ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತ ಪುರುಷರ ಕ್ರಿಕೆಟ್ ತಂಡವು ಇಂಗ್ಲೆಂಡ್ ನಲ್ಲಿ ನಡೆಯುತ್ತಿರುವ ಟೆಸ್ಟ್ ಸರಣಿಯಲ್ಲಿ ಟಾಸ್ ಗುರಿಯಲ್ಲಿಯೇ ಹಿನ್ನಡೆಯಿಂದ ಸಾಗುತ್ತಿದೆ. ಲಂಡನ್‌ನ ಕೆನ್ನಿಂಗ್ಟನ್ ಓವಲ್‌ನಲ್ಲಿ ನಡೆದ ಐದನೇ ಟೆಸ್ಟ್ ಪಂದ್ಯದಲ್ಲೂ ಭಾರತವು ಟಾಸ್ ಸೋತು 15ನೇ ಸತತ ಸೋಲನ್ನು ದಾಖಲಿಸಿದೆ. ಜನವರಿ 2025ರ ನಂತರದಿಂದ ಭಾರತ ಯಾವುದೇ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ ಟಾಸ್ ಗೆಲ್ಲದ ಪರಂಪರೆ ಮುಂದುವರೆದಿದ್ದು, ಇದರಲ್ಲಿ 2 ಟಿ20, 8 ಏಕದಿನ ಹಾಗೂ 5 ಟೆಸ್ಟ್ ಪಂದ್ಯಗಳು ಸೇರಿವೆ.
ಟೀಂ ಇಂಡಿಯಾ ಕೊನೆಯ ಬಾರಿ ಜನವರಿಯಲ್ಲಿ ರಾಜ್‌ಕೋಟ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ ನಡೆದ ಟಿ20 ಪಂದ್ಯದಲ್ಲಿ ಸೂರ್ಯಕುಮಾರ್ ಯಾದವ್ ನಾಯಕತ್ವದಲ್ಲಿ ಟಾಸ್ ಗೆದ್ದಿತ್ತು. ಆದರೆ ಇದೀಗ ಶುಭ್‌ಮನ್ ಗಿಲ್ ಅವರ ನಾಯಕತ್ವದಲ್ಲಿ ಭಾರತ ಐದು ಟೆಸ್ಟ್‌ಗಳ ಸರಣಿಯ ಎಲ್ಲ ಪಂದ್ಯಗಳ ಟಾಸ್ ಸೋತಿದೆ.
ಗಿಲ್‌ರ ನಾಯಕತ್ವದ ಮೊದಲ ಸೀರೀಸ್ ಇದಾಗಿದ್ದು, ಅವರು ಈವರೆಗೂ ಒಂದು ಟಾಸ್ ಕೂಡ ಗೆದ್ದಿಲ್ಲ. ಆದರೆ ಟಾಸ್ ಸೋಲುಗಳು ಅವರ ಬ್ಯಾಟಿಂಗ್ ಪ್ರದರ್ಶನದ ಮೇಲೆ ಪ್ರಭಾವ ಬೀರಿಲ್ಲ. ಈ ಸೀರೀಸ್‌ನಲ್ಲಿ ಗಿಲ್ 733 ರನ್ ಗಳಿಸಿ, ಸುನಿಲ್ ಗವಾಸ್ಕರ್ ಅವರ ಟೆಸ್ಟ್ ಸರಣಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಭಾರತೀಯ ನಾಯಕನ ದಾಖಲೆಯನ್ನು ಮುರಿದಿದ್ದಾರೆ.
ಸರಣಿಯ ಹಾಲಿ ಸ್ಥಿತಿಗತಿ ಪ್ರಕಾರ ಇಂಗ್ಲೆಂಡ್ 2-1 ರಿಂದ ಮುನ್ನಡೆ ಹೊಂದಿದೆ. ಮೊದಲ ಟೆಸ್ಟ್ ಪಂದ್ಯದಲ್ಲಿ ಭಾರತ ಸೋತು, ಎರಡನೇಯಲ್ಲಿ ಭರ್ಜರಿ ಜಯ ಸಾಧಿಸಿತ್ತು. ಮೂರನೇ ಟೆಸ್ಟ್‌ನಲ್ಲಿ ಭಾರತವು ಸೋಲಿನ ರುಚಿ ಕಂಡರೆ, ನಾಲ್ಕನೇ ಪಂದ್ಯ ಡ್ರಾಗಾಗಿ ಅಂತ್ಯವಾಯಿತಾದರೂ ಗಿಲ್, ಜಡೇಜಾ ಹಾಗೂ ವಾಷಿಂಗ್ಟನ್ ಸುಂದರ್ ಶತಕ ಬಾರಿಸಿದ್ದರು.
ಐದನೇ ಟೆಸ್ಟ್ ಪಂದ್ಯ ಭಾರತಕ್ಕೆ ಬಹುಮೂಲ್ಯವಾದದ್ದು. ಇದು ಗೆದ್ದರೆ ಭಾರತ ಸರಣಿಯನ್ನು ಸಮಬಲಗೊಳಿಸಲು ಸಾಧ್ಯವಾಗುತ್ತದೆ. ಇಲ್ಲವಾದರೆ ಇಂಗ್ಲೆಂಡ್ 3-1ರಿಂದ ಸರಣಿಯನ್ನು ಗೆಲ್ಲಲಿದೆ. ಈ ಪಂದ್ಯಕ್ಕೆ ಭಾರತ ನಾಲ್ಕು ಪ್ರಮುಖ ಬದಲಾವಣೆಗಳನ್ನು ಮಾಡಿದ್ದು, ಬುಮ್ರಾ, ಪಂತ್, ಶಾರ್ದೂಲ್ ಹಾಗೂ ಅನ್ಶುಲ್ ಕಾಂಬೋಜ್ ಕಣದಿಂದ ಹೊರಗುಳಿದಿದ್ದಾರೆ. ತಂಡದಲ್ಲಿ ಸಿರಾಜ್ ಮತ್ತು ಶಾರ್ದೂಲ್ ಪುನರಾಗಮನವಾಗಿದೆ.
