ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಪರಪ್ಪನ ಅಗ್ರಹಾರ ಜೈಲಿನಲ್ಲಿ ಕೈದಿಗಳಿಗೆ ‘ರಾಜಾತಿಥ್ಯ’ ನೀಡಿದ ವೀಡಿಯೋಗಳು ವೈರಲ್ ಆಗಿದ್ದ ಹೈಪ್ರೊಫೈಲ್ ಪ್ರಕರಣಕ್ಕೆ ಸಂಬಂಧಿಸಿದಂತೆ, ನಟ ಧನ್ವೀರ್ ಅವರು ಇಂದು ಎರಡನೇ ಬಾರಿಗೆ ವಿಚಾರಣೆಗೆ ಹಾಜರಾಗುತ್ತಿದ್ದಾರೆ. ಮೊಬೈಲ್ನಿಂದ ವೀಡಿಯೋಗಳು ರವಾನೆಯಾದ ಕುರಿತು ಮಹತ್ವದ ಸುಳಿವು ಲಭ್ಯವಾಗಿರುವ ಹಿನ್ನೆಲೆಯಲ್ಲಿ ಪೊಲೀಸರು ಅವರನ್ನು ಮತ್ತೆ ಕರೆಸಿದ್ದಾರೆ.
ಈ ಮೊದಲು, ವೀಡಿಯೋ ವೈರಲ್ ಪ್ರಕರಣದಲ್ಲಿ ಧನ್ವೀರ್ ಅವರ ಪಾತ್ರದ ಕುರಿತು ಅನುಮಾನ ವ್ಯಕ್ತಪಡಿಸಿದ್ದ ಪೊಲೀಸರು, ಅವರ ಮೊಬೈಲ್ ಫೋನ್ ಅನ್ನು ವಶಪಡಿಸಿಕೊಂಡು ವಿಚಾರಣೆ ನಡೆಸಿದ್ದರು. ಪ್ರಾಥಮಿಕ ಪರಿಶೀಲನೆಯಲ್ಲಿ ಮೊಬೈಲ್ನಲ್ಲಿ ನೇರವಾಗಿ ಯಾವುದೇ ವೀಡಿಯೋಗಳು ಸಿಕ್ಕಿರಲಿಲ್ಲ. ಆದರೆ, ತಾಂತ್ರಿಕ ಮಾಹಿತಿಯ ಪ್ರಕಾರ, ಧನ್ವೀರ್ ಅವರ ಮೊಬೈಲ್ನಿಂದಲೇ ಕೆಲವರಿಗೆ ಈ ವೀಡಿಯೋಗಳು ರವಾನೆಯಾಗಿರುವುದು ಪತ್ತೆಯಾಗಿತ್ತು.
ಈಗ, ಪೊಲೀಸರಿಗೆ ಮೊಬೈಲ್ನ ‘ರಿಟ್ರೀವ್ ರಿಪೋರ್ಟ್’ ಲಭ್ಯವಾಗಿದೆ. ಈ ವರದಿಯು ಧನ್ವೀರ್ ಪಾತ್ರದ ಕುರಿತು ಕೆಲವೊಂದು ಮಹತ್ವದ ಮತ್ತು ನಿರ್ಣಾಯಕ ದಾಖಲೆಗಳನ್ನು ಬಹಿರಂಗಪಡಿಸಿದೆ ಎನ್ನಲಾಗಿದೆ. ಈ ಹೊಸ ಬೆಳವಣಿಗೆಗಳ ಆಧಾರದ ಮೇಲೆ, ನಟ ಧನ್ವೀರ್ ಅವರಿಗೆ ಇಂದು ಎರಡನೇ ಬಾರಿಗೆ ಪರಪ್ಪನ ಅಗ್ರಹಾರದ ಪೊಲೀಸರ ಮುಂದೆ ಹಾಜರಾಗುವಂತೆ ಸೂಚಿಸಲಾಗಿದೆ.
ಇಂದಿನ ವಿಚಾರಣೆಯಲ್ಲಿ ಮೊಬೈಲ್ ರಿಟ್ರೀವ್ ವರದಿ ಮತ್ತು ಪೊಲೀಸರ ಪ್ರಶ್ನೆಗಳಿಗೆ ಧನ್ವೀರ್ ನೀಡುವ ಉತ್ತರಗಳು ನಿರ್ಣಾಯಕವಾಗಲಿವೆ. ಈ ಅಂಶಗಳ ಆಧಾರದ ಮೇಲೆ ನಟನಿಗೆ ಸಂಕಷ್ಟ ಎದುರಾಗಲಿದೆಯೇ ಅಥವಾ ಅವರು ಪ್ರಕರಣದಿಂದ ಹೊರಬರುತ್ತಾರೆಯೇ ಎಂಬುದು ಗೊತ್ತಾಗಲಿದೆ.
