ಹೊಸ ದಿಗಂತ ಡಿಜಿಟಲ್ ಡೆಸ್ಕ್:
ಭಾರತೀಯ ಸೇನೆಯು ಪಶ್ಚಿಮ ಪ್ರದೇಶದಲ್ಲಿ ತನ್ನ ಯುದ್ಧ ಸಾಮರ್ಥ್ಯಗಳನ್ನು ಹೆಚ್ಚಿಸುವತ್ತ ನಿರಂತರವಾಗಿ ಗಮನಹರಿಸುತ್ತಿದೆ. ಹೀಗಾಗಿ ಈ ತಿಂಗಳು ಅಮೆರಿಕದಿಂದ ಭಾರತಕ್ಕೆ ಅಪಾಚೆ ಹೆಲಿಕಾಪ್ಟರ್‌ಗಳ ಮೊದಲ ಸರಕನ್ನು ಪಡೆಯಬಹುದೆಂದು ನಿರೀಕ್ಷಿಸಲಾಗಿದೆ.
ಭಾರತವು ಈ ಹೆಲಿಕಾಪ್ಟರ್‌ಗಳಿಗಾಗಿ 15 ತಿಂಗಳಿನಿಂದ ಕಾಯುತ್ತಿದೆ. ಅಂತಿಮವಾಗಿ ಅವುಗಳ ಡೆಲಿವರಿ ಶೀಘ್ರದಲ್ಲೇ ಪ್ರಾರಂಭವಾಗುವ ಸಾಧ್ಯತೆಯಿದೆ.
ಅಪಾಚೆ ಸ್ಕ್ವಾಡ್ರನ್ ಅನ್ನು ಮಾರ್ಚ್ 2024 ರಲ್ಲಿ ಜೋಧ್‌ಪುರದಲ್ಲಿ ಸೇನಾ ವಾಯುಯಾನ ದಳವು ಸ್ಥಾಪಿಸಿತು. ಆದರೆ, ಅದರ ರಚನೆಯ ಹೊರತಾಗಿಯೂ, ಸ್ಕ್ವಾಡ್ರನ್‌ನಲ್ಲಿ 15 ತಿಂಗಳವರೆಗೆ ಅಪಾಚೆ ಹೆಲಿಕಾಪ್ಟರ್‌ಗಳು ಸೇವೆಯಲ್ಲಿ ಇದ್ದಿರಲಿಲ್ಲ.
ಭಾರತವು ಅಮೆರಿಕದಿಂದ ಒಟ್ಟು ಆರು ಅಪಾಚೆ AH-64E ಹೆಲಿಕಾಪ್ಟರ್‌ಗಳನ್ನು ಪಡೆಯಲಿದೆ. ಮೊದಲ ಮೂರು ಹೆಲಿಕಾಪ್ಟರ್‌ಗಳು ಕಳೆದ ವರ್ಷ ಮೇ-ಜೂನ್‌ನಲ್ಲಿ ತಲುಪಬೇಕಿತ್ತು. ಆದರೆ, ಅಮೆರಿಕ ತನ್ನ ಡೆಡ್‌ಲೈನ್‌ಗೆ ಬದ್ಧವಾಗಿರಲಿಲ್ಲ. ತಾಂತ್ರಿಕ ಮತ್ತು ಪೂರೈಕೆ ಸಮಸ್ಯೆಗಳನ್ನು ಅಮೆರಿಕ ಉಲ್ಲೇಖಿಸಿದೆ ಎಂದು ರಕ್ಷಣಾ ಸಚಿವಾಲಯದ ಮೂಲಗಳು ಬಹಿರಂಗಪಡಿಸಿವೆ. ಆದರೆ ಈಗ ಭಾರತವು ಈ ತಿಂಗಳಿನಲ್ಲಿ ಮೂರು ಹೆಲಿಕಾಪ್ಟರ್‌ಗಳನ್ನು ಮತ್ತು ವರ್ಷದ ಅಂತ್ಯದ ವೇಳೆಗೆ ಉಳಿದ ಮೂರು ಹೆಲಿಕಾಪ್ಟರ್‌ಗಳನ್ನು ಪಡೆಯುವ ನಿರೀಕ್ಷೆಯಿದೆ.
