ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಆಧುನಿಕ ಜಗತ್ತಿನಲ್ಲಿ ನಾವು ಎಷ್ಟೇ ಮುಂದುವರಿದಿದ್ದರೂ, ಕೆಲವು ವಸತಿ ಸಂಕೀರ್ಣಗಳ ನಿಯಮಗಳು ಮಾತ್ರ ಇನ್ನೂ ‘ಕಲ್ಲು ಯುಗ’ದಲ್ಲಿಯೇ ಇವೆ ಎನ್ನುವುದಕ್ಕೆ ಈ ಘಟನೆಯೇ ಸಾಕ್ಷಿ.
ಇತ್ತೀಚೆಗೆ ಸಾಮಾಜಿಕ ಜಾಲತಾಣವಾದ ‘ಎಕ್ಸ್’ ನಲ್ಲಿ ವಿಡಿಯೋವೊಂದು ಸಖತ್ ವೈರಲ್ ಆಗುತ್ತಿದ್ದು, ಅದನ್ನು ನೋಡಿದ ಯಾರಿಗಾದರೂ ಒಂದು ಕ್ಷಣ ಕಣ್ಣಾಲಿಗಳು ಒದ್ದೆಯಾಗುತ್ತವೆ. ಅದಕ್ಕೆ ಕಾರಣ, ಒಬ್ಬ ಡೆಲಿವರಿ ಬಾಯ್ ಎದುರಿಸಿದ ಅಮಾನವೀಯ ಪರಿಸ್ಥಿತಿ.
ನಗರದ ವಸತಿ ಸಂಕೀರ್ಣವೊಂದಕ್ಕೆ ಪಾರ್ಸೆಲ್ ನೀಡಲು ಬಂದ ಡೆಲಿವರಿ ಬಾಯ್ಗೆ ಅಲ್ಲಿನ ಭದ್ರತಾ ಸಿಬ್ಬಂದಿ ಲಿಫ್ಟ್ ಬಳಸಲು ಅನುಮತಿ ನಿರಾಕರಿಸಿದ್ದಾರೆ. ಅನಿವಾರ್ಯವಾಗಿ, ಬೆನ್ನಿನ ಮೇಲೆ ಅತ್ಯಂತ ಭಾರವಾದ ಪಾರ್ಸೆಲ್ ಅನ್ನು ಹೊತ್ತುಕೊಂಡ ಆತ, ಬರೋಬ್ಬರಿ 6ನೇ ಮಹಡಿಯವರೆಗೆ ಮೆಟ್ಟಿಲುಗಳನ್ನೇ ಹತ್ತಿದ್ದಾನೆ.
ಪಾರ್ಸೆಲ್ ತಲುಪಿಸಿದಾಗ ಆತ ಸುಸ್ತಾಗಿ ಹೋಗಿದ್ದ ರೀತಿ ಮತ್ತು ಆತನ ದೈಹಿಕ ಸ್ಥಿತಿ ನೋಡುಗರಿಗೆ ಸಂಕಟ ತರುವಂತಿದೆ. ಫ್ಲಾಟ್ನ ಒಳಗಿದ್ದ ವ್ಯಕ್ತಿ “ಆರಾಮ್ ಸೇ” ಎಂದು ಹೇಳುವ ಧ್ವನಿ ವಿಡಿಯೋದಲ್ಲಿದೆ.
ಈ ವಿಡಿಯೋ ಹಂಚಿಕೊಂಡವರು ಇದನ್ನು “ಅಮಾನವೀಯ ವರ್ತನೆ” ಎಂದು ಕರೆದಿದ್ದಾರೆ. ನೆಟ್ಟಿಗರು ಈ ಬಗ್ಗೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, ಕಾಮೆಂಟ್ ಬಾಕ್ಸ್ನಲ್ಲಿ ಸಂಕೀರ್ಣದ ನಿಯಮಗಳ ವಿರುದ್ಧ ಕಿಡಿಕಾರಿದ್ದಾರೆ.
ಒಟ್ಟಿನಲ್ಲಿ, ತಮಗೊಂದು ವಸ್ತು ಸುಲಭವಾಗಿ ಸಿಗಲಿ ಎಂದು ಆರ್ಡರ್ ಮಾಡುವ ಗ್ರಾಹಕರು ಮತ್ತು ನಿಯಮದ ಹೆಸರಿನಲ್ಲಿ ಹಿಂಸೆ ನೀಡುವ ಅಪಾರ್ಟ್ಮೆಂಟ್ ಮ್ಯಾನೇಜ್ಮೆಂಟ್ಗಳು ಈ “ಅವಶ್ಯಕ ಸೇವೆ” ನೀಡುವವರ ಬಗ್ಗೆ ಸ್ವಲ್ಪವಾದರೂ ಮಾನವೀಯತೆ ತೋರಬೇಕಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.
