ಜೀವನದಲ್ಲಿ ಸೋಲು ಅನ್ನೋ ಪದ ಕೇಳಿದಾಗಲೇ ಹಲವರ ಮನಸ್ಸು ಕುಗ್ಗಿಬಿಡುತ್ತೆ. ಭಯದಿಂದ ನಡುಗಿಬಿಡುತ್ತೆ. ನಾವು ಮಾಡಿದ ಪ್ರಯತ್ನ ವ್ಯರ್ಥ ಆಯಿತೇನೋ, ನಮ್ಮಲ್ಲಿ ಸಾಮರ್ಥ್ಯ ಇಲ್ಲವೇನೋ ಅನ್ನೋ ಅನುಮಾನಗಳು ಮನಸ್ಸನ್ನು ಕಾಡುತ್ತವೆ. ಆದರೆ ನಿಜವಾಗಿ ನೋಡಿದರೆ, ಸೋಲು ಅನ್ನೋದು ಅಂತಿಮ ಗುರಿ ಅಲ್ಲ; ಅದು ನಮ್ಮನ್ನು ಮತ್ತಷ್ಟು ಬಲವಾಗಿಸುವ ಒಂದು ಹಂತ ಮಾತ್ರ. ನಾವು ನಿಂತಿರುವ ಜಾಗದಿಂದ ಮುಂದೆ ಹೋಗಬೇಕಾದ ದಾರಿ ಇನ್ನೂ ಇದೆ ಅನ್ನೋದನ್ನ ನೆನಪಿಸುವ ಸಂಕೇತ ಅದು.
ಎಲ್ಲರೂ ಗೆಲ್ಲಬೇಕು ಅಂತ ಬಯಸುತ್ತಾರೆ, ಆದರೆ ಪ್ರತೀ ಗೆಲುವಿನ ಹಿಂದೆ ಅನೇಕ ಸೋಲುಗಳು ಮೌನವಾಗಿ ನಿಂತಿರುತ್ತವೆ. ಒಂದು ಬಾರಿ ತಪ್ಪಿದರೆ, ಅದು ನಮ್ಮನ್ನು ತಪ್ಪು ಮಾಡಿದವರೆಂದು ಗುರುತಿಸುವುದಿಲ್ಲ; ಬದಲಿಗೆ, ಅದೇ ತಪ್ಪನ್ನು ಮತ್ತೆ ಮಾಡದಂತೆ ಕಲಿಸುತ್ತದೆ. ಸೋಲು ನಮಗೆ ಸಹನೆ ಕಲಿಸುತ್ತದೆ, ನಿಜವಾದ ಪ್ರಯತ್ನದ ಅರ್ಥ ಹೇಳುತ್ತದೆ, ಮತ್ತು ನಮ್ಮೊಳಗಿನ ಶಕ್ತಿಯನ್ನು ಪರಿಚಯ ಮಾಡಿಸುತ್ತದೆ.
ಇದನ್ನೂ ಓದಿ:
ಕೆಲವೊಮ್ಮೆ ನಾವು ಸೋತದ್ದರಿಂದ ನಮ್ಮ ಬಗ್ಗೆ ನಾವುನೇ ತಪ್ಪಾಗಿ ಯೋಚಿಸಲು ಶುರುಮಾಡುತ್ತೇವೆ. “ನನ್ನಿಂದ ಆಗೋದಿಲ್ಲ” ಅನ್ನೋ ಭಾವನೆ ನಿಧಾನವಾಗಿ ನಮ್ಮ ಆತ್ಮವಿಶ್ವಾಸವನ್ನು ಕುಗ್ಗಿಸುತ್ತದೆ. ಆದರೆ ನಿಜವಾದ ಬೆಳವಣಿಗೆ ಆಗೋದು ಇದೇ ಸಮಯದಲ್ಲಿ. ಗೆದ್ದಾಗ ನಮಗೆ ಸಂತೋಷ ಸಿಗುತ್ತದೆ, ಆದರೆ ಸೋತಾಗ ಮಾತ್ರ ನಾವು ನಮ್ಮನ್ನು ಅರಿತುಕೊಳ್ಳುತ್ತೇವೆ. ಏನು ತಪ್ಪಾಯಿತು, ಏನು ಬದಲಾಯಿಸಬೇಕು ಅನ್ನೋದನ್ನ ಸ್ಪಷ್ಟವಾಗಿ ಅರ್ಥ ಮಾಡಿಕೊಳ್ಳೋ ಅವಕಾಶ ಸಿಗುತ್ತದೆ.
ಜೀವನದಲ್ಲಿ ಒಂದು ಸೋಲು ಅಂದ್ರೆ ಅದು ಒಂದು ವಿರಾಮ ಮಾತ್ರ, ಅಂತಿಮ ಪಾಯಿಂಟ್ ಅಲ್ಲ. ಒಂದು ದಾರಿ ಮುಚ್ಚಿದರೆ, ಇನ್ನೊಂದು ದಾರಿ ತೆರೆಯೋ ಸಮಯ ಅದು. ಮತ್ತೆ ಎದ್ದು ನಿಲ್ಲೋ ಧೈರ್ಯವೇ ನಮ್ಮ ನಿಜವಾದ ಗೆಲುವು. ಯಾಕಂದ್ರೆ ಮತ್ತೆ ಪ್ರಯತ್ನಿಸದೇ ಬಿಡೋವನೇ ನಿಜವಾಗಿ ಸೋತವನು. ಆದ್ದರಿಂದ, ಸೋಲು ಬಂದಾಗ ಅದನ್ನು ಜೀವನದ ಅಂತ್ಯ ಅಂತ ಭಾವಿಸಬೇಡಿ. ಅದು ನಿಮ್ಮ ಕಥೆಯಲ್ಲಿನ ಒಂದು ಪಾಠದ ಪುಟ ಮಾತ್ರ. ಆ ಪುಟದಿಂದ ಕಲಿತು ಮುಂದಕ್ಕೆ ಹೆಜ್ಜೆ ಹಾಕಿದಾಗಲೇ, ನಾಳೆಯ ಗೆಲುವು ನಿಮ್ಮದಾಗುತ್ತದೆ.
