ಹೊಸದಿಗಂತ ಡಿಜಿಟಲ್ ಡೆಸ್ಕ್:
ವೆಸ್ಟ್ ಇಂಡೀಸ್ ವಿರುದ್ಧದ ಟೆಸ್ಟ್ ಸರಣಿಯನ್ನು 2-0 ಅಂತರದಲ್ಲಿ ಕ್ಲೀನ್ ಸ್ವೀಪ್ ಮಾಡಿದ ನಂತರ, ಟೀಂ ಇಂಡಿಯಾ ಇದೀಗ ಮುಂದಿನ ಮಹತ್ವದ ಸವಾಲಿಗೆ ಸಿದ್ಧವಾಗಿದೆ. ಏಕದಿನ (ODI) ಮತ್ತು ಟಿ20 (T20) ಸರಣಿಗಾಗಿ ಇಡೀ ತಂಡವು ದೆಹಲಿಯಿಂದ ಆಸ್ಟ್ರೇಲಿಯಾಕ್ಕೆ ಪ್ರಯಾಣ ಬೆಳೆಸಿದೆ.
ಚಾಂಪಿಯನ್ಸ್ ಟ್ರೋಫಿಯ ನಂತರ ಮತ್ತೆ ತಂಡಕ್ಕೆ ಮರಳಿರುವ ಹಿರಿಯ ಆಟಗಾರರಾದ ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ, ವಿಮಾನ ನಿಲ್ದಾಣದಲ್ಲಿ ಟೀಂ ಇಂಡಿಯಾದ 28ನೇ ಏಕದಿನ ನಾಯಕನಾಗಿರುವ ಯುವ ತಾರೆ ಶುಭ್ಮನ್ ಗಿಲ್ ಅವರನ್ನು ಬೆನ್ನು ತಟ್ಟಿ, ಪ್ರೀತಿಯ ಅಪ್ಪುಗೆಯ ಮೂಲಕ ಶುಭ ಹಾರೈಸಿದ್ದು ಗಮನ ಸೆಳೆಯಿತು. ನಾಯಕನಿಗೆ ಹಿರಿಯರ ಬೆಂಬಲ ಸಂಪೂರ್ಣವಾಗಿ ಇದೆ ಎನ್ನುವ ಸಂದೇಶವನ್ನು ಈ ಮೂಲಕ ನೀಡಲಾಯಿತು.
ರೋಹಿತ್, ವಿರಾಟ್ ಮತ್ತು ನಾಯಕ ಶುಭ್ಮನ್ ಗಿಲ್ ಹೊರತಾಗಿ, ಶ್ರೇಯಸ್ ಅಯ್ಯರ್, ಅರ್ಷದೀಪ್ ಸಿಂಗ್, ಕೆಎಲ್ ರಾಹುಲ್, ಯಶಸ್ವಿ ಜೈಸ್ವಾಲ್, ವಾಷಿಂಗ್ಟನ್ ಸುಂದರ್, ಧ್ರುವ್ ಜುರೆಲ್, ಹರ್ಷಿತ್ ರಾಣಾ, ನಿತೀಶ್ ಕುಮಾರ್ ರೆಡ್ಡಿ ಮತ್ತು ಪ್ರಸಿದ್ಧ್ ಕೃಷ್ಣ ಸೇರಿದಂತೆ ಪ್ರಮುಖ ಆಟಗಾರರು ಆಸ್ಟ್ರೇಲಿಯಾ ಪ್ರವಾಸಕ್ಕೆ ತೆರಳಿದ್ದಾರೆ.
ಭಾರತದ ಆಸ್ಟ್ರೇಲಿಯಾ ಪ್ರವಾಸದ ವೇಳಾಪಟ್ಟಿ
ಭಾರತದ ಈ ಪ್ರವಾಸವು ಅಕ್ಟೋಬರ್ 19 ರಂದು ಆರಂಭವಾಗಲಿದ್ದು, ಒಟ್ಟು ಎಂಟು ಪಂದ್ಯಗಳ ವೈಟ್-ಬಾಲ್ ಸರಣಿಯನ್ನು ಒಳಗೊಂಡಿದೆ. ಇದರಲ್ಲಿ ಮೂರು ಏಕದಿನ ಪಂದ್ಯಗಳು ಮತ್ತು ಐದು ಪಂದ್ಯಗಳ ಟಿ20 ಸರಣಿ ಇರುತ್ತದೆ.
ಏಕದಿನ ಸರಣಿಯ ವಿವರಗಳು:
ಪಂದ್ಯ ದಿನಾಂಕ ಸ್ಥಳ ಸಮಯ
1 ನೇ ODI ಅಕ್ಟೋಬರ್ 19 ಪರ್ತ್ ಬೆಳಿಗ್ಗೆ 9:00
2 ನೇ ODI ಅಕ್ಟೋಬರ್ 23 ಅಡಿಲೇಡ್ ಬೆಳಿಗ್ಗೆ 9:00
3 ನೇ ODI ಅಕ್ಟೋಬರ್ 25 ಸಿಡ್ನಿ ಬೆಳಿಗ್ಗೆ 9:00
ಟಿ20 ಸರಣಿಯ ವಿವರಗಳು:
ಪಂದ್ಯ ದಿನಾಂಕ ಸ್ಥಳ ಸಮಯ
1 ನೇ T20 ಅಕ್ಟೋಬರ್ 29 ಕ್ಯಾನ್ಬೆರಾ ಮಧ್ಯಾಹ್ನ 1:45
2 ನೇ T20 ಅಕ್ಟೋಬರ್ 31 ಮೆಲ್ಬೋರ್ನ್ ಮಧ್ಯಾಹ್ನ 1:45
3 ನೇ T20 ನವೆಂಬರ್ 2 ಹೋಬಾರ್ಟ್ ಮಧ್ಯಾಹ್ನ 1:45
4 ನೇ T20 ನವೆಂಬರ್ 6 ಗೋಲ್ಡ್ ಕೋಸ್ಟ್ ಮಧ್ಯಾಹ್ನ 1:45
5 ನೇ T20 ನವೆಂಬರ್ 8 ಬ್ರಿಸ್ಬೇನ್ ಮಧ್ಯಾಹ್ನ 1:45
ಈ ಸರಣಿಯಲ್ಲಿ ಗಿಲ್ ನಾಯಕತ್ವದಲ್ಲಿ ಭಾರತ ತಂಡವು ಆಸೀಸ್ ನೆಲದಲ್ಲಿ ಎಂತಹ ಪ್ರದರ್ಶನ ನೀಡುತ್ತದೆ ಎಂದು ಕಾದು ನೋಡಬೇಕಿದೆ.
