಟ ಬಾಕಿಯಿರುವ ಹಿನ್ನೆಲೆಯಲ್ಲಿ ಜಯದತ್ತ ದಿಟ್ಟ ಹೆಜ್ಜೆ ಇಟ್ಟಿದೆ.
