ಹೊಸದಿಗಂತ ಡಿಜಿಟಲ್‌ ಡೆಸ್ಕ್‌:
ರಾಜ್ಯ ರಾಜಕಾರಣದಲ್ಲಿ ಟಾಕ್ ವಾರ್ ಮತ್ತಷ್ಟು ತೀವ್ರವಾಗಿದ್ದು, ಸಿಎಂ ಕುರ್ಚಿ ಬದಲಾವಣೆಯ ಬಗ್ಗೆ ಸ್ಫೋಟಕ ಹೇಳಿಕೆಗಳು ಮುಂದುವರಿದಿವೆ. ಈ ಹಿನ್ನೆಲೆಯಲ್ಲಿ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಭವಿಷ್ಯದ ಕುರಿತು ವಿಪಕ್ಷ ನಾಯಕ ಆರ್ ಅಶೋಕ್ ಭವಿಷ್ಯ ನುಡಿದಿದ್ದು, ಇದಕ್ಕೆ ಡಿಕೆಶಿ ತಿರುಗೇಟು ನೀಡಿದ್ದಾರೆ.
ರಾಜ್ಯದ ರಾಜಕೀಯ ಭವಿಷ್ಯವಾಣಿ ಪ್ರಸ್ತಾಪಿಸಿದ ಆರ್ ಅಶೋಕ್, “ಡಿಕೆ ಶಿವಕುಮಾರ್ ಜಾತಕದಲ್ಲಿ ಗುರು, ಶುಕ್ರ, ಶನಿ ಇದ್ದು, ಸುಮ್ಮನೆ ಫಲ ಕೊಡುವಂತಹ ಸ್ಥಿತಿಯಲ್ಲ. ಅವರಿಗೆ ಯಾವುದೂ ಸುಲಭವಾಗಿ ಸಿಗುವುದಿಲ್ಲ. ನಾರ್ಮಲ್ ಡೆಲಿವರಿ ಆಗೋದು ಸಾಧ್ಯವಿಲ್ಲ, ಸಿಸೇರಿಯನ್ ಆಗಬೇಕು,” ಎಂದು ವ್ಯಂಗ್ಯವಾಡಿದರು. ದಸರಾ ಮೊದಲುವೇ ಸಿಎಂ ಬದಲಾವಣೆಯಾಗಬಹುದು ಎಂಬ ಸೂಚನೆಯನ್ನು ಅವರು ನೀಡಿದರು.
ಇದಕ್ಕೆ ತಿರುಗೇಟು ನೀಡಿದ ಡಿಕೆ ಶಿವಕುಮಾರ್, “ಅವರು ಜ್ಯೋತಿಷ್ಯ ಕಲಿತಿದ್ರೆ ನನಗೆ ಖುಷಿ. ನಾನು ಕೂಡ ಅವರನ್ನು ಭೇಟಿ ಮಾಡಿ ಕೆಲ ಪ್ರಶ್ನೆ ಕೇಳ್ತೀನಿ. ನನಗೂ ಟೈಮ್ ಕೊಡಿಸಿ,” ಎಂದು ಉತ್ತರಿಸಿದರು. ಅಶೋಕ್ ಅವರ ಭವಿಷ್ಯವಾಣಿ ಶೈಲಿಗೆ ಪ್ರಶ್ನೆ ಹಾಕಿದ ಡಿಕೆಶಿ, ರಾಜಕೀಯದ ಕಡೆಗಣನೆಗೆ ಹೀಗೆ ಜಾತಕದ ಭಾಷೆ ಬಳಸುವುದು ಸರಿಯಲ್ಲ ಎಂದು ಸೂಚಿಸಿದರು.
ಈ ನಡುವೆ, ಕಾಂಗ್ರೆಸ್ ಮತ್ತು ಬಿಜೆಪಿ ನಡುವಿನ ರಾಜಕೀಯ ಲವಲವಿಕೆಗೆ ಈ ವಿವಾದ ಮತ್ತಷ್ಟು ಸ್ಪಷ್ಟತೆ ತಂದಿದ್ದು, ಸಿಎಂ ಸ್ಥಾನಕ್ಕೆ ಸಂಬಂಧಿಸಿದಂತೆ ರಾಜಕೀಯ ವಲಯದಲ್ಲಿ ಕುತೂಹಲ ಹೆಚ್ಚಿಸಿದೆ.
