ಬಾಹ್ಯಾಕಾಶದಿಂದ ಭಾರತದ ಮೇಲೆ ಕಣ್ಗಾವಲು: ‘ನಿಸಾರ್’ ಉಡಾವಣೆಗೆ ಇಸ್ರೋ ಸಜ್ಜು!

ಹೊಸದಿಗಂತ ಡಿಜಿಟಲ್ ಡೆಸ್ಕ್: 

ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಮತ್ತು ಅಮೆರಿಕಾದ ಬಾಹ್ಯಾಕಾಶ ಸಂಸ್ಥೆಯ (NASA) ಸಹಯೋಗದಲ್ಲಿ ನಿರ್ಮಿಸಲಾದ ಮೊದಲ ಉಪಗ್ರಹವಾದ ನಾಸಾ – ಇಸ್ರೋ ಸಿಂಥೆಟಿಕ್ ಅಪರೆರ್ಚರ್ ರೇಡಾರ್ ಉಪಗ್ರಹ ( NISAR) ಉಡಾವಣೆಗೆ ಸಿದ್ಧವಾಗಿದೆ.

ಜು. 30ರಂದು ಸಂಜೆ 5:40ಕ್ಕೆ ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಇಸ್ರೋದ ‘ಜಿಎಸ್ ಎಲ್ ವಿ – ಎಫ್ 16’ ರಾಕೆಟ್ ಮೂಲಕ ಇದನ್ನು ಉಡಾವಣೆ ಮಾಡಲಾಗುತ್ತದೆ ಎಂದು ಇಸ್ರೋ ತಿಳಿಸಿದೆ.

2392 ಕೆ.ಜಿ. ತೂಕದ ನಿಸಾರ್, ವಿಶಿಷ್ಟ ಭೂ ವೀಕ್ಷಣಾ ಉಪಗ್ರಹವಾಗಿದೆ. ಇದು ಭೂಮಿಯನ್ನು ಎರಡು ಆವರ್ತನದ ಸಿಂಥೆಟಿಕ್ ಅಪರ್ಚರ್ ರಾಡಾರ್ (ಅಮೆರಿಕದ ಬಾಹ್ಯಾಕಾಶ ಸಂಸ್ಥೆಯ ಎಲ್-ಬ್ಯಾಂಡ್ ಮತ್ತು ಇಸ್ರೋದ ಎಸ್-ಬ್ಯಾಂಡ್) ಮೂಲಕ ವೀಕ್ಷಿಸುವ ಮೊದಲ ಉಪಗ್ರಹ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ನಾಸಾದ 12 ಮೀಟರ್ ತೆರೆದುಕೊಳ್ಳುವ ಮೆಶ್ ರಿಫ್ಲೆಕ್ಟರ್ ಆಂಟೆನಾವನ್ನು ಬಳಸುತ್ತಿದ್ದು, ಇದನ್ನು ಇಸ್ರೋದ ಮಾರ್ಪಡಿಸಿದ I3K ಉಪಗ್ರಹಕ್ಕೆ ಸಂಯೋಜಿಸಲಾಗಿದೆ. ನಿಸಾರ್ ಉಪಗ್ರಹವು SweepSAR ತಂತ್ರಜ್ಞಾನವನ್ನು ಮೊದಲ ಬಾರಿಗೆ ಬಳಸಿಕೊಂಡು 242 ಕಿ.ಮೀ. ವಿಸ್ತಾರದ ವ್ಯಾಪ್ತಿಯಲ್ಲಿ ಮತ್ತು ಉತ್ತಮ ಸ್ಪೇಷಿಯಲ್ ರೆಸಲ್ಯೂಷನ್‌ನೊಂದಿಗೆ ಭೂಮಿಯನ್ನು ಗಮನಿಸುತ್ತದೆ.

ಈ ಉಪಗ್ರಹವು ಇಡೀ ಭೂಗೋಳವನ್ನು ಸ್ಕ್ಯಾನ್ ಮಾಡುವಂಥ ಶಕ್ತಿಯನ್ನು ಹೊಂದಿದೆ. ಎಲ್ಲಾ ಹವಾಮಾನದಲ್ಲೂ, ಹಗಲು-ರಾತ್ರಿ ಭೂಗೋಳವನ್ನು ಸುತ್ತಿ ತಾನು ಸಂಗ್ರಹಿಸಿರುವ ದತ್ತಾಂಶವನ್ನು ಪ್ರತಿ 12 ದಿನಗಳಿಗೊಮ್ಮೆ ಒದಗಿಸುತ್ತದೆ. ಈ ಉಪಗ್ರಹದಿಂದ ಸಿಗುವ ದತ್ತಾಂಶವು ಅನೇಕ ಕೆಲಸಗಳಿಗೆ ಬಳಕೆಯಾಗಲಿದೆ. ತನ್ನ ಭೂಪರಿವೀಕ್ಷಣೆಯಲ್ಲಿ ನಿಸಾರ್ ಉಪಗ್ರಹವು ಭೂಮಿಯ ಮೇಲ್ಮೈಯಲ್ಲಿನ ಸಣ್ಣ ಬದಲಾವಣೆಗಳನ್ನೂ ಪತ್ತೆಹಚ್ಚಬಲ್ಲದು. ಉದಾಹರಣೆಗೆ ನೆಲದ ವಿರೂಪ, ಮಂಜುಗಡ್ಡೆಯ ಚಲನೆ ಮತ್ತು ಕಾಡುಗಳಲ್ಲಿ ಆಗುತ್ತಿರುವ ಬದಲಾವಣೆಗಳು ಇತ್ಯಾದಿಗಳ ಬಗ್ಗೆ ಮಾಹಿತಿ ರವಾನಿಸುತ್ತದೆ.

ವಿಶೇಷವಾಗಿ ಸಾಗರದ ಮೇಲೆ ಏಳುವ ಚಂಡಮಾರುತಗಳ ಬಗ್ಗೆ ನಕ್ಷೆಗಳನ್ನು ತಯಾರಿಸಿ ಅದನ್ನು ಕಳುಹಿಸುತ್ತದೆ. ಇಂಥ ಅಮೂಲ್ಯ ಮಾಹಿತಿಗಳಿಂದ ಇಡೀ ಭಾರತವನ್ನು ಮೇಲ್ಗಡೆಯಿಂದ ಸತತವಾಗಿ ನಿಗಾ ಇಡಲು ಸಾಧ್ಯವಾಗಲಿದೆ.