ಬದುಕು ಎಂಬುದು ಸದಾ ಚಲಿಸುವ ಗಾಡಿ. ಇಲ್ಲಿ ಕೆಲಸದ ಒತ್ತಡ, ಸಂಬಂಧಗಳ ಜಟಿಲತೆ ಮತ್ತು ನಾಳೆಯ ಚಿಂತೆಗಳು ನಮ್ಮನ್ನು ಸದಾ ಕಾಡುತ್ತಿರುತ್ತವೆ. ಈ ಎಲ್ಲಾ ಗದ್ದಲಗಳ ನಡುವೆ ನಮ್ಮ “ಮನಸ್ಸು” ಎಂಬ ಪುಟ್ಟ ಹಕ್ಕಿ ಹಾರಾಡಲು ಮರೆತು ಹೋಗಿರುತ್ತದೆ.
ನಾವು ಹೆಚ್ಚಾಗಿ ಕಳೆದ ಹೋದ ದಿನಗಳ ಬಗ್ಗೆ ಸಂಕಟಪಡುತ್ತೇವೆ ಅಥವಾ ಬಾರದ ನಾಳೆಯ ಬಗ್ಗೆ ಆತಂಕಪಡುತ್ತೇವೆ. ನೆನಪಿಡಿ, ಹೋದ ಕಾಲ ಮರಳಿ ಬಾರದು, ಬರುವ ಕಾಲ ನಮ್ಮ ಕೈಲಿಲ್ಲ. ನಿಮ್ಮ ಕೈಯಲ್ಲಿರುವುದು ಈ ಕ್ಷಣ ಮಾತ್ರ. ಈ ಕ್ಷಣವನ್ನು ಆನಂದಿಸುವುದೇ ಮನಃಶಾಂತಿಯ ಮೊದಲ ಮೆಟ್ಟಿಲು.
ಬೆಳಿಗ್ಗೆ ಎದ್ದ ಕೂಡಲೇ ಫೋನ್ ನೋಡುವುದು ನಮ್ಮ ಮನಸ್ಸಿನ ಮೇಲೆ ಅನಗತ್ಯ ಒತ್ತಡ ಹೇರುತ್ತದೆ. ದಿನದ ಕನಿಷ್ಠ ಒಂದು ಗಂಟೆಯನ್ನಾದರೂ ಫೋನ್, ಇಂಟರ್ನೆಟ್ನಿಂದ ದೂರವಿರಿ. ಪ್ರಕೃತಿಯನ್ನು ನೋಡಿ, ಹಕ್ಕಿಗಳ ಚಿಲಿಪಿಲಿ ಕೇಳಿ ಅಥವಾ ಸುಮ್ಮನೆ ಕಿಟಕಿಯ ಹೊರಗೆ ನೋಡಿ ಕುಳಿತುಕೊಳ್ಳಿ. ಮೌನಕ್ಕೆ ಅದ್ಭುತ ಶಕ್ತಿಯಿದೆ.
ಹಲವೊಮ್ಮೆ ನಾವು ಇತರರನ್ನು ಮೆಚ್ಚಿಸಲು ನಮ್ಮ ಶಕ್ತಿಗೂ ಮೀರಿ ಕೆಲಸ ಒಪ್ಪಿಕೊಳ್ಳುತ್ತೇವೆ. ಇದು ನಂತರ ನಮಗೆ ಕಿರಿಕಿರಿ ಉಂಟುಮಾಡುತ್ತದೆ. ನಿಮಗೆ ಸಾಧ್ಯವಾಗದ ಅಥವಾ ಇಷ್ಟವಿಲ್ಲದ ವಿಷಯಗಳಿಗೆ ವಿನಯದಿಂದ ‘ಇಲ್ಲ’ ಎಂದು ಹೇಳುವುದು ನಿಮ್ಮ ಮನಸ್ಸಿನ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು.
ನಮ್ಮ ಹತ್ತಿರ ಇಲ್ಲದ ವಸ್ತುಗಳ ಬಗ್ಗೆ ಕೊರಗುವ ಬದಲು, ನಮ್ಮ ಬಳಿ ಇರುವ ಪುಟ್ಟ ಪುಟ್ಟ ಸುಖಗಳ ಬಗ್ಗೆ ದೇವರಿಗೆ ಅಥವಾ ಪ್ರಕೃತಿಗೆ ಧನ್ಯವಾದ ತಿಳಿಸಿ. ದಿನದ ಕೊನೆಯಲ್ಲಿ ಕನಿಷ್ಠ ಮೂರು ಒಳ್ಳೆಯ ವಿಷಯಗಳನ್ನು ನೆನಪಿಸಿಕೊಳ್ಳುವ ಅಭ್ಯಾಸ ಮಾಡಿಕೊಳ್ಳಿ. ಇದು ನಿಮ್ಮ ದೃಷ್ಟಿಕೋನವನ್ನೇ ಬದಲಿಸುತ್ತದೆ.
ಬೇರೆಯವರ ಮೇಲೆ ಕೋಪ ಅಥವಾ ದ್ವೇಷ ಸಾಧಿಸುವುದು ವಿಷವನ್ನು ನಾವೇ ಕುಡಿದು ಬೇರೆಯವರು ಸಾಯಲಿ ಎಂದು ಕಾಯುವಂತೆ! ದ್ವೇಷದ ಭಾರವನ್ನು ಹೊತ್ತು ತಿರುಗುವ ಬದಲು, ಕ್ಷಮಿಸಿಬಿಡಿ. ಕ್ಷಮಿಸುವುದು ಎಂದರೆ ಅವರ ತಪ್ಪು ಸರಿ ಎಂದು ಒಪ್ಪುವುದಲ್ಲ, ಬದಲಾಗಿ ಆ ನೆನಪಿನಿಂದ ನಿಮ್ಮನ್ನು ನೀವು ಮುಕ್ತಗೊಳಿಸಿಕೊಳ್ಳುವುದು.
ನೆನಪಿಡಿ.. ಮನಃಶಾಂತಿ ಎನ್ನುವುದು ಅಂಗಡಿಯಲ್ಲಿ ಸಿಗುವ ವಸ್ತುವಲ್ಲ, ಅದು ನಾವು ದಿನನಿತ್ಯ ರೂಢಿಸಿಕೊಳ್ಳುವ ಒಂದು ಅಭ್ಯಾಸ. ಪ್ರಪಂಚವು ನಿಮ್ಮನ್ನು ಹೇಗೆ ನೋಡುತ್ತದೆ ಎಂಬುವುದಕ್ಕಿಂತ, ನೀವು ನಿಮ್ಮನ್ನು ಹೇಗೆ ನೋಡುತ್ತೀರಿ ಎಂಬುದು ಮುಖ್ಯ. ಇಂದೇ ಶಾಂತಿಯತ್ತ ಒಂದು ಪುಟ್ಟ ಹೆಜ್ಜೆ ಇಡಿ!
