ಒಂದು ಸಣ್ಣ ಮಾತು… ಒಂದು ಸಣ್ಣ ಘಟನೆ… ಆದರೆ ಅದು ನಿಮ್ಮ ಮನಸ್ಸಿನಲ್ಲಿ ನೂರು ಬಾರಿ ಮರುಕಳಿಸುತ್ತಿದೆಯಾ? ರಾತ್ರಿ ಮಲಗುವಾಗಲೂ ಅದೇ ಯೋಚನೆ, ಬೆಳಿಗ್ಗೆ ಎದ್ದರೂ ಅದೇ ಚಿಂತನೆ ಹೀಗೆ ಮನಸ್ಸೇ ನಿಮ್ಮನ್ನು ಬಿಡದೇ ಹಿಡಿದುಕೊಂಡಿರುವ ಅನುಭವ ಆಗುತ್ತಿದೆಯಾ?
ಹೆಚ್ಚು ಯೋಚಿಸುವುದು ಕೆಲವೊಮ್ಮೆ ಜವಾಬ್ದಾರಿತನವಾಗಿ ಕಾಣಬಹುದು. “ನಾನು ಎಚ್ಚರಿಕೆಯಿಂದಿದ್ದೇನೆ” ಎಂದು ನಾವು ನಮ್ಮನ್ನೇ ಸಮಾಧಾನಪಡಿಸಿಕೊಳ್ಳುತ್ತೇವೆ. ಆದರೆ ನಿಜವಾಗಿ ನೋಡಿದರೆ, ಅದು ನಮ್ಮ ಶಾಂತಿಯನ್ನು ನಿಧಾನವಾಗಿ ಕದಿಯುವ ಅಭ್ಯಾಸ. ಆಗದೇ ಇರುವ ವಿಷಯಕ್ಕೂ ನಾವು ಕಥೆ ಕಟ್ಟುತ್ತೇವೆ. ಇನ್ನೊಬ್ಬರು ಹೇಳದ ಮಾತಿಗೂ ಅರ್ಥ ಹುಡುಕುತ್ತೇವೆ. ಭವಿಷ್ಯದಲ್ಲಿ ಸಂಭವಿಸದ ಸಮಸ್ಯೆಗಳಿಗೂ ಈಗಲೇ ಆತಂಕ ಪಡುತ್ತೇವೆ.
ಇದನ್ನೂ ಓದಿ:
ಹೆಚ್ಚು ಯೋಚನೆ ಸಮಸ್ಯೆಯನ್ನು ಪರಿಹರಿಸುವುದಿಲ್ಲ. ಅದು ಸಮಸ್ಯೆಯನ್ನು ದೊಡ್ಡದಾಗಿ ಕಾಣಿಸುತ್ತದೆ ಅಷ್ಟೇ. ಮನಸ್ಸು ಅತಿಯಾಗಿ ಓಡಿದಾಗ, ಕ್ಷಣಕ್ಕೊಂದು ವಿರಾಮ ಕೊಡಿ. ಆಳವಾಗಿ ಉಸಿರೆಳೆದುಕೊಳ್ಳಿ. “ಇದು ನಿಜವಾಗಿಯೇ ಸಮಸ್ಯೆಯಾ, ಅಥವಾ ನನ್ನ ಕಲ್ಪನೆಯಾ?” ಎಂದು ನಿಮ್ಮನ್ನೇ ಕೇಳಿ.
ಎಲ್ಲ ಪ್ರಶ್ನೆಗಳಿಗೆ ಉತ್ತರ ಬೇಕಾಗಿಲ್ಲ. ಕೆಲವೊಮ್ಮೆ ವಿಷಯಗಳನ್ನು ಹಾಗೆಯೇ ಬಿಡುವುದು ಕೂಡ ಜಾಣತನ. ಜೀವನದಲ್ಲಿ ಎಲ್ಲವನ್ನೂ ನಿಯಂತ್ರಿಸಲು ಸಾಧ್ಯವಿಲ್ಲ. ಆದರೆ ನಮ್ಮ ಪ್ರತಿಕ್ರಿಯೆಯನ್ನು ನಿಯಂತ್ರಿಸಲು ಸಾಧ್ಯ.
ಮನಸ್ಸು ದಣಿದಾಗ ಅದಕ್ಕೆ ವಿಶ್ರಾಂತಿ ಬೇಕು ವಿಶ್ಲೇಷಣೆ ಅಲ್ಲ. ಯಾಕೆಂದರೆ ಹೆಚ್ಚು ಯೋಚನೆ ನಮ್ಮನ್ನು ಸುರಕ್ಷಿತವಾಗಿಡುವುದಿಲ್ಲ… ಅದು ಕೇವಲ ನಮ್ಮ ಶಾಂತಿಯನ್ನು ದೂರ ಮಾಡುತ್ತದೆ.
