ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಹಿಮಾಲಯದ ದುರ್ಗಮ ಪರ್ವತ ಪ್ರದೇಶದಲ್ಲಿ ಭಾರತೀಯ ವಾಯುಪಡೆ ಮತ್ತೊಂದು ಐತಿಹಾಸಿಕ ಸಾಧನೆ ಮಾಡಿದೆ.
ಸಮುದ್ರ ಮಟ್ಟದಿಂದ ಬರೋಬ್ಬರಿ 13,629 ಅಡಿ ಎತ್ತರದಲ್ಲಿರುವ ಲಡಾಖ್‌ನ ಮುಧ್-ನ್ಯೋಮಾ ವಾಯುನೆಲೆಯಲ್ಲಿ ರಷ್ಯಾ ಮೂಲದ IL-76MD ಬೃಹತ್ ಸಾರಿಗೆ ವಿಮಾನವನ್ನು ಯಶಸ್ವಿಯಾಗಿ ಇಳಿಸುವ ಮೂಲಕ ವಿಶ್ವದಾಖಲೆ ನಿರ್ಮಿಸಿದೆ. ಈ ಸಾಧನೆಯೊಂದಿಗೆ ಅತಿ ಎತ್ತರದ ಪ್ರದೇಶದಲ್ಲಿ IL-76 ವಿಮಾನ ಇಳಿಸಿದ ಅಪೂರ್ವ ಹೆಗ್ಗಳಿಕೆ ಭಾರತೀಯ ವಾಯುಪಡೆಯ ಪಾಲಾಗಿದೆ. ಶುಕ್ರವಾರ ನಡೆದ ಈ ಕಾರ್ಯಾಚರಣೆಯ ವಿವರಗಳನ್ನು ವಾಯುಪಡೆ ಶನಿವಾರ ಪ್ರಕಟಿಸಿದೆ.
ಪರ್ವತ ಶಿಖರದ ನಡುವೆ ಐತಿಹಾಸಿಕ ಲ್ಯಾಂಡಿಂಗ್!
ಅತ್ಯಂತ ಎತ್ತರದ ಪ್ರದೇಶದಲ್ಲಿ ವಿಮಾನ ಇಳಿಸುವುದು ಸಾಮಾನ್ಯ ಸಂಗತಿಯಲ್ಲ. ಕಡಿಮೆ ಗಾಳಿಯ ಸಾಂದ್ರತೆ, ಬದಲಾಗುವ ಹವಾಮಾನ ಮತ್ತು ಸೀಮಿತ ರನ್‌ವೇ ಸವಾಲುಗಳ ನಡುವೆಯೂ IL-76MD ವಿಮಾನವನ್ನು ಸುರಕ್ಷಿತವಾಗಿ ಇಳಿಸುವಲ್ಲಿ ಪೈಲಟ್‌ಗಳು ಯಶಸ್ವಿಯಾಗಿದ್ದಾರೆ. ಸಿಬ್ಬಂದಿಯ ಅಪಾರ ಅನುಭವ, ನಿಖರತೆ ಮತ್ತು ವೃತ್ತಿಪರ ಕೌಶಲ್ಯವನ್ನು ವಾಯುಪಡೆ ಶ್ಲಾಘಿಸಿದೆ.
ಇದನ್ನೂ ಓದಿ:
ಚೀನಾ ಗಡಿಯಿಂದ ಕೇವಲ 23 ಕಿ.ಮೀ. ದೂರದಲ್ಲಿ ವಾಯುನೆಲೆ
ನ್ಯೋಮಾ ವಾಯುನೆಲೆಯು ಚೀನಾದೊಂದಿಗಿನ ವಾಸ್ತವ ನಿಯಂತ್ರಣ ರೇಖೆ (LAC) ಯಿಂದ ಕೇವಲ 23 ಕಿಲೋಮೀಟರ್ ದೂರದಲ್ಲಿದೆ. 2025ರ ನವೆಂಬರ್‌ನಲ್ಲಿ ಉದ್ಘಾಟನೆಗೊಂಡ ಈ ವಾಯುನೆಲೆಯು ಭಾರತದ ಗಡಿಭದ್ರತೆ ಹಾಗೂ ಸೇನಾ ಕಾರ್ಯಾಚರಣೆಗಳಿಗೆ ಅತ್ಯಂತ ಮಹತ್ವದ್ದಾಗಿದೆ.
218 ಕೋಟಿ ರೂ. ವೆಚ್ಚದಲ್ಲಿ ಅಭಿವೃದ್ಧಿ
ಸುಮಾರು 218 ಕೋಟಿ ರೂ. ವೆಚ್ಚದಲ್ಲಿ ನ್ಯೋಮಾ ವಾಯುನೆಲೆಯನ್ನು ಅತ್ಯಾಧುನಿಕ ಸೌಲಭ್ಯಗಳೊಂದಿಗೆ ಅಭಿವೃದ್ಧಿಪಡಿಸಲಾಗಿದೆ. 2.7 ಕಿಲೋಮೀಟರ್ ಉದ್ದದ ರನ್‌ವೇ ಹೊಂದಿರುವ ಇಲ್ಲಿ ಯುದ್ಧವಿಮಾನಗಳು, ಸಾರಿಗೆ ವಿಮಾನಗಳು ಮತ್ತು ಹೆಲಿಕಾಪ್ಟರ್‌ಗಳು ಕಾರ್ಯಾಚರಣೆ ನಡೆಸಲು ಅವಕಾಶವಿದೆ. ಈ ಯೋಜನೆಯ ಅಭಿವೃದ್ಧಿಯಲ್ಲಿ ಮಹಿಳಾ ಅಧಿಕಾರಿಗಳ ತಂಡವೂ ಪ್ರಮುಖ ಪಾತ್ರ ವಹಿಸಿದೆ.
