ಅಡುಗೆ ಮನೆಯಲ್ಲಿ ಎಲ್ಲವೂ ಚೆನ್ನಾಗಿ ಸ್ವಚ್ಛವಾಗಿದ್ದರೆ ಅಡುಗೆ ಮಾಡುವ ಉತ್ಸಾಹವೇ ಬೇರೆ. ಆದರೆ ಪ್ರತಿದಿನ ಬಳಕೆಯಲ್ಲಿರುವ ಮಿಕ್ಸಿ–ಗ್ರೈಂಡರ್ ಮಾತ್ರ ಕೆಲವೊಮ್ಮೆ ಹಠಮಾರಿಗಳಂತೆ ವರ್ತಿಸುತ್ತದೆ. ಎಷ್ಟು ಬಾರಿ ತೊಳೆದರೂ ಬ್ಲೇಡ್ಗಳ ಮಧ್ಯೆ ಸಿಲುಕಿರುವ ಆಹಾರದ ಅಂಶಗಳು ಹೊರಬರುವುದಿಲ್ಲ. ಇದರಿಂದ ಮಿಕ್ಸಿಯ ಜಾರಿನಿಂದ ಅಸಹ್ಯವಾದ ವಾಸನೆ ಬರಲು ಪ್ರಾರಂಭವಾಗುತ್ತದೆ. ಹೊಸದಾಗಿ ತಯಾರಿಸಿದ ಆಹಾರದ ರುಚಿಯನ್ನೂ ಈ ವಾಸನೆ ಹಾಳುಮಾಡುವ ಸಾಧ್ಯತೆ ಇದೆ. ಇಂತಹ ಸಂದರ್ಭಗಳಲ್ಲಿ ಮಿಕ್ಸಿಯನ್ನು ಬದಲಾಯಿಸುವ ಅವಶ್ಯಕತೆಯೇ ಇಲ್ಲ. ಮನೆಯಲ್ಲೇ ಇರುವ ಕೆಲ ಸಾಮಾನ್ಯ ವಸ್ತುಗಳ ನೆರವಿನಿಂದ ಈ ಸಮಸ್ಯೆಯನ್ನು ಸುಲಭವಾಗಿ ಪರಿಹರಿಸಬಹುದು.
- ಬೇಕಿಂಗ್ ಸೋಡಾ ಬಳಕೆ: ಮಿಕ್ಸಿ ಜಾರಿಗೆ ನೀರು ಹಾಗೂ ಸ್ವಲ್ಪ ಬೇಕಿಂಗ್ ಸೋಡಾ ಹಾಕಿ ಕೆಲವು ಕ್ಷಣ ಹಾಗೆಯೇ ಬಿಡಿ. ಬಳಿಕ ಬಿಸಿ ನೀರಿನಿಂದ ತೊಳೆಯುವುದರಿಂದ ಬ್ಲೇಡ್ಗಳ ನಡುವಿನ ಅಂಟು ಮತ್ತು ವಾಸನೆ ದೂರವಾಗುತ್ತದೆ.
- ನಿಂಬೆಹಣ್ಣಿನ ಸಿಪ್ಪೆ: ನಿಂಬೆ ಸಿಪ್ಪೆಯನ್ನು ನೀರಿನ ಜೊತೆ ಗ್ರೈಂಡ್ ಮಾಡಿ ಸ್ವಲ್ಪ ಸಮಯ ಬಿಟ್ಟು ತೊಳೆಯಿರಿ. ಇದು ಸಹಜವಾಗಿ ವಾಸನೆ ಹೀರಿಕೊಳ್ಳುತ್ತದೆ.
- ವಿನೆಗರ್ ಪರಿಹಾರ: ಒಂದು ಲೋಟ ನೀರಿಗೆ ಎರಡು ಚಮಚ ವಿನೆಗರ್ ಸೇರಿಸಿ ಜಾರಿಗೆ ಹಾಕಿ ತೊಳೆಯುವುದರಿಂದ ದುರ್ವಾಸನೆ ಮಾಯವಾಗುತ್ತದೆ.
- ಆಲ್ಕೋಹಾಲ್ ಬಳಕೆ: ಸ್ವಲ್ಪ ಆಲ್ಕೋಹಾಲನ್ನು ಜಾರಿಗೆ ಹಾಕಿ ಸ್ವಲ್ಪ ಸಮಯ ಬಿಟ್ಟರೆ, ಅಂಟಿಕೊಂಡ ಆಹಾರ ಮತ್ತು ಕೆಟ್ಟ ವಾಸನೆ ಸಂಪೂರ್ಣವಾಗಿ ಹೋಗಿಬಿಡುತ್ತದೆ.
