ಹಳೆಯ ಬಟ್ಟೆಗಳನ್ನು ದಾನ ಮಾಡುವುದು ಒಂದು ಉತ್ತಮ ಸಂಸ್ಕೃತಿ. ಇದು ಅಗತ್ಯವಿರುವವರಿಗೆ ಸಹಾಯ ಮಾಡುವ ಹಿತಾಶಯದ ಕಾರ್ಯ. ಆದರೆ ಕೆಲವರು ಹಳೆಯ ನಂಬಿಕೆಗಳ ಪ್ರಕಾರ, ನಾವು ಹೆಚ್ಚು ಕಾಲ ಧರಿಸಿದ ಬಟ್ಟೆಗಳಲ್ಲಿ ನಮ್ಮ ಶಕ್ತಿ ಅಥವಾ ಅದೃಷ್ಟ ಅಡಕವಾಗಿರುತ್ತದೆ ಎಂದು ನಂಬುತ್ತಾರೆ. ಹೀಗಾಗಿ ಇವುಗಳನ್ನು ಯಾರಿಗಾದರೂ ನೀಡುವ ಮೊದಲು ಕೆಲವು ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳಬೇಕು ಎಂಬ ಅಭಿಪ್ರಾಯವೂ ಇದೆ.
ಕೆಲವರು ಹೇಳುವಂತೆ, ದೀರ್ಘಕಾಲ ಧರಿಸಿದ ಬಟ್ಟೆಯಲ್ಲಿ ವ್ಯಕ್ತಿಯ ದೈಹಿಕ ಶಕ್ತಿ ಮತ್ತು ಜೀವನಶೈಲಿ ತಾಗಿಕೊಂಡಿರುತ್ತದೆ. ಹೀಗಾಗಿ ಆ ಬಟ್ಟೆಗಳನ್ನು ನೇರವಾಗಿ ಯಾರಿಗಾದರೂ ಕೊಡುವುದರಿಂದ ಅವರ ಮೇಲೆ ನಕಾರಾತ್ಮಕ ಪರಿಣಾಮ ಬೀರುವ ಸಾಧ್ಯತೆಯಿದೆ ಎಂಬ ನಂಬಿಕೆ ಇದೆ. ಕೆಲವು ಸಂದರ್ಭಗಳಲ್ಲಿ ಹಳೆಯ ಬಟ್ಟೆಗಳನ್ನು ಕೆಟ್ಟ ಉದ್ದೇಶಗಳಿಗೆ ಅಥವಾ ವಾಮಾಚಾರ ಕ್ರಮಗಳಿಗೆ ಬಳಸಬಹುದು ಎಂಬ ಭಯವೂ ಜನರಲ್ಲಿ ಕಂಡುಬರುತ್ತದೆ.
ಹೀಗಾಗಿ ಬಟ್ಟೆಗಳನ್ನು ದಾನ ಮಾಡುವ ಮೊದಲು ಅವುಗಳನ್ನು ಉಪ್ಪು ಬೆರೆಸಿದ ನೀರಿನಲ್ಲಿ ತೊಳೆದು ಒಣಗಿಸುವುದು ಉತ್ತಮ ಎಂದು ಹಿರಿಯರು ಸಲಹೆ ನೀಡುತ್ತಾರೆ. ಇದು ಬಟ್ಟೆಗಳಲ್ಲಿ ಉಳಿದ ಶಕ್ತಿ ಅಥವಾ ನಕಾರಾತ್ಮಕ ಅಂಶಗಳನ್ನು ನಿವಾರಿಸಲು ಸಹಾಯವಾಗುತ್ತದೆ ಎನ್ನುವ ನಂಬಿಕೆ ಇದೆ.
ಬಟ್ಟೆ ದಾನ ಮಾಡುವಾಗ ವೈಜ್ಞಾನಿಕ ಅಥವಾ ಆಧ್ಯಾತ್ಮಿಕ ನಂಬಿಕೆ ಯಾವುದಾದ್ರೂ ಇರಲಿ, ಮುಖ್ಯವಾದದ್ದು – ಸ್ವಚ್ಛತೆ ಮತ್ತು ಪ್ರಾಮಾಣಿಕತೆ. ಶುದ್ಧ ಮನಸ್ಸಿನಿಂದ ಮಾಡಿದ ದಾನವೇ ನಿಜವಾದ ಪುಣ್ಯಕಾರ್ಯ. ಹೀಗಾಗಿ ಬಟ್ಟೆಗಳನ್ನು ಸ್ವಚ್ಛವಾಗಿ ತೊಳೆದು, ಒಣಗಿಸಿ, ಗೌರವದಿಂದ ಅಗತ್ಯವಿರುವವರಿಗೆ ನೀಡುವುದು ಉತ್ತಮ.
