ಭಾರತೀಯ ಕುಟುಂಬ ವ್ಯವಸ್ಥೆಯಲ್ಲಿ ಅತ್ತೆ-ಸೊಸೆ ಜಟಾಪಟಿಗಳೆಂದರೆ ಸಾಮಾನ್ಯ. ಪ್ರತಿ ಮನೆಗೊಂದು ಕಥೆ ಇದ್ದೇ ಇರುತ್ತದೆ. ಕೆಲವು ಮನೆಗಳಲ್ಲಿ ಜಗಳಗಳು ಸಣ್ಣ ಮಟ್ಟದಲ್ಲಿ ಮುಗಿಯುತ್ತವೆ, ಇನ್ನು ಕೆಲವೆರಡಲ್ಲಿ ಈ ಜಗಳಗಳು ಎಷ್ಟರ ಮಟ್ಟಿಗೆ ಬೆಳೆಯುತ್ತವೆ ಅಂದ್ರೆ ಬೀದಿಯ ಚರ್ಚೆಯವರೆಗೆ ಹೋಗುತ್ತೆ. ಆದರೆ ಸೊಸೆಯಾದವಳು ಬುದ್ದಿವಂತಿಕೆಯಾಗಿ ಕೆಲ ವಿಷಯಗಳನ್ನು ಪಾಲಿಸಿದರೆ ಇಂತಹ ಮನಸ್ತಾಪಗಳು ಬರದಂತೆ ನೋಡಿಕೊಳ್ಳಬಹುದು.
ತಪ್ಪುಗಳನ್ನು ಒಪ್ಪಿಕೊಳ್ಳಿ, ಬುದ್ಧಿವಂತಿಕೆ ತೋರಿಸಿ: ಯಾರಾದರೂ ತಪ್ಪು ಮಾಡಬಹುದು. ಸೊಸೆ ತಪ್ಪು ಮಾಡಿದರೆ ಅತ್ತೆಗೆ ಕೋಪ ಬರುವುದು ಸಹಜ. ಆದರೆ, ತಪ್ಪನ್ನು ಮುಚ್ಚಿಹಾಕಲು ಪ್ರಯತ್ನಿಸದೆ, ಅದನ್ನು ಒಪ್ಪಿಕೊಂಡು ಪರಿಹಾರ ಕಂಡುಕೊಳ್ಳುವ ಬುದ್ಧಿವಂತಿಕೆಯಿಂದ ವರ್ತಿಸಿದರೆ ಅತ್ತೆಯ ಕೋಪವೂ ತಣ್ಣಗಾಗುತ್ತದೆ. ಈ ದೃಷ್ಟಿಕೋನದಿಂದ ಸಂಬಂಧವೂ ಬಲವಾಗುತ್ತದೆ.
ಗಂಡನ ಬಳಿ ಪ್ರತಿಯೊಂದು ಚಿಕ್ಕ ವಿಷಯವನ್ನೂ ಹೇಳಬೇಡಿ: ಅತ್ತೆ ಏನಾದರೂ ಹೇಳಿದರೆ ಅಥವಾ ಮನೆಯಲ್ಲಿ ಏನಾದರೂ ಜಗಳವಾಯಿತು ಅಂದರೆ ತಕ್ಷಣ ಗಂಡನ ಬಳಿ ಹೋಗಿ ಹೇಳುವುದು ಕೆಲವೊಮ್ಮೆ ಸಂಬಂಧದಲ್ಲಿ ಜಗಳ ಉಂಟುಮಾಡಬಹುದು. ಅಮ್ಮ-ಮಗ ನಡುವಿನ ಸಂಬಂಧವನ್ನು ಕಾಪಾಡಿಕೊಳ್ಳುವುದು ಕೂಡಾ ಸೊಸೆಯ ಜವಾಬ್ದಾರಿ. ಮಾತು-ಮಾತಿನಲ್ಲಿ ತಪ್ಪು ಉಂಟಾಗದಂತೆ ನೇರವಾಗಿ ಅತ್ತೆಯೊಂದಿಗೆ ಮಾತುಕತೆ ನಡೆಸುವುದು ಉತ್ತಮ.
