ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಪಾಕಿಸ್ತಾನ ಸೇನಾ ಮುಖ್ಯಸ್ಥ ಆಸಿಮ್ ಮುನೀರ್ ಅವರು ಅಮೆರಿಕಕ್ಕೆ ಭೇಟಿ ನೀಡಿದ ಬಳಿಕ ದೇಶದಲ್ಲಿ ರಾಜಕೀಯ ಕೋಲಾಹಲ ಉಂಟಾಗಿದೆ. ವಾಷಿಂಗ್ಟನ್ನಲ್ಲಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಭೇಟಿಯ ಸಂದರ್ಭದಲ್ಲಿ ಮುನೀರ್ ಅವರು ಪಾಕಿಸ್ತಾನದ ಅಪರೂಪದ ಭೂಮಿಯ ಖನಿಜಗಳನ್ನು ಉಡುಗೊರೆಯಾಗಿ ನೀಡಿದ್ದು, ಇದನ್ನು ಕೆಲವು ರಾಜಕೀಯ ಮುಖಂಡರು ತೀವ್ರವಾಗಿ ಟೀಕಿಸಿದ್ದಾರೆ.
ಅವಾಮಿ ರಾಷ್ಟ್ರೀಯ ಪಕ್ಷದ (ANP) ಅಧ್ಯಕ್ಷ ಹಾಗೂ ಸೆನೆಟರ್ ಐಮಲ್ ವಾಲಿ ಖಾನ್ ಈ ಘಟನೆಗೆ ಸಂಪೂರ್ಣ ವಿರೋಧ ವ್ಯಕ್ತಪಡಿಸಿದ್ದಾರೆ. ಅವರು ಸೇನಾ ಮುಖ್ಯಸ್ಥರು ದೇಶದ ಅಮೂಲ್ಯ ಸಂಪತ್ತುಗಳನ್ನು ಸೇಲ್ಸ್ಮ್ಯಾನ್ನಂತೆ ವಿತರಿಸುತ್ತಿದ್ದಾರೆ ಎಂದು ಟೀಕಿಸಿದ್ದಾರೆ. ಸೆನೆಟ್ನಲ್ಲಿ ಮಾತನಾಡಿದ ಖಾನ್, “ಯಾವ ಸೇನಾ ಮುಖ್ಯಸ್ಥರು ದೇಶದ ಅಪರೂಪದ ಸಂಪತ್ತುಗಳನ್ನು ಇತರ ರಾಷ್ಟ್ರಗಳಿಗೆ ಉಡುಗೊರೆಯಾಗಿ ನೀಡುತ್ತಾರೆ?” ಎಂದು ಪ್ರಶ್ನಿಸಿದ್ದಾರೆ.
ಈ ಭೇಟಿಯ ವೇಳೆ ಪಬ್ಲಿಕ್ ಆಗಿ ಬಿಡುಗಡೆಯಾದ ಫೋಟೋದಲ್ಲಿ, ಮುನೀರ್ ಟ್ರಂಪ್ಗೆ ಖನಿಜಗಳನ್ನು ಹೊತ್ತ ಬ್ರೀಫ್ಕೇಸ್ ನೀಡುತ್ತಿರುವ ದೃಶ್ಯವೂ ವಿಡಂಬನೆಯಾಗಿ ತೋರಿದೆ. ಖಾನ್ ಈ ದೃಶ್ಯವನ್ನು ಒಂದು ಬ್ರಾಂಡೆಡ್ ಅಂಗಡಿಯ ವ್ಯಾಪಾರದ ದೃಶ್ಯಕ್ಕೆ ಹೋಲಿಸಿದ್ದಾರೆ, ಅಲ್ಲಿ ಮ್ಯಾನೇಜರ್ ಮಾತ್ರ ಸುಮ್ಮನೆ ನಿಂತಿದ್ದು, ಸೇಲ್ಸ್ಮ್ಯಾನ್ ಗ್ರಾಹಕರಿಗೆ ಸರಕುಗಳನ್ನು ಮಾರಾಟ ಮಾಡುವಂತೆ ಕಾಣುತ್ತಿದೆ ಎಂದು ವ್ಯಂಗ್ಯ ಮಾಡಿದ್ದಾರೆ.
