ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಭಾರತೀಯ ಕ್ರೀಡಾ ಇತಿಹಾಸದಲ್ಲಿ ಹೊಸ ಮೈಲಿಗಲ್ಲನ್ನು ಸ್ಥಾಪಿಸಲಾಗಿದೆ. ಚೆನ್ನೈನ ಎಕ್ಸ್ಪ್ರೆಸ್ ಅವೆನ್ಯೂ ಮಾಲ್ನ ಕೋರ್ಟ್ನಲ್ಲಿ ನಡೆದ ಸ್ಕ್ವಾಷ್ ವಿಶ್ವಕಪ್ನ ಫೈನಲ್ ಪಂದ್ಯದಲ್ಲಿ ಭಾರತ ತಂಡವು ಅಗ್ರ ಶ್ರೇಯಾಂಕಿತ ಹಾಂಗ್ ಕಾಂಗ್ ತಂಡವನ್ನು 3-0 ಅಂತರದಿಂದ ಮಣಿಸಿ, ಚೊಚ್ಚಲ ಬಾರಿಗೆ ಚಾಂಪಿಯನ್ ಪಟ್ಟವನ್ನು ಅಲಂಕರಿಸಿದೆ.
ಸ್ಕ್ವಾಷ್ ವಿಶ್ವಕಪ್ ಇತಿಹಾಸದಲ್ಲಿ ಏಷ್ಯಾದ ಎರಡು ರಾಷ್ಟ್ರಗಳು ಫೈನಲ್ನಲ್ಲಿ ಸೆಣಸಾಡಿದ್ದು ಇದೇ ಮೊದಲು. ಈ ಐತಿಹಾಸಿಕ ಸಂಘರ್ಷದಲ್ಲಿ ಭಾರತೀಯ ತಾರೆಯರಾದ ಜೋಶ್ನಾ ಚಿನಪ್ಪ, ಅಭಯ್ ಸಿಂಗ್ ಮತ್ತು ಅನಾಹತ್ ಸಿಂಗ್ ಅತ್ಯುತ್ತಮ ಪ್ರದರ್ಶನ ನೀಡುವ ಮೂಲಕ ಭಾರತಕ್ಕೆ ಚಿನ್ನದ ಪದಕ ತಂದುಕೊಟ್ಟಿದ್ದಾರೆ.
ಮೊದಲ ಸುತ್ತು (ಮಹಿಳಾ ಸಿಂಗಲ್ಸ್): ಜೋಶ್ನಾ ಚಿನಪ್ಪ ಜಯಭೇರಿ ಭಾರತದ ಅನುಭವಿ ಆಟಗಾರ್ತಿ ಜೋಶ್ನಾ ಚಿನಪ್ಪ ಅವರು ಹಾಂಗ್ ಕಾಂಗ್ನ ಕಾ ಯಿ ಲೀ ವಿರುದ್ಧ 7-3, 2-7, 7-5, 7-1 ಸೆಟ್ಗಳ ಮೂಲಕ ರೋಚಕ ಗೆಲುವು ಸಾಧಿಸಿ, ಭಾರತಕ್ಕೆ ಆರಂಭಿಕ ಮುನ್ನಡೆ ತಂದುಕೊಟ್ಟರು.
ದ್ವಿತೀಯ ಸುತ್ತು (ಪುರುಷರ ಸಿಂಗಲ್ಸ್): ಅಭಯ್ ಸಿಂಗ್ ಅಬ್ಬರ ದ್ವಿತೀಯ ಸುತ್ತಿನಲ್ಲಿ ಕಣಕ್ಕಿಳಿದ ಅಭಯ್ ಸಿಂಗ್ ಅವರು ಹಾಂಗ್ ಕಾಂಗ್ನ ಅಲೆಕ್ಸ್ ಲಾವ್ ಅವರನ್ನು ನೇರ ಸೆಟ್ಗಳಿಂದ (7-1, 7-4, 7-4) ಸುಲಭವಾಗಿ ಸೋಲಿಸಿ, ಭಾರತದ ಗೆಲುವಿನ ಹಾದಿಯನ್ನು ಸುಗಮಗೊಳಿಸಿದರು.
ಅಂತಿಮ ಸುತ್ತು (ಮಹಿಳಾ ಸಿಂಗಲ್ಸ್): ಅನಾಹತ್ ಸಿಂಗ್ ಅಚ್ಚರಿ ನಿರ್ಣಾಯಕ ಮೂರನೇ ಸುತ್ತಿನಲ್ಲಿ ಯುವ ತಾರೆ ಅನಾಹತ್ ಸಿಂಗ್ ಅವರು ಟೊಮ್ಯಾಟೊ ಹೊ ವಿರುದ್ಧ 7-2, 7-2, 7-5 ಸೆಟ್ಗಳ ಭರ್ಜರಿ ಜಯ ಸಾಧಿಸಿ, 3-0 ಅಂತರದಿಂದ ಭಾರತವನ್ನು ವಿಶ್ವ ಚಾಂಪಿಯನ್ ಆಗಿ ಘೋಷಿಸಿದರು.
ಇದಕ್ಕೂ ಮುನ್ನ 2023 ರಲ್ಲಿ ಕಂಚಿನ ಪದಕ ಗೆದ್ದಿದ್ದು ಭಾರತದ ಸ್ಕ್ವಾಷ್ ಇತಿಹಾಸದಲ್ಲಿ ಶ್ರೇಷ್ಠ ಸಾಧನೆಯಾಗಿತ್ತು. ಆದರೆ, ಈ ಬಾರಿ ಅದ್ಭುತ ಪ್ರದರ್ಶನ ನೀಡಿದ ಭಾರತೀಯ ತ್ರಿವಳಿಗಳು – ಜೋಶ್ನಾ, ಅಭಯ್ ಮತ್ತು ಅನಾಹತ್ – ತಮ್ಮ ರಾಷ್ಟ್ರಕ್ಕೆ ಮೊದಲ ಐತಿಹಾಸಿಕ ಸ್ಕ್ವಾಷ್ ವಿಶ್ವಕಪ್ ಪ್ರಶಸ್ತಿಯನ್ನು ಗೆದ್ದುಕೊಡುವಲ್ಲಿ ಯಶಸ್ವಿಯಾಗಿದ್ದಾರೆ.
