ಹೊಸದಿಗಂತ ಡಿಜಿಟಲ್ ಡೆಸ್ಕ್:
ರಾಜ್ಯದಲ್ಲಿ ಒಂದೆಡೆ ವಿದ್ಯುತ್ ಬಿಲ್ ಏರಿಕೆ ಕುರಿತು ದಿನೇ ದಿನೇ ವಾಕ್ಸಮರ ನಡೆಯುತ್ತಿದ್ದು, ಇದರ ಮದ್ಯೆ ಮನೆಯೊಂದಕ್ಕೆ 7 ಲಕ್ಷ ರೂಪಾಯಿ ಕರೆಂಟ್‌ ಬಿಲ್ ಪಾವತಿಸುವಂತೆ (ಮೆಸ್ಕಾಂ) ಸಿಬ್ಬಂದಿ ಬಿಲ್ ಕೊಟ್ಟು ಹೋಗಿದ್ದು, ಮನೆ ಮಂದಿಗೆ ಸಿಡಿಲು ಬಡಿದಂತಾಗಿದೆ .
ಹೌದು, ದಕ್ಷಿಣ ಕನ್ನಡ ಜಿಲ್ಲೆಯ ಮಂಗಳೂರು ಹೊರವಲಯ ಉಳ್ಳಾಲ ಬೈಲಿನ , ಮಂಗಳೂರು ವಿದ್ಯುತ್ ಸರಬರಾಜು ಕಂಪನಿ ನಿಗಮಿತ (ಮೆಸ್ಕಾಂ) ಉಳ್ಳಾಲ ಉಪ ವಿಭಾಗ ವ್ಯಾಪ್ತಿಯ ಮನೆಯೊಂದಕ್ಕೆ ರೂ.7.7 ಲಕ್ಷ ರೂ. ವಿದ್ಯುತ್ ಬಿಲ್ ಬಂದಿದ್ದು, ಬಿಲ್ ಕಂಡ ಮನೆ ಮಾಲೀಕ ಸದಾಶಿವ ಆಚಾರ್ಯ ಶಾಕ್‌ಗೆ ಒಳಗಾಗಿದ್ದಾರೆ.
ಪ್ರತೀ ತಿಂಗಳು 3000ರೂ ಒಳಗೆ ವಿದ್ಯುತ್ ಬಿಲ್ಲ್ ಬರುತ್ತಿದ್ದ ಆಚಾರ್ಯ ಅವರ ಮನೆಗೆ ಈ ತಿಂಗಳ ಬಿಲ್ಲ್ ನೀಡಲು ಮೆಸ್ಕಾಂನ ಗುತ್ತಿಗೆ ಪಡೆದ ಸಂಸ್ಥೆಯ ಮೀಟರ್ ರೀಡರ್ ಆಗಮಿಸಿ ಬಿಲ್ಲ್ ನೀಡಿದ್ದರು. ಲಕ್ಷಾಂತರ ಮೊತ್ತದ ಬಿಲ್ ಗಮನಿಸಿದ ಮನೆಮಂದಿಗೆ ದುಬಾರಿ ಬಿಲ್ಲ್ ನೋಡಿ ಶಾಕ್ ಆಗಿದ್ದು,. ಬಿಲ್ ಪಡೆದ ತಕ್ಷಣ ಮನೆಮಂದಿ ರೀಡರ್ ಬಳಿ ವಿಚಾರಿಸಿದಾಗ , ಕಚೇರಿಗೆ ತೆರಳಿ ವಿಚಾರಿಸುವಂತೆ ತಿಳಿಸಿದ್ದಾರೆ.
ವಿದ್ಯುತ್ ಬಿಲ್ ರಿಸಿಪ್ಟಲ್ಲಿ 99,338 ಯೂನಿಟ್ ಖರ್ಚಾಗಿದ್ದು 7,71,072 ರೂಪಾಯಿ ಬಿಲ್ ನಮೂದಿಸಲಾಗಿತ್ತು. ತಕ್ಷಣ ಮನೆಮಂದಿ ಮೆಸ್ಕಾಂನ ಚೆಂಬುಗುಡ್ಡೆ ಶಾಖೆಗೆ ತೆರಳಿ ಮಾಹಿತಿ ನೀಡಿದ್ದು, ಅಧಿಕಾರಿಗಳು ತಕ್ಷಣ ಸ್ಪಂದನೆ ನೀಡಿ ಪರಿಷ್ಕೃತ ಬಿಲ್ ಮನೆಗೆ ಮುಟ್ಟಿಸಿದ್ದಾರೆ
ಏಜೆನ್ಸಿಗಳ ಮುಖಾಂತರ ಬಿಲ್ ಕಲೆಕ್ಷನ್ ಮಾಡಲಾಗುತ್ತದೆ.ಬಿಲ್ಲ್ ರೀಡರ್ ಎಡವಟ್ಟಿನಿಂದ ತಪ್ಪಾಗಿ ವಿದ್ಯುತ್ ಬಿಲ್ ಮುದ್ರಣ ಆಗಿದೆ.ಬಿಲ್ಲಲ್ಲಿ ಲೋಪ ಕಂಡು ಬಂದರೆ ಅದನ್ನು ಗ್ರಾಹಕರಿಗೆ ಕೊಡುವಂತಿಲ್ಲ.ತಕ್ಷಣವೇ ಸದಾಶಿವ ಆಚಾರ್ಯ ಅವರ ಮನೆ ಬಾಗಿಲಿಗೆ ಪರಿಷ್ಕೃತ ಬಿಲ್ ತಲುಪಿಸುವುದಾಗಿ ಹೇಳಿದ್ದು 2,833 ರೂಪಾಯಿಗಳ ಬಿಲ್ ತಲುಪಿಸಲಾಗಿದೆ ಎಂದು ಉಳ್ಳಾಲ ಮೆಸ್ಕಾಂ ಉಪವಿಭಾಗದ ಕಾರ್ಯನಿರ್ವಾಹಕ ಅಭಿಯಂತರ ದಯಾನಂದ ತಿಳಿಸಿದ್ದಾರೆ.
