ಮೇಘಾ, ಬೆಂಗಳೂರು
ಒಂದು ಪುಟ್ಟ ಹಳ್ಳಿಯಲ್ಲಿ, “ಕಾವೇರಿ” ಎಂಬ ಹುಡುಗಿಯಿದ್ದಳು. ಕಾವೇರಿಗೆ ಚಿತ್ರಕಲೆ ಅಂದ್ರೆ ತುಂಬಾ ಇಷ್ಟ. ಆದರೆ, ಅವಳ ಕೈಗಳು ಹುಟ್ಟಿನಿಂದಲೇ ಸ್ವಲ್ಪ ದುರ್ಬಲವಾಗಿದ್ದವು. ಹೀಗಾಗಿ, ಚಿತ್ರ ಬಿಡಿಸುವುದು ಅವಳಿಗೆ ಕಷ್ಟಕರವಾಗಿತ್ತು. ಹಳ್ಳಿಯ ಮಕ್ಕಳೆಲ್ಲಾ ಅವಳನ್ನು “ದುರ್ಬಲ ಕೈಗಳ ಕಾವೇರಿ” ಎಂದು ಹೀಯಾಳಿಸುತ್ತಿದ್ದರು.
ಆದ್ರೆ, ಕಾವೇರಿ ಮಾತ್ರ ತನ್ನ ಕನಸುಗಳನ್ನು ಬಿಡಲಿಲ್ಲ. ಅವಳು ಪ್ರತಿದಿನವೂ ಚಿತ್ರ ಬಿಡಿಸಲು ಪ್ರಯತ್ನಿಸುತ್ತಿದ್ದಳು. ತನ್ನ ದುರ್ಬಲ ಕೈಗಳನ್ನು ಬಲಪಡಿಸಲು ವ್ಯಾಯಾಮ ಮಾಡುತ್ತಿದ್ದಳು. ಅವಳು ಪ್ರಕೃತಿಯ ಸೌಂದರ್ಯವನ್ನು ಗಮನಿಸುತ್ತಾ, ತನ್ನ ಮನಸ್ಸಿನಲ್ಲಿ ಸುಂದರವಾದ ಚಿತ್ರಗಳನ್ನು ರಚಿಸಿಕೊಳ್ಳುತ್ತಿದ್ದಳು.
ಒಂದು ದಿನ, ಹಳ್ಳಿಯಲ್ಲಿ “ಪ್ರಕೃತಿ ಚಿತ್ರಕಲಾ ಸ್ಪರ್ಧೆ” ನಡೆಯಿತು. ಕಾವೇರಿ ಕೂಡಾ ಆ ಸ್ಪರ್ಧೆಯಲ್ಲಿ ಭಾಗವಹಿಸಲು ನಿರ್ಧರಿಸಿದಳು. ಜನರು ಅವಳನ್ನು ನೋಡಿ ನಕ್ಕರು, ಈ ದುರ್ಬಲ ಕೈಗಳಿಂದ ಏನು ಚಿತ್ರ ಬಿಡಿಸುತ್ತಾಳೆ ಎಂದು ಅಪಹಾಸ್ಯ ಮಾಡಿದರು. ಆದರೆ ಕಾವೇರಿ ಮಾತ್ರ ತನ್ನ ಮೇಲೆ ನಂಬಿಕೆ ಇಟ್ಟುಕೊಂಡಳು.
ಸ್ಪರ್ಧೆಯ ದಿನ, ಕಾವೇರಿ ತನ್ನ ದುರ್ಬಲ ಕೈಗಳಿಂದಲೇ ಅದ್ಭುತವಾದ ಚಿತ್ರವೊಂದನ್ನು ಬಿಡಿಸಿದಳು. ಅವಳು ತನ್ನ ಹಳ್ಳಿಯ ಕೆರೆಯ ಸೌಂದರ್ಯವನ್ನು, ಹಕ್ಕಿಗಳ ಚಿಲಿಪಿಲಿಯನ್ನು, ಹೂವುಗಳ ಬಣ್ಣವನ್ನು ತನ್ನ ಚಿತ್ರದಲ್ಲಿ ಜೀವಂತವಾಗಿ ತಂದಿದ್ದಳು. ಆ ಚಿತ್ರವನ್ನು ನೋಡಿದ ಎಲ್ಲರೂ ಒಮ್ಮೆ ಆಶ್ಚರ್ಯಚಕಿತರಾದರು. ಅಷ್ಟೇ ಅಲ್ಲ ಸ್ಪರ್ಧೆಯ ತೀರ್ಪುಗಾರರು ಕಾವೇರಿಯ ಚಿತ್ರಕ್ಕೆ ಮೊದಲ ಬಹುಮಾನ ಕೂಡ ನೀಡಿದರು.
ಕಾವೇರಿ ಅಂದು ತನ್ನ ದುರ್ಬಲ ಕೈಗಳಿಂದಲೂ ಅದ್ಭುತವಾದ ಕೆಲಸವನ್ನು ಮಾಡಬಹುದು ಎಂದು ಎಲ್ಲರಿಗೂ ತೋರಿಸಿಕೊಟ್ಟಳು. ಜನರು ಅವಳನ್ನು ಹೊಗಳಿದರು, ಅವಳನ್ನು “ಅದ್ಭುತ ಕಾವೇರಿ” ಎಂದು ಪ್ರಶಂಸಿದರು.
ಕಾವೇರಿ ಅಂದು ಕಲಿತ ಪಾಠವೆಂದರೆ, “ಮನಸ್ಸು ಬಲವಾಗಿದ್ದರೆ, ಯಾವುದೇ ದುರ್ಬಲತೆಯೂ ಅಡ್ಡಿಯಾಗುವುದಿಲ್ಲ”. ಎಂಬ ಅರಿವು ಅವಳಿಗಾಯಿತು.
ಕಥೆಯ ಸಂದೇಶ:
ಈ ಕಥೆಯು, ಧನಾತ್ಮಕ ಮನಸ್ಸಿನ ಶಕ್ತಿಯನ್ನು ತೋರಿಸುತ್ತದೆ. ನಮ್ಮಲ್ಲಿ ಯಾವುದೇ ದೌರ್ಬಲ್ಯಗಳಿದ್ದರೂ, ನಮ್ಮ ಮನಸ್ಸನ್ನು ಬಲವಾಗಿಟ್ಟುಕೊಂಡು, ಪ್ರಯತ್ನಿಸಿದರೆ, ನಾವು ಏನನ್ನೂ ಸಾಧಿಸಬಹುದು ಎಂದು ತೋರಿಸಿಕೊಡುತ್ತದೆ. ನಮ್ಮ ಕನಸುಗಳನ್ನು ಎಂದಿಗೂ ಬಿಡಬಾರದು, ನಮ್ಮ ಮೇಲೆ ನಮಗೆ ನಂಬಿಕೆ ಇದ್ದರೆ ಎಂತ ಪರಿಸ್ಥಿಯಲ್ಲೂ ಕೂಡ ನಾವು ಯಶಸ್ಸು, ಸಾಧನೆ ಸಾಧಿಸಬಹುದು. ನಿಮ್ಮ ಆಲೋಚನೆಗಿಂತ ದೊಡ್ಡ ಯೋಧ ಇಲ್ಲ, ಆದ್ರೆ ನಿಮ್ಮನ್ನ ನೀವು ಮೊದಲು ಅರ್ಥ ಮಾಡಿಕೊಳ್ಳಬೇಕು ಅಷ್ಟೇ..!
