ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಗಾನಕೋಗಿಲೆ ಲತಾ ಮಂಗೇಶ್ಕರ್ ಇಂದು ಪುಣ್ಯಭೂಮಿಯನ್ನಗಲಿ ಒಂದು ವರ್ಷ ಕಳೆದಿದೆ. ಖ್ಯಾತ ಮರಳು ಕಲಾವಿದ ಸುದರ್ಶನ್ ಪಟ್ನಾಯಕ್ ಅವರು ತಮ್ಮ ಕಲೆಯ ಮೂಲಕ ನಿತ್ಯಹರಿದ್ವರ್ಣ ಸಂಗೀತ ಸಾಮ್ರಾಜ್ಞಿ ಲತಾ ಮಂಗೇಶ್ಕರ್ ಅವರ ಮೊದಲ ಪುಣ್ಯತಿಥಿಯಂದು ಅವರಿಗೆ ಗೌರವಪೂರ್ವಕ ಶ್ರದ್ಧಾಂಜಲಿ ಸಲ್ಲಿಸಿದ್ದಾರೆ.
ಒಡಿಶಾದ ಪುರಿ ಬೀಚ್‌ನಲ್ಲಿ ‘ಭಾರತ ರತ್ನ ಲತಾ ಜಿ, ಮೇರಿ ಆವಾಜ್ ಹಿ ಪೆಹೆಚಾನ್ ಹೈ’ ಎಂಬ ಸಂದೇಶದೊಂದಿಗೆ 6 ಅಡಿ ಎತ್ತರದ ಮರಳು ಶಿಲ್ಪವನ್ನು ರಚಿಸಿದ್ದಾರೆ. ಲತಾ ಮಂಗೇಶ್ಕರ್ ಅವರು ಕಳೆದ ವರ್ಷ ಫೆಬ್ರವರಿ 6 ರಂದು ಮುಂಬೈನ ಬ್ರೀಚ್ ಕ್ಯಾಂಡಿ ಆಸ್ಪತ್ರೆಯಲ್ಲಿ 92ನೇ ವಯಸ್ಸಿಗೆ ನಿಧನರಾದರು.
ಲತಾ ಡಿ ಎಂದೂ ಕರೆಯಲ್ಪಡುವ ಲತಾ ಭಾರತದಲ್ಲಿ ಸಂಗೀತಕ್ಕೆ ಸಮಾನಾರ್ಥಕವಾದ ಹೆಸರು. ತನ್ನ ಕೋಗಿಲೆ ಕಂಠದಿಂದ ಇಡೀ ರಾಷ್ಟ್ರವನ್ನು ಕದಲಿಸಿದ ನೈಟಿಂಗೇಲ್‌ ಎನಿಸಿಕೊಂಡಿದ್ದರು. ಸುಮಾರು ಎಂಟು ದಶಕಗಳ ವೃತ್ತಿಜೀವನದೊಂದಿಗೆ, ಭಾರತೀಯ ಸಂಗೀತ ಉದ್ಯಮಕ್ಕೆ ನೀಡಿದ ಕೊಡುಗೆಗಾಗಿ ಭಾರತ ರತ್ನ ಮತ್ತು ದಾದಾ ಸಾಹೇಬ್ ಫಾಲ್ಕೆಯಂತಹ ಪ್ರಶಸ್ತಿಗಳನ್ನು ಪಡೆದಿದ್ದಾರೆ.
