ಅಮೆರಿಕದಲ್ಲಿ ಚೈಯ್ಯಾ ಚೈಯಾ ಹಾಡಿನ ಮೂಲಕ ಪ್ರಧಾನಿ ಮೋದಿಗೆ ಸಿಕ್ಕಿತು ಸ್ವಾಗತ: ಈ ಸುದ್ದಿ ಕೇಳಿ ಶಾರುಖ್ ಖಾನ್ ರಿಯಾಕ್ಷನ್ ಏನು?

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:

ಪ್ರಧಾನಿ ನರೇಂದ್ರ ಮೋದಿಯವರು (PM Narendra Modi) ಅಮೆರಿಕ ಪ್ರವಾಸದ ವೇಳೆ ಶ್ವೇತಭವನಕ್ಕೆ (Whitehouse) ಭೇಟಿ ಕೊಟ್ಟ ಸಂದರ್ಭದಲ್ಲಿ ಅವರಿಗೆ ವಿಶೇಷವಾಗಿ ಸ್ವಾಗತ ಸಿಕ್ಕಿದೆ .

ಅದ್ರಲ್ಲೂ ಬಾಲಿವುಡ್​ ನಟ ಶಾರುಖ್​ ಖಾನ್​ ಅಭಿಯನದ ಚೈಯ್ಯಾ ಚೈಯ್ಯಾ ಹಾಡಿನಿಂದ ಸ್ವಾಗತ ಕೋರಿದ್ದಾರೆ.

ಪೆನ್ಸಿಲ್ವೇನಿಯಾ ವಿಶ್ವವಿದ್ಯಾನಿಲಯದ ಹೆಸರಾಂತ ಕ್ಯಾಪೆಲ್ಲಾ ಗ್ರೂಪ್, ಪೆನ್ ಮಸಾಲಾ, ಪ್ರಧಾನ ಮಂತ್ರಿ ನರೇಂದ್ರ ಮೋದಿಯವರ ಆಗಮನದ ಮೊದಲು ಶ್ವೇತಭವನದಲ್ಲಿ ಈ ಹಾಡನ್ನು ಹಾಡಿದರು. ದಕ್ಷಿಣ ಏಷ್ಯಾದ ಪ್ರತಿಭಾವಂತ ವಿದ್ಯಾರ್ಥಿಗಳನ್ನು ಒಳಗೊಂಡ ಗುಂಪು, ಮೋದಿಯವರಿಗೆ ವಿದ್ಯುಕ್ತ ಸ್ವಾಗತವನ್ನು ಕೋರಲು ಈ ಹಾಡನ್ನು ಆಯ್ದುಕೊಂಡಿದ್ದರು. ಶಾರುಖ್ ಖಾನ್ ಅಭಿನಯದ 1998 ರ ಚಿತ್ರ ‘ದಿಲ್ ಸೇ…’ ಚಿತ್ರದ ‘ಚೈಯ್ಯಾ ಚೈಯಾ’ ಹಾಡು ಅಮೆರಿಕದಲ್ಲಿ ಮೊಳಗಿತು. ಇದರ ಜೊತೆಗೆ ಇನ್ನೂ ಕೆಲವು ಬಾಲಿವುಡ್​ ಹಾಡುಗಳನ್ನು ಅವರು ಹಾಡಿ ರಂಜಿಸಿದರು.

ಈ ವಿಷಯ ತಿಳಿದು ಇದೀಗ ನಟ ಶಾರುಖ್​ ಖಾನ್​ ಖುಷಿಪಟ್ಟಿದ್ದಾರೆ. ತಾವೂ ಆ ಸಂದರ್ಭದಲ್ಲಿ ಅಲ್ಲಿ ಇರಬೇಕಿತ್ತು ಎಂಬ ಇಂಗಿತವನ್ನು ಅವರು ವ್ಯಕ್ತಪಡಿಸಿದ್ದಾರೆ.

ತಮ್ಮ ಅಭಿಮಾನಿಗಳೊಂದಿಗೆ ಸಂಪರ್ಕಿಸಲು ಆಸ್ಕ್​ ಮಿ ಅನಿಥಿಂಗ್​ (Ask me anything) ಎಂಬ ಸೆಷನ್​ ಅನ್ನು ಟ್ವಿಟರ್​ನಲ್ಲಿ ಕೆಲ ಪ್ರಾರಂಭಿಸಿದ್ದಾರೆ.

ಆ ಸೆಷನ್​ನಲ್ಲಿ ನಟ ಅಮೆರಿಕದ ಕುರಿತು ಪ್ರಸ್ತಾಪಿಸಿದ್ದಾರೆ. ಟ್ವಿಟ್ಟರ್‌ನಲ್ಲಿ ಆಸ್ಕ್ ಮಿ ಎನಿಥಿಂಗ್ ಸೆಷನ್‌ನಲ್ಲಿ, ಎಸ್‌ಆರ್‌ಕೆ ಅವರ ಅಭಿಮಾನಿಯೊಬ್ಬರು ಕೇಳಿದ ಪ್ರಶ್ನೆಗೆ ಶಾರುಖ್​ (Shahrukh Khan) ಉತ್ತರಿಸಿದರು. ‘ಸರ್ ಚೈಯಾ ಚೈಯ್ಯಾ ಹಾಡಿನ ಮೂಲಕ ಅಮೆರಿಕದಲ್ಲಿ ಮೋದಿಜಿಯನ್ನು ಸ್ವಾಗತಿಸಲಾಯಿತು. ನೀವು ಏನು ಹೇಳಲು ಬಯಸುತ್ತೀರಿ. ಈ ಬಗ್ಗೆ?’ ಎಂದು ಕೇಳಿದಾಗ ಶಾರುಖ್​ ಖಾನ್​, ‘ನಾನೂ ಅಲ್ಲಿ ಇರಬೇಕಿತ್ತು ಎನಿಸುತ್ತಿದೆ. ಅಲ್ಲಿದ್ದರೆ ನಾನು ಆ ಹಾಡಿಗೆ ನೃತ್ಯ ಮಾಡುತ್ತಿದ್ದೆ. ಆದರೆ ಏನು ಮಾಡುವುದು.. ಚೈಯಾ ಚೈಯಾ ಡಾನ್ಸ್​ ಮಾಡಲು ರೈಲನ್ನು ಒಳಗೆ ಬಿಡುತ್ತಿರಲಿಲ್ಲಾ ಅನ್ನಿಸುತ್ತದೆ’ ಎಂದು ತಮಾಷೆ ಮಾಡಿದ್ದಾರೆ. ಇದನ್ನು ಕೇಳಿದ ಫ್ಯಾನ್ಸ್​ ನಗೆಗಡಲಿನಲ್ಲಿ ತೇಲುತ್ತಿದ್ದಾರೆ.