ಹೊಸದಿಗಂತ ಡಿಜಿಟಲ್ ಡೆಸ್ಕ್:
ವಿಶೇಷ ತೀವ್ರ ಪರಿಷ್ಕರಣೆ (SIR) ಪ್ರಕ್ರಿಯೆಯ ಅರ್ಜಿಗಳಲ್ಲಿ 2002ರ ಸ್ವಯಂ ಹಾಗೂ ಪೋಷಕರ ವಿವರಗಳನ್ನು ಭರ್ತಿ ಮಾಡುವುದು ಕಡ್ಡಾಯವೇನೂ ಅಲ್ಲ ಎಂದು ರಾಜ್ಯ ಮುಖ್ಯ ಚುನಾವಣಾಧಿಕಾರಿ ವಿ. ಅನ್ಬುಕುಮಾರ್ ತಿಳಿಸಿದ್ದಾರೆ. ಹಳೆಯ ದಾಖಲೆಗಳಿಲ್ಲದಿದ್ದರೂ ನಾಗರಿಕರು ನಮೂನೆಯನ್ನು ಸಲ್ಲಿಸಬಹುದು.
ಆನ್ಲೈನ್ ಅರ್ಜಿ ಸಲ್ಲಿಕೆ ಮತ್ತು ದಾಖಲೆಗಳ ಪರಿಶೀಲನೆ
ಸಾರ್ವಜನಿಕರು ಭೌತಿಕ ಅರ್ಜಿಯ ಜತೆಗೆ ಆನ್ಲೈನ್ ಮೂಲಕವೂ ನಮೂನೆ ಭರ್ತಿ ಮಾಡಲು ಅವಕಾಶವಿದೆ. ಅಗತ್ಯ ಬಿದ್ದರೆ, ನಿಗದಿತ 12 ಹಕ್ಕುಪತ್ರಗಳಲ್ಲಿ ಒಂದನ್ನು ನೀಡುವಂತೆ ಮುಂದೆ ನೋಟಿಸ್ ಬರಬಹುದು. ಯಾವ ದಾಖಲೆ ಸಲ್ಲಿಸಬೇಕು ಎಂಬುದನ್ನು ಆಯಾ ಚುನಾವಣಾ ನೋಂದಣಿ ಅಧಿಕಾರಿಗಳು (ERO) ನಿರ್ಧರಿಸಲಿದ್ದಾರೆ. ಆಗಸ್ಟ್ 8, 2026ರೊಳಗೆ ಈ ನಮೂನೆಗಳನ್ನು ಸಲ್ಲಿಸುವುದು ಪ್ರತಿಯೊಬ್ಬ ನಾಗರಿಕನಿಗೂ ಕಡ್ಡಾಯವಾಗಿದೆ.
44 ಲಕ್ಷಕ್ಕೂ ಅಧಿಕ ‘ASDDO’ ಮತದಾರರ ಗುರುತು
ಜುಲೈ 22ರ ಅಂಕಿ-ಅಂಶಗಳ ಪ್ರಕಾರ, ಒಟ್ಟು 44,84,331 (8.09%) ಮತದಾರರು ‘ASDDO’ (ಅನುಪಸ್ಥಿತ, ಸ್ಥಳಾಂತರ, ಮೃತ, ನಕಲಿ ಮತ್ತು ಇತರೆ) ಗುಂಪಿಗೆ ಸೇರಿದ್ದಾರೆ:
- ಸ್ಥಳಾಂತರಗೊಂಡವರು: 26,32,229 (4.75%)
- ಮೃತಪಟ್ಟವರು: 9,81,642 (1.77%)
- ಪತ್ತೆಯಾಗದವರು: 5,87,457 (1.06%)
- ಇತರ ಕಡೆ ನೋಂದಾಯಿತರು: 2,70,659 (0.49%)
- ಇತರರು: 12,344 (0.02%)
ಸ್ಥಳ ಪರಿಶೀಲನೆ ಚುರುಕು
ಈ ಎಲ್ಲಾ ಪ್ರಕರಣಗಳ ಸತ್ಯಾಸತ್ಯತೆ ತಿಳಿಯಲು ಬೂತ್ ಮಟ್ಟದ ಅಧಿಕಾರಿಗಳು (BLO) ‘ಸ್ಪಾಟ್ ಮಹಜರ್’ ನಡೆಸುತ್ತಿದ್ದಾರೆ. ಈ ವೇಳೆ ಸ್ಥಳೀಯ ಏಜೆಂಟರು, ನೆರೆಹೊರೆಯವರು ಹಾಗೂ ಚುನಾವಣಾ ಸಿಬ್ಬಂದಿಯ ಸಹಿಗಳನ್ನು ಸಂಗ್ರಹಿಸಲಾಗುತ್ತಿದೆ.
