ಹೊಸದಿಗಂತ ಡಿಜಿಟಲ್ ಡೆಸ್ಕ್:
ದೇಶೀಯ ಹಾಗೂ ಅಂತರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಸಾರ್ವಕಾಲಿಕ ದಾಖಲೆಗಳನ್ನು ಮುರಿಯುತ್ತಾ ಮುನ್ನುಗ್ಗುತ್ತಿವೆ. ಅಮೂಲ್ಯ ಲೋಹಗಳ ಮೇಲಿನ ಬೇಡಿಕೆ ವಿಪರೀತ ಹೆಚ್ಚಾಗಿದ್ದು, ಹೂಡಿಕೆದಾರರು ಮತ್ತು ಕೈಗಾರಿಕೆಗಳಿಂದ ಇವುಗಳಿಗೆ ಅಪಾರ ಒಲವು ವ್ಯಕ್ತವಾಗಿದೆ.
ಆದರೆ, ಈ ಭಾರಿ ಏರಿಕೆಯ ನಡುವೆಯೇ, ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಗಣನೀಯವಾಗಿ ಕುಸಿಯಬಹುದು ಎಂಬ ವದಂತಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ಚಿನ್ನದ ಬೆಲೆ ಪ್ರಸ್ತುತದ ಸುಮಾರು ರೂ. 13,000 ಸಮೀಪದಿಂದ ರೂ. 8,000-9,000ಕ್ಕೆ ಇಳಿಯಬಹುದು ಎಂದೂ, ಬೆಳ್ಳಿ ಬೆಲೆ ಅರ್ಧದಷ್ಟು ಕುಸಿಯಬಹುದು ಎಂದೂ ಊಹಾಪೋಹಗಳು ಹಬ್ಬಿವೆ.
ಬೆಲೆಗಳು ದಿಢೀರ್ ಹೆಚ್ಚಳವಾಗಿದ್ದು ಏಕೆ?
ಕಳೆದ ಕೆಲ ತಿಂಗಳುಗಳಲ್ಲಿ ಚಿನ್ನ ಮತ್ತು ಬೆಳ್ಳಿ ಬೆಲೆಗಳ ಈ ಅಸ್ವಾಭಾವಿಕ ಏರಿಕೆಗೆ ಮುಖ್ಯ ಕಾರಣಗಳು ಹೀಗಿವೆ:
ಭೌಗೋಳಿಕ-ರಾಜಕೀಯ ಅನಿಶ್ಚಿತತೆ: ಜಾಗತಿಕವಾಗಿ ಹೆಚ್ಚುತ್ತಿರುವ ಅಸ್ಥಿರತೆಯು ಹೂಡಿಕೆದಾರರನ್ನು ಸುರಕ್ಷಿತ ಹೂಡಿಕೆಯಾದ (Safe Haven) ಚಿನ್ನದ ಕಡೆಗೆ ಸೆಳೆದಿದೆ.
ಬೆಳ್ಳಿಯ ಕೈಗಾರಿಕಾ ಬೇಡಿಕೆ: ಬೆಳ್ಳಿಯು ಆಭರಣ ಮಾತ್ರವಲ್ಲದೆ ಕೈಗಾರಿಕೆಗಳಿಗೆ, ವಿಶೇಷವಾಗಿ ಎಲೆಕ್ಟ್ರಾನಿಕ್ಸ್ ಮತ್ತು ಸೌರ ಫಲಕಗಳ ತಯಾರಿಕೆಗೆ ಬೇಕಾಗುವ ಪ್ರಮುಖ ಲೋಹ. ಬೇಡಿಕೆಗೆ ತಕ್ಕಷ್ಟು ಸರಬರಾಜು ಇಲ್ಲದಿರುವುದು ಬೆಳ್ಳಿಯ ಕೊರತೆಗೆ ಕಾರಣವಾಗಿದೆ. ಬೆಳ್ಳಿಯ ಬೆಲೆ ಕೆಲವೇ ತಿಂಗಳುಗಳಲ್ಲಿ ಶೇ. 70ಕ್ಕಿಂತಲೂ ಹೆಚ್ಚಾಗಿದೆ.
ಹೂಡಿಕೆದಾರರ ಒಲವು: ಚಿನ್ನದ ಜೊತೆಗೆ ಬೆಳ್ಳಿ ಮಾರುಕಟ್ಟೆಗೂ ಹೂಡಿಕೆದಾರರು ಮುಗಿಬಿದ್ದಿರುವುದು ಬೆಲೆಯನ್ನು ಗಗನಕ್ಕೇರಿಸಿದೆ.