2020 ರಲ್ಲಿ, ಅಮೆರಿಕ ಮತ್ತು ಭಾರತ ಆರು ಅಪಾಚೆ AH-64E ಅಟಾಕ್‌ ಹೆಲಿಕಾಪ್ಟರ್‌ಗಳಿಗಾಗಿ $600 ಮಿಲಿಯನ್‌ಗೆ ಒಪ್ಪಂದಕ್ಕೆ ಸಹಿ ಹಾಕಿದವು. ಈ ಒಪ್ಪಂದದ ಅಡಿಯಲ್ಲಿ, ಅಮೆರಿಕವು ಮೇ-ಜೂನ್ 2024 ರೊಳಗೆ ಆರು ಹೆಲಿಕಾಪ್ಟರ್‌ಗಳನ್ನು ತಲುಪಿಸಬೇಕಾಗಿತ್ತು. ಆದರೆ, ಮೊದಲು ಗಡುವನ್ನು ಡಿಸೆಂಬರ್ 2024 ರವರೆಗೆ ವಿಸ್ತರಿಸಲಾಯಿತು ಮತ್ತು ಈಗ ಮೊದಲ ಸರಕು ಜುಲೈ ಅಂತ್ಯದಲ್ಲಿ ತಲುಪುವ ನಿರೀಕ್ಷೆಯಿದೆ.
ಅಪಾಚೆ ಹೆಲಿಕಾಪ್ಟರ್ ಅಮೆರಿಕ ನಿರ್ಮಿತ ಅತ್ಯಾಧುನಿಕ ಹೆಲಿಕಾಪ್ಟರ್. ಇದನ್ನು ವಿಶ್ವದ ಅತ್ಯಂತ ಮಾರಕ ಅಟಾಕ್‌ ಹೆಲಿಕಾಪ್ಟರ್ ಎಂದು ಪರಿಗಣಿಸಲಾಗಿದೆ. ಇದನ್ನು ಬೋಯಿಂಗ್ ಕಂಪನಿ ತಯಾರಿಸಿದೆ. ಇದರ ವೇಗ ಗಂಟೆಗೆ 280 ಕಿ.ಮೀ.. ಇದು ತನ್ನ ಶತ್ರುಗಳನ್ನು 480 ಕಿ.ಮೀ ದೂರದವರೆಗೆ ಗುರಿಯಾಗಿಸಬಹುದು. ವಿಶೇಷವೆಂದರೆ ಇದು ನೈಟ್‌ ವಿಷನ್‌ ಮತ್ತು ಥರ್ಮಲ್‌ ಸೆನ್ಸಾರ್‌ಗಳನ್ನು ಹೊಂದಿದ್ದು, ಇದರ ಸಹಾಯದಿಂದ ಕೆಟ್ಟ ಹವಾಮಾನ ಮತ್ತು ರಾತ್ರಿಯಲ್ಲಿ ಶತ್ರುಗಳ ವಿರುದ್ಧ ದಾಳಿ ಮಾಡಲ ಸಹಾಯವಾಗುತ್ತದೆ. ಪಾಕಿಸ್ತಾನಕ್ಕೆ ಹೊಂದಿಕೊಂಡಿರುವ ಗಡಿ ಪ್ರದೇಶದಲ್ಲಿ ಈ ಹೆಲಿಕಾಪ್ಟರ್ ಬಹಳ ಮುಖ್ಯ ಎಂದು ರಕ್ಷಣಾ ಮೂಲಗಳು ತಿಳಿಸಿವೆ.