ಎಲ್ಲದಕ್ಕೂ ಕೋಪ ಮಾಡಿಕೊಳ್ಳೋ ನಡವಳಿಕೆ ಬಿಡಿ: ಹಿರಿಯರು ಹೇಳುವ ಮಾತು ಕೆಲವೊಮ್ಮೆ ಕಠಿಣವಾಗಿ ಅನುಭವವಾಗಬಹುದು. ಆದರೆ ಅವರು ಹೇಳುತ್ತಿರುವುದು ಒಳ್ಳೆಯದಕ್ಕಾಗಿ ಎಂಬ ಮನೋಭಾವನೆಯಿಂದ ಕೇಳಿಕೊಂಡರೆ ವ್ಯರ್ಥದ ಕೋಪಕ್ಕೂ ಜಗಳಕ್ಕೂ ದಾರಿ ಮುಚ್ಚಿಹೋಗಬಹುದು. ಸಂಬಂಧ ಉಳಿಸಿಕೊಳ್ಳೋದು ಮೊದಲ ಆದ್ಯತೆ ಆಗಬೇಕು.
ಕೋಪ ಬಂದರೂ ಶಾಂತವಾಗಿ ಉತ್ತರ ಕೊಡಿ: ಅತ್ತೆ ಕೋಪಗೊಂಡು ಏನಾದರೂ ಮಾತು ಹೇಳಿದ್ದಾರೆ ಅಂದ್ರೆ, ಅದಕ್ಕೆ ತಕ್ಷಣ ಕೋಪದಿಂದ ಪ್ರತಿಕ್ರಿಯೆ ನೀಡುವುದು ಸಮಸ್ಯೆಯನ್ನು ಹೆಚ್ಚಿಸುತ್ತದೆ. ಬದಲಿಗೆ ಶಾಂತ ಮನಸ್ಸಿನಿಂದ ಮಾತನಾಡಿ ವಿಷಯವನ್ನು ಬಗೆಹರಿಸಬಹುದು. ಕೋಪದಿಂದ ಸಮಸ್ಯೆಗೆ ಪರಿಹಾರ ಸಿಗುವುದಿಲ್ಲ ಎಂಬುದನ್ನು ಮನನ ಮಾಡಿಕೊಳ್ಳಿ.
ಅತ್ತೆ-ಮಾವನನ್ನು ಹೆತ್ತವರಂತೆ ಗೌರವಿಸಿ: ಸಂಬಂಧವನ್ನು ಉಳಿಸಿಕೊಳ್ಳೋ ಮೂಲಮಂತ್ರವೆಂದರೆ, ಅತ್ತೆ-ಮಾವನನ್ನು ತಮ್ಮ ತಂದೆ-ತಾಯಿಯಂತೆ ನೋಡಿಕೊಳ್ಳುವುದು. ಇಂತಹ ದೃಷ್ಟಿಕೋನಕ್ಕೆ ಬದಲಾವಣೆ ಬಂದರೆ, ಸಂಬಂಧದಲ್ಲಿರುವ ನಂಟುಗಳು ಗಾಢವಾಗುತ್ತವೆ. ಈ ಮೂಲಕ ಮನೆಯ ವಾತಾವರಣ ಶಾಂತಮಯ ಹಾಗೂ ಸಂತೋಷಕರವಾಗಿರುತ್ತದೆ.
ಅತ್ತೆ-ಸೊಸೆಯ ನಡುವಿನ ಜಗಳಗಳು ಇರುವಂತೆಯೇ ಇರುತ್ತವೆ. ಆದರೆ, ಬುದ್ದಿವಂತಿಕೆಯ ವರ್ತನೆಯಿಂದ, ಪರಸ್ಪರ ಸಹನೆ, ಗೌರವದಿಂದ ಈ ಸಂಬಂಧವನ್ನು ಶ್ರೇಷ್ಠವಾಗಿ ರೂಪಿಸಬಹುದು.