ಬೆಲೆ ಕುಸಿತದ ಸಾಧ್ಯತೆ ಎಷ್ಟು?
ಈ ಕುರಿತು ಮಾರುಕಟ್ಟೆ ವಿಶ್ಲೇಷಕರು ಬೇರೆಯದೇ ಅಭಿಪ್ರಾಯ ಹೊಂದಿದ್ದಾರೆ. ಜೂಲಿಯಸ್ ಬಾಯರ್ ಸಂಸ್ಥೆಯ ಎಕ್ಸಿಕ್ಯೂಟಿವ್ ಡೈರೆಕ್ಟರ್ ಮಿಲಿಂದ್ ಮುಚ್ಚಾಲ ಅವರ ಪ್ರಕಾರ,
ಚಿನ್ನ: ಚಿನ್ನ ಒಂದು ಸೀಮಿತ ಸಂಪನ್ಮೂಲ ಲೋಹವಾದ್ದರಿಂದ ಇದರ ಬೆಲೆ ತೀಕ್ಷ್ಣವಾಗಿ ಇಳಿಕೆಯಾಗುವ ಸಾಧ್ಯತೆ ಕಡಿಮೆ. ಜಾಗತಿಕ ಪರಿಸ್ಥಿತಿಗಳನ್ನು ಗಮನಿಸಿದರೆ, ಹೆಚ್ಚೆಂದರೆ ಶೇ. 10-20 ರಷ್ಟು ಮಾತ್ರ ಬೆಲೆ ಕಡಿಮೆ ಆಗಬಹುದು. ಒಂದು ವೇಳೆ ಬೆಲೆ ಇಳಿದರೂ, ಅದು ಅಲ್ಪಾವಧಿಗೆ ಮಾತ್ರ. ಬಹಳ ಬೇಗ ಚಿನ್ನದ ಬೆಲೆ ಮತ್ತೆ ಹೊಸ ಎತ್ತರಕ್ಕೆ ಜಿಗಿಯುವ ಅವಕಾಶ ಹೆಚ್ಚು.
ಬೆಳ್ಳಿ: ಬೆಳ್ಳಿ ಮಾರುಕಟ್ಟೆ ಚಿನ್ನಕ್ಕೆ ಹೋಲಿಸಿದರೆ ಚಿಕ್ಕದಾಗಿದ್ದರೂ, ಇದರ ಪ್ರಸಕ್ತ ಬೆಲೆಯುಬ್ಬರಕ್ಕೆ ಮುಖ್ಯ ಕಾರಣ ಹೂಡಿಕೆಗಳೇ ಆಗಿವೆ. ಈ ಹೂಡಿಕೆಗಳು ಮಾರುಕಟ್ಟೆಯಿಂದ ಹೊರನಡೆದರೆ, ಬೆಳ್ಳಿ ಬೆಲೆ ದಿಢೀರ್ ಕುಸಿಯುವ ಸಾಧ್ಯತೆ ಇದೆ. ಆದಾಗ್ಯೂ, ಸೆಂಟ್ರಲ್ ಬ್ಯಾಂಕುಗಳು ಈ ಪ್ರಮಾಣದ ದಿಢೀರ್ ಕುಸಿತಕ್ಕೆ ಅವಕಾಶ ನೀಡದಿರಬಹುದು.
ತಜ್ಞರ ಮತ್ತೊಂದು ಪ್ರಮುಖ ಅಭಿಪ್ರಾಯವೆಂದರೆ, ಬ್ಯಾಂಕ್ ಆಫ್ ಅಮೆರಿಕದಂತಹ ಸಂಸ್ಥೆಗಳು 2026ರ ವೇಳೆಗೆ ಬೆಳ್ಳಿಗೆ ಬೃಹತ್ ಬೆಲೆ ಗುರಿಯನ್ನು ನಿಗದಿಪಡಿಸಿವೆ. ಔನ್ಸ್ಗೆ ಪ್ರಸ್ತುತ ರೂ. 44 ಇರುವ ಬೆಲೆ, 2026ಕ್ಕೆ ರೂ. 65ಕ್ಕೆ ಏರಬಹುದು ಎಂದು ನಿರೀಕ್ಷಿಸಿದೆ. ಅಂದರೆ, ಮುಂದಿನ ವರ್ಷದಲ್ಲಿ ಬೆಳ್ಳಿ ಬೆಲೆ ಶೇ. 50 ರಷ್ಟು ಮತ್ತಷ್ಟು ಹೆಚ್ಚಳ ಆಗುವ ಸಾಧ್ಯತೆಯಿದೆ.
