ಕರಾವಳಿ ಪ್ರದೇಶಗಳ ಆಹಾರ ಸಂಸ್ಕೃತಿಯಲ್ಲಿ ಮೀನು ಪ್ರಮುಖ ಸ್ಥಾನ ಹೊಂದಿದೆ. ಆಧುನಿಕ ಅಡುಗೆ ಸಾಧನಗಳು ಮಾರುಕಟ್ಟೆಗೆ ಬರುವುದಕ್ಕೂ ಮುನ್ನ ಇಲ್ಲಿನ ಜನರು ಮೀನುಗಳನ್ನು ಸ್ವಚ್ಛಗೊಳಿಸಲು ಮತ್ತು ಅಡುಗೆಗೆ ತಯಾರಿಸಲು ಕಾಲೋಚಿತ ಹಾಗೂ ಅನುಭವಸಿದ್ಧ ವಿಧಾನಗಳನ್ನು ಅನುಸರಿಸುತ್ತಿದ್ದರು. ಇಂದಿನ ದಿನಗಳಲ್ಲಿ ಅನೇಕರು ಮೀನನ್ನು ತಿನ್ನಲು ಇಷ್ಟಪಡುತ್ತಾರೆ, ಆದರೆ ಮನೆಯಲ್ಲಿ ಅದನ್ನು ಹೇಗೆ ಕ್ಲೀನ್ ಮಾಡಬೇಕು ಎಂಬುದು ಎಲ್ಲರಿಗೂ ತಿಳಿದಿರೋದಿಲ್ಲ. ನಗರಗಳಲ್ಲಿ ಮೀನಿನ ಮಾರುಕಟ್ಟೆಯಿಂದಲೇ ಕಟ್ ಮಾಡಿ, ಸ್ವಚ್ಛಗೊಳಿಸಿದ ಮೀನು ತಂದುಕೊಳ್ಳುವ ಪದ್ಧತಿ ಸಾಮಾನ್ಯವಾಗಿದೆ.
ಹಿಂದೆ ಮೀನು ಹಿಡಿದ ತಕ್ಷಣವೇ ಅವುಗಳನ್ನು ಗಾತ್ರ ಹಾಗೂ ಪ್ರಕಾರದಿಂದ ವಿಂಗಡಿಸಲಾಗುತ್ತಿತ್ತು. ದೊಡ್ಡ ಮೀನುಗಳನ್ನು ವಿಶೇಷ ಊಟಗಳಿಗೆ, ಸಣ್ಣ ಮೀನುಗಳನ್ನು ಹುರಿಯಲು ಅಥವಾ ಬಿಸಿಲಿನಲ್ಲಿ ಒಣಗಿಸಲು ಬಳಸಲಾಗುತ್ತಿತ್ತು. ಉಕ್ಕಿನ ಸ್ಕೇಲರ್‌ಗಳಿಲ್ಲದ ಕಾಲದಲ್ಲಿ, ತೆಂಗಿನ ಚಿಪ್ಪು, ಮೊಂಡಾದ ಚಾಕು ಅಥವಾ ಮರಳನ್ನು ಬಳಸಿಕೊಂಡು ಮೀನಿನ ಪೊರೆಯನ್ನು ತೆಗೆದುಹಾಕಲಾಗುತ್ತಿತ್ತು. ಈ ಕೆಲಸವನ್ನು ಸಾಮಾನ್ಯವಾಗಿ ನೀರಿನ ಮೂಲಗಳ ಬಳಿ ಅಥವಾ ಹೊರಾಂಗಣದಲ್ಲಿ ಮಾಡಲಾಗುತ್ತಿತ್ತು, ಅಡುಗೆ ಮನೆಯೊಳಗಿನ ವಾಸನೆ ತಪ್ಪಿಸಲು.
ಮೀನಿನ ಹೊಟ್ಟೆಯನ್ನು ಸಣ್ಣ ಚಾಕು ಅಥವಾ ಬಿದಿರಿನ ಕೋಲಿನಿಂದ ಸೀಳಿ, ಕರುಳನ್ನು ಕೈಯಿಂದಲೇ ಎಚ್ಚರಿಕೆಯಿಂದ ತೆಗೆಯಲಾಗುತ್ತಿತ್ತು. ಪಿತ್ತಕೋಶ ಹಾನಿಯಾಗದಂತೆ ಜಾಗರೂಕತೆ ವಹಿಸಲಾಗುತ್ತಿತ್ತು, ಏಕೆಂದರೆ ಅದು ಮಾಂಸಕ್ಕೆ ಕಹಿ ರುಚಿ ಕೊಡುತ್ತಿತ್ತು. ಲೋಳೆಯ ಹಾಗೂ ಮೀನಿನ ವಾಸನೆಯನ್ನು ತೆಗೆದುಹಾಕಲು ಬೂದಿ, ಹುಣಸೆಹಣ್ಣಿನ ತಿರುಳು ಅಥವಾ ಉಪ್ಪನ್ನು ಬಳಸಲಾಗುತ್ತಿತ್ತು. ಹುಣಸೆಹಣ್ಣು ಮತ್ತು ಉಪ್ಪಿನಿಂದ ಮೀನನ್ನು ಉಜ್ಜಿದ ಬಳಿಕ ಹಲವಾರು ಬಾರಿ ನೀರಿನಲ್ಲಿ ತೊಳೆಯಲಾಗುತ್ತಿತ್ತು.
ಮೀನುಗಳನ್ನು ಸ್ವಚ್ಛಗೊಳಿಸಿದ ಬಳಿಕ ತಾಜಾ ಆಗಿ ಬೇಯಿಸುವುದೋ ಅಥವಾ ಬಿಸಿಲಿನಲ್ಲಿ ಒಣಗಿಸಿ ಉಪ್ಪಿನೊಂದಿಗೆ ಸಂರಕ್ಷಿಸುವುದೋ ಪದ್ಧತಿಯಾಗಿತ್ತು. ಮಳೆಗಾಲದಲ್ಲಿ ಅಥವಾ ಮೀನುಗಾರಿಕೆ ಸಾಧ್ಯವಾಗದ ಸಂದರ್ಭಗಳಲ್ಲಿ ಇಂತಹ ಒಣ ಮೀನು ಬಹಳ ಉಪಯುಕ್ತವಾಗುತ್ತಿತ್ತು.
ಸಾಂಪ್ರದಾಯಿಕ ಮೀನು ಸ್ವಚ್ಛಗೊಳಿಸುವ ವಿಧಾನಗಳು ಕೇವಲ ಅನುಭವದ ಮಾತಲ್ಲ, ಅದು ಕರಾವಳಿ ಜನರ ಜೀವನಶೈಲಿ ಮತ್ತು ಸಂಸ್ಕೃತಿಯ ಭಾಗ. ಇವು ದೀರ್ಘಕಾಲ ಮೀನು ಸಂರಕ್ಷಣೆ ಹಾಗೂ ಸ್ವಾದ ಕಾಪಾಡುವಲ್ಲಿ ಮಹತ್ವದ ಪಾತ್ರವಹಿಸಿವೆ.
