ಚಳಿಗಾಲದ ಸಮಯದಲ್ಲಿ ಬಿಸಿ ಬಿಸಿ ಊಟ ತಿನ್ನೋದು ಎಲ್ಲರಿಗೂ ಇಷ್ಟ. ಆದರೆ ಹಿಂದಿನ ದಿನದ ಉಳಿದ ಆಹಾರವನ್ನು ಮತ್ತೆ ಬಿಸಿ ಮಾಡಿ ತಿನ್ನೋ ಅಭ್ಯಾಸ ಬಹುತೇಕ ಮನೆಗಳಲ್ಲಿ ಸಾಮಾನ್ಯವಾಗಿದೆ. ಸಮಯ ಉಳಿಯುತ್ತದೆ, ವ್ಯರ್ಥ ಕಡಿಮೆಯಾಗುತ್ತದೆ ಎಂಬ ಕಾರಣಕ್ಕೆ ಇದನ್ನು ಸರಳ ಆಯ್ಕೆ ಎಂದುಕೊಳ್ಳುತ್ತಾರೆ. ಆದರೆ ಈ ಅಭ್ಯಾಸದ ಹಿಂದೆ ಆರೋಗ್ಯಕ್ಕೆ ಅಪಾಯಕಾರಿಯಾದ ಅಂಶಗಳು ಅಡಗಿವೆ ಎಂಬುದು ನಿಮಗೆ ಗೊತ್ತೇ?
ಮತ್ತೆ ಬಿಸಿ ಮಾಡಿದ ಆಹಾರದಲ್ಲಿ ಹಲವು ಬ್ಯಾಕ್ಟೀರಿಯಾ ಮತ್ತು ಟಾಕ್ಸಿನ್‌ಗಳು ಉಂಟಾಗುವ ಸಾಧ್ಯತೆ ಇರುತ್ತದೆ. ವಿಶೇಷವಾಗಿ ಅಕ್ಕಿ, ಕೋಸು, ಪಾಲಕ್‌, ಆಲೂಗಡ್ಡೆ ಮತ್ತು ಕೋಳಿ ಮಾಂಸದಂತಹ ಆಹಾರಗಳಲ್ಲಿ ಈ ಅಪಾಯ ಹೆಚ್ಚು. ಆಹಾರವನ್ನು ಬಿಸಿಗೊಳಿಸುವ ಸಮಯದಲ್ಲಿ ಎಲ್ಲ ಬ್ಯಾಕ್ಟೀರಿಯಾ ಸಂಪೂರ್ಣವಾಗಿ ನಾಶವಾಗದಿದ್ದರೆ ಅದು ಆಹಾರ ವಿಷಬಾಧೆ (Food Poisoning) ಉಂಟುಮಾಡಬಹುದು. ಚಳಿಗಾಲದಲ್ಲಿ ದೇಹದ ರೋಗ ನಿರೋಧಕ ಶಕ್ತಿ ತಗ್ಗಿರುವುದರಿಂದ ಈ ಪರಿಣಾಮ ಹೆಚ್ಚು ಗಂಭೀರವಾಗಬಹುದು.
ಆಹಾರವನ್ನು ಮರುಬಿಸಿ ಮಾಡುವಾಗ ಕೇವಲ ಬಿಸಿಯಾಗಿದ್ದರೆ ಸಾಕು ಎನ್ನುವುದಿಲ್ಲ, ಅದು ಸಂಪೂರ್ಣವಾಗಿ ಉಷ್ಣಗೊಂಡಿರಬೇಕು. ಅಡುಗೆ ಮಾಡಿದ ನಂತರ ತಕ್ಷಣ ಫ್ರಿಜ್‌ನಲ್ಲಿ ಇರಿಸುವುದು ಮತ್ತು 24 ಗಂಟೆ ಒಳಗಾಗಿ ಸೇವಿಸುವುದು ಉತ್ತಮ. ಬಿಸಿ ಮಾಡುವಾಗ ಮೈಕ್ರೋವೇವ್‌ನ ಬದಲು ಸ್ಟೌವ್‌ನಲ್ಲಿ ಸಮತಟ್ಟಾಗಿ ಬಿಸಿಗೊಳಿಸುವುದು ಸುರಕ್ಷಿತ.
ಮತ್ತೆ ಬಿಸಿ ಮಾಡಿದ ಆಹಾರ ರುಚಿಯಲ್ಲಿಯೂ ಬದಲಾವಣೆ ತರುತ್ತದೆ. ಅಡುಗೆಯ ಪೌಷ್ಠಿಕಾಂಶವೂ ಕಡಿಮೆಯಾಗುತ್ತದೆ. ಹೀಗಾಗಿ ಹೊಸದಾಗಿ ತಯಾರಿಸಿದ ಆಹಾರವೇ ದೇಹಕ್ಕೆ ಹೆಚ್ಚು ಪೋಷಕ ಹಾಗೂ ಸುರಕ್ಷಿತ.(Disclaimer: ಈ ಲೇಖನವು ಅಂತರ್ಜಾಲ ಮೂಲಗಳಿಂದ ಸಂಗ್ರಹಿಸಿದ ಮಾಹಿತಿಯಾಧಾರಿತವಾಗಿದೆ.)
