ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಇಂಗ್ಲೆಂಡ್ ಕ್ರಿಕೆಟ್ ಬೋರ್ಡ್ ಆಯೋಜಿಸುತ್ತಿರುವ ‘ದಿ ಹಂಡ್ರೆಡ್’ ಲೀಗ್ ಇಂದಿನಿಂದ (ಆಗಸ್ಟ್ 5) ಆರಂಭವಾಗುತ್ತಿದೆ. ಟಿ20 ಮಾದರಿಯ ಚುಟುಕು ಕ್ರಿಕೆಟ್‌ನ ಹೊಸ ಆಯಾಮವನ್ನೇ ತೆರೆದುಕೊಡುವ ಈ ಟೂರ್ನಿಯಲ್ಲಿ ಒಟ್ಟು 8 ತಂಡಗಳು ಕಣಕ್ಕಿಳಿಯಲಿದ್ದು, ಪ್ರತಿ ತಂಡಗಳು 8 ಪಂದ್ಯಗಳನ್ನು ಆಡಲಿವೆ. ನಾಲ್ಕು ಪಂದ್ಯಗಳನ್ನು ಹೋಮ್ ಗ್ರೌಂಡ್‌ನಲ್ಲಿ ಹಾಗೂ ನಾಲ್ಕು ಪಂದ್ಯಗಳನ್ನು ಎದುರಾಳಿ ತಂಡದ ಹೋಮ್ ಗ್ರೌಂಡ್‌ನಲ್ಲಿ ಎದುರಿಸುತ್ತವೆ. ಲೀಗ್ ಫೈನಲ್ ಪಂದ್ಯವು ಆಗಸ್ಟ್ 31 ರಂದು ಲಂಡನ್‌ನ ಲಾರ್ಡ್ಸ್ ಕ್ರೀಡಾಂಗಣದಲ್ಲಿ ನಡೆಯಲಿದೆ.
ದಿ ಹಂಡ್ರೆಡ್ ಲೀಗ್‌ನ ವಿಶೇಷತೆಗಳು
ಟಿ20 ಕ್ರಿಕೆಟ್‌ನಂತೆ 20 ಓವರ್‌ಗಳ ಬದಲು, ‘ದಿ ಹಂಡ್ರೆಡ್’ನಲ್ಲಿ 100 ಎಸೆತಗಳು ಮಾತ್ರ ಇರುತ್ತವೆ. ತಲಾ ಇನ್ನಿಂಗ್ಸ್‌ಗೆ ನೂರೇ ಎಸೆತಗಳಿರುವ ಈ ಲೀಗ್ ಟೂರ್ನಿಗೆ ಅದರಂತೆಯೇ ಹೆಸರಿಡಲಾಗಿದೆ. ಇಲ್ಲಿ ಓವರ್ ಎಂಬ ಲೆಕ್ಕವಿಲ್ಲ. ಬೌಲರ್ ಸತತವಾಗಿ 5 ಅಥವಾ 10 ಎಸೆತಗಳನ್ನು ಎಸೆಯಬಹುದು. ಒಬ್ಬ ಬೌಲರ್‌ಗೆ ಗರಿಷ್ಠ 20 ಎಸೆತಗಳ ಅವಕಾಶವಿದೆ.
ಪ್ರತಿ ಇನ್ನಿಂಗ್ಸ್ ಆರಂಭದಲ್ಲಿ 25 ಎಸೆತಗಳ ಪವರ್‌ಪ್ಲೇ ಲಭ್ಯವಿದೆ, ಈ ಅವಧಿಯಲ್ಲಿ 30 ಯಾರ್ಡ್ ವಲಯದ ಹೊರಗೆ ಕೇವಲ ಇಬ್ಬರು ಫೀಲ್ಡರ್‌ಗಳಿಗೆ ಅವಕಾಶ ಇರುತ್ತದೆ. ಬ್ಯಾಟ್ಸ್‌ಮನ್‌ಗಳು ಪ್ರತಿಯೊಬ್ಬ ಓವರ್‌ನಲ್ಲೇ ಸ್ಟ್ರೈಕ್ ಬದಲಾಯಿಸುವ ಬದಲು, ಇಲ್ಲಿ 10 ಎಸೆತಗಳ ನಂತರ ಮಾತ್ರ ಸ್ಟ್ರೈಕ್ ಬದಲಾಗುತ್ತದೆ.
ಟೂರ್ನಿಯ ಚಾಂಪಿಯನ್‌ಷಿಪ್ ಪ್ರಕ್ರಿಯೆ
8 ತಂಡಗಳಲ್ಲಿ ಟಾಪ್ 3 ತಂಡಗಳು ಅಂತಿಮ ಸುತ್ತಿಗೆ ಲಭ್ಯವಾಗಲಿವೆ. ಟಾಪ್ 1 ತಂಡ ನೇರವಾಗಿ ಫೈನಲ್‌ಗೆ ಪ್ರವೇಶ ಪಡೆಯುತ್ತದೆ. 2ನೇ ಹಾಗೂ 3ನೇ ಸ್ಥಾನಗಳ ತಂಡಗಳು ಎಲಿಮಿನೇಟರ್ ಪಂದ್ಯದಲ್ಲಿ ಎದುರಾಗಲಿದ್ದು, ಅದರಲ್ಲಿ ಗೆದ್ದ ತಂಡ ಫೈನಲ್‌ನಲ್ಲಿ ಟಾಪ್ ತಂಡದ ವಿರುದ್ಧ ಕಣಕ್ಕಿಳಿಯಲಿದೆ.
ಪಾಲ್ಗೊಳ್ಳುವ 8 ತಂಡಗಳು:
ಒವಲ್ ಇನ್ವಿನ್ಸಿಬಲ್ಸ್, ಮ್ಯಾಂಚೆಸ್ಟರ್ ಒರಿಜಿನಲ್ಸ್, ನಾರ್ಥನ್ ಸೂಪರ್ ಚಾರ್ಜರ್ಸ್, ಲಂಡನ್ ಸ್ಪಿರಿಟ್, ಬರ್ಮಿಂಗ್ಹ್ಯಾಮ್ ಫೀನಿಕ್ಸ್, ಸದರ್ನ್ ಬ್ರೇವ್, ಟ್ರೆಂಟ್ ರಾಕೆಟ್ಸ್ ಮತ್ತು ವೆಲ್ಷ್ ಫೈರ್.
ಈ ಟೂರ್ನಿಯಲ್ಲಿ ಇಂಗ್ಲೆಂಡ್‌ನ ಜೊತೆ ಆಸ್ಟ್ರೇಲಿಯಾ, ವೆಸ್ಟ್ ಇಂಡೀಸ್, ಅಫ್ಘಾನಿಸ್ತಾನ ಸೇರಿದಂತೆ ಹಲವು ದೇಶಗಳ ಸ್ಟಾರ್ ಆಟಗಾರರು ಭಾಗವಹಿಸುತ್ತಿದ್ದಾರೆ. ‘ದಿ ಹಂಡ್ರೆಡ್’ ಲೀಗ್ ಕ್ರಿಕೆಟ್ ಪ್ರೇಮಿಗಳಿಗೆ ಹೊಸ ರುಚಿಯನ್ನು ನೀಡಲಿದೆ ಎಂಬುದು ನಿಶ್ಚಿತ.
