ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಬೆಳದಿಂಗಳ ಕೆಲಸ (ಮೂನ್‌ಲೈಟಿಂಗ್) ಕುರಿತು ಬೇರೆ ಬೇರೆ ರೀತಿಯಲ್ಲಿ ಚರ್ಚೆಗಳು ನಡೆಯುತ್ತಿರುವುದರ ನಡುವೆಯೇ, ಭಾರತದ ಎರಡನೇ ಅತಿದೊಡ್ಡ ಐಟಿ ಸಂಸ್ಥೆ ಇನ್ಫೋಸಿಸ್ ತನ್ನ ಉದ್ಯೋಗಿಗಳಿಗೆ ತಮ್ಮ ವ್ಯವಸ್ಥಾಪಕರು ಮತ್ತು ಮಾನವ ಸಂಪನ್ಮೂಲಗಳ ಪೂರ್ವಾನುಮತಿಯೊಂದಿಗೆ ಕಂಪನಿಯ ಹೊರಗೆ ಉದ್ಯೋಗಾವಕಾಶಗಳನ್ನು ಪಡೆಯಲು ಅವಕಾಶ ಮಾಡಿಕೊಟ್ಟಿದೆ ಎಂದು ನ್ಯೂಸ್18 ವರದಿ ಮಾಡಿದೆ.
ಕಂಪನಿಯು ಉದ್ಯೋಗಿಗಳಿಗೆ ಆಂತರಿಕ ಇಮೇಲ್‌ನಲ್ಲಿ ಹೀಗೆ ಹೇಳಿದೆ, “ಯಾವುದೇ ಉದ್ಯೋಗಿ, ಗಿಗ್ ಕೆಲಸವನ್ನು ತೆಗೆದುಕೊಳ್ಳಲು ಬಯಸಿದರೆ ಅವರ ಮ್ಯಾನೇಜರ್ ಮತ್ತು BP-HR ಅವರ ಪೂರ್ವಾನುಮತಿಯೊಂದಿಗೆ ವೈಯಕ್ತಿಕವಾಗಿ ಹಾಗೆ ಮಾಡಬಹುದು. ಇನ್ಫೋಸಿಸ್ ಅಥವಾ ಇನ್ಫೋಸಿಸ್ ಗ್ರಾಹಕರೊಂದಿಗೆ ಸ್ಪರ್ಧಿಸದ ಸಂಸ್ಥೆಗಳಿಗೆ ಅವರು ಕೆಲಸ ಮಾಡಬಹುದು” ಎಂದಿದೆ ಎನ್ನಲಾಗಿದೆ.
ಉದ್ಯೋಗಿಗಳಿಗೆ ಹೊಸ ಕೌಶಲ್ಯಗಳನ್ನು ಕಲಿಯಲು ಮತ್ತು ಹೆಚ್ಚುವರಿ ಯೋಜನೆಗಳನ್ನು ತೆಗೆದುಕೊಳ್ಳುವ ಮೂಲಕ ಅನುಭವವನ್ನು ಪಡೆಯಲು ಇದು ಬೆಂಬಲವಾಗಿದೆ ಎಂದು ಇನ್ಫಿ ಹೇಳಿದೆ.
ಮೂನ್ ಲೈಟಿಂಗ್ ಏಕಕಾಲದಲ್ಲಿ ಎರಡು ಅಥವಾ ಹೆಚ್ಚಿನ ಕೆಲಸಗಳನ್ನು ಮಾಡಲು ಅನುವು ಮಾಡಿಕೊಡುತ್ತದೆ. ಭಾರತದ ಐಟಿ ಮತ್ತು ಸಾಫ್ಟ್‌ವೇರ್ ಉದ್ಯಮವು ಕಂಪನಿಗಳು ತಮ್ಮ ಉದ್ಯೋಗಿಗಳಿಗೆ ಅವರ ಕೆಲಸದ ಸಮಯದ ನಂತರವೂ ಹಾಗೆ ಮಾಡಲು ಅನುಮತಿಸಬೇಕೇ ಎಂಬುದರ ಕುರಿತು ವಿಭಜಿತ ಮನಸ್ಥಿತಿ ಹೊಂದಿದೆ.
ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (TCS), HCLTech, IBM ಮತ್ತು Wipro ಸೇರಿದಂತೆ ಹಲವಾರು IT ಕಂಪನಿಗಳು ಮೂನ್‌ಲೈಟಿಂಗ್ ಅನ್ನು ವಿರೋಧಿಸಿವೆ, ಇದು ನೈತಿಕ ಸಮಸ್ಯೆ ಮತ್ತು ಉದ್ಯೋಗಿ ಸಂಹಿತೆಯ ಉಲ್ಲಂಘನೆ ಎಂದು ಕರೆದಿದೆ. ವಿಪ್ರೋ ತನ್ನ ಪ್ರತಿಸ್ಪರ್ಧಿಗಳಿಗಾಗಿ ಕೆಲಸ ಮಾಡುತ್ತಿರುವುದನ್ನು ಕಂಡು 300 ಉದ್ಯೋಗಿಗಳನ್ನು ವಜಾಗೊಳಿಸಿದೆ. ಈ ಪ್ರಕರಣದ ನಂತರ ಬೆಳದಿಂಗಳ ಕೆಲಸದ ಕುರಿತು ವ್ಯಾಪಕ ಚರ್ಚೆಗಳಿಗೆ ಕಾರಣವಾಗಿದೆ.
