ಹೊಸದಿಗಂತ ಡಿಜಟಲ್‌ ಡೆಸ್ಕ್‌
ವೆಸ್ಟ್ ಇಂಡೀಸ್ ವಿರುದ್ಧ ನಡೆಯುತ್ತಿರುವ ಟಿ20 ಸರಣಿಯ 4ನೇ ಪಂದ್ಯದಲ್ಲಿ ಭರ್ಜರಿ ಜಯ ದಾಖಲಿಸಿದ ಭಾರತ ಸರಣಿ ಕೈವಶ ಮಾಡಿಕೊಂಡಿದೆ. ಭಾರತ- ವಿಂಡೀಸ್ ಕದನದಲ್ಲಿ ಹಲವಾರು ದಾಖಲೆಗಳು ನಿರ್ಮಾಣವಾಗಿವೆ. ಅದರಲ್ಲಿಯೂ ಪ್ರಮುಖವಾಗಿ 2ನೇ ಟಿ20 ಕದನದಲ್ಲಿ ವಿಂಡೀಸ್ ಪರವಾಗಿ ಬೌಲಿಂಗ್‌ ನಲ್ಲಿ ಸರ್ವಶ್ರೇಷ್ಠ ಪ್ರದರ್ಶನ ತೋರಿ ದಾಖಲೆ ಬರೆದಿದ್ದ ಬೌಲರ್ ಒಬ್ಬ 4 ನೇ ಟಿ20 ಯಲ್ಲಿ ವಿಂಡೀಸ್ ಪರ ಅತ್ಯಂತ ಕಳಪೆ ಪ್ರದರ್ಶನ ತೋರಿದ ಕುಖ್ಯಾತಿಗೆ ಪಾತ್ರವಾಗಿದ್ದಾನೆ.
ಇಂಹಹದ್ದೊಂದು ದಾಖಲೆ ಬರೆದಿದ್ದು ವಿಂಡೀಸ್ ಬೌಲರ್ ಒಬೆಡ್ ಮೆಕಾಯ್. 2ನೇ T20 ಯಲ್ಲಿ ಅದ್ಭುತ ಸ್ಪೆಲ್‌ ಮಾಡಿದ್ದ ಮೆಕಾಯ್ ಮೆನ್ ಇನ್ ಬ್ಲೂ ಪಡೆಯನ್ನು ಕಾಡಿದ್ದರು. ಆ ಪಂದ್ಯದಲ್ಲಿ 4 ಓವರ್ ಎಸೆದು, 1 ಮೇಡನ್ ಸಹಿತ ಕೇವಲ 17 ರನ್ ನೀಡಿ 6 ವಿಕೆಟ್ ಕಬಳಿಸಿ ಮಿಂಚು ಹರಿಸಿದ್ದರು. ಮೆಕಾಯ್ ಭರ್ಜರಿ ಪ್ರದರ್ಶನದಿಂದ ವಿಂಡೀಸ್ ಗೆಲುವಿನ ನಗೆ ಬೀರಿತ್ತು. ಮೆಕಾಯ್ ಸಾಧನೆ ಟಿ20 ಯಲ್ಲಿ ವೆಸ್ಟ್ ಇಂಡೀಸ್ ಪರವಾಗಿ ಬೌಲರ್ ಒಬ್ಬನ ಸರ್ವಶ್ರೇಷ್ಠ ಪ್ರದರ್ಶನವಾಗಿತ್ತು. ಅಲ್ಲದೇ ಟೀಮ್ ಇಂಡಿಯಾ ವಿರುದ್ದ ಟಿ20 ಯಲ್ಲಿ 6 ಪಡೆದ ಮೊದಲ ವಿಂಡೀಸ್ ಬೌಲರ್ ಎಂಬ ದಾಖಲೆಗೂ ಅವರು ಪಾತ್ರರಾಗಿದ್ದರು.
ಆದರೆ ಶನಿವಾರ ನಡೆದ 4ನೇ ಪಂದ್ಯದಲ್ಲಿ ಎಲ್ಲವೂ ಮೆಕಾಯ್ ವಿರುದ್ಧವಾಗಿ ನಡೆದಿದೆ. ಟೀಂ ಇಂಡಿಯಾ ಬ್ಯಾಟ್ಸ್‌ ಮನ್‌ ಗಳು ಮೆಕಾಯ್ ಎಸೆತಗಳನ್ನು ಮೈದಾನದ ಮೂಲೆ ಮೂಲೆಗೂ ಅಟ್ಟಿದ್ದಾರೆ. 4 ಓವರ್ಗಳಲ್ಲಿ 66 ರನ್ ಚಚ್ಚಿಸಿಕೊಂಡ ಮೆಕಾಯ್ ವೆಸ್ಟ್ ಇಂಡೀಸ್ ಪರವಾಗಿ ಟಿ20 ಯಲ್ಲಿ ಅತ್ಯಧಿಕ ರನ್ ನೀಡಿದ ಬೌಲರ್ ಎಂಬ ಕೆಟ್ಟ ದಾಖಲೆಗೆ ಪಾತ್ರರಾದರು.
ಈ ಹಿಂದೆ ವಿಂಡೀಸ್ ಬೌಲರ್ ಕಿಮೋ ಪೌಲ್ ಅವರು ನ್ಯೂಜಿಲ್ಯಾಂಡ್‌ ವಿರುದ್ಧ ನಾಲ್ಕು ಓವರ್ಗಳಲ್ಲಿ 64 ರನ್‌ಗಳನ್ನು ಬಿಟ್ಟುಕೊಟ್ಟಿದ್ದರು. 2019 ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಶ್ರೀಲಂಕಾದ ಬೌಲರ್ ರಜಿತಾ 75 ರನ್ ಬಿಟ್ಟುಕೊಟ್ಟಿದ್ದು ಟಿ20 ಯಲ್ಲಿ ಅತ್ಯಂತ ದುಬಾರಿ ಸ್ಪೆಲ್‌ ಗಳಲ್ಲಿ ಅಗ್ರಸ್ಥಾನದಲ್ಲಿದೆ.
IND vs WI | 2ನೇ ಟಿ20ಯಲ್ಲಿ 6 ವಿಕೆಟ್ ಕಿತ್ತು ಮಿಂಚಿದ್ದ ಬೌಲರ್ 4ನೇ ಟಿ20ಯಲ್ಲಿ 66 ರನ್ ಚಚ್ಚಿಸಿಕೊಂಡ!
ಈ ಸುದ್ದಿಯನ್ನು ಇತರರ ಜೊತೆಗೂ ಹಂಚಿಕೊಳ್ಳಿ
