ಚುಂಬನವನ್ನು ಪ್ರೀತಿಯ ಅಭಿವ್ಯಕ್ತಿಯ ಮೊದಲ ಹಂತವೆಂದು ಹಲವರು ಪರಿಗಣಿಸುತ್ತಾರೆ. ಪ್ರೀತಿಯ ಸಂಬಂಧವನ್ನು ಮತ್ತಷ್ಟು ಗಾಢಗೊಳಿಸುವ ಚುಂಬನವು ಒಲವಿನ ಸಂಕೇತವಾದರೂ, ಇದರೊಂದಿಗೆ ಕೆಲವು ಬಾಯಿಯ ಆರೋಗ್ಯ ಸಮಸ್ಯೆಗಳೂ ಬೆಸೆದುಕೊಳ್ಳುವ ಸಾಧ್ಯತೆ ಇದೆ ಎಂದು ವೈದ್ಯರು ಎಚ್ಚರಿಸುತ್ತಾರೆ. ತುಟಿಗಳು ಮತ್ತು ಬಾಯಿ ನಮ್ಮ ದೇಹದ ಆರೋಗ್ಯದ ಪ್ರಮುಖ ದ್ವಾರವಾಗಿರುವುದರಿಂದ, ಸ್ವಚ್ಛತೆ ಇಲ್ಲದ ಪರಿಸ್ಥಿತಿಯಲ್ಲಿ ಚುಂಬನವು ಸಮಸ್ಯೆಗಳಿಗೆ ಕಾರಣವಾಗಬಹುದು.
ಚುಂಬನದಿಂದ ಉಂಟಾಗುವ ಆರೋಗ್ಯ ಸಮಸ್ಯೆಗಳು
ಬಾಯಿಯಲ್ಲಿ ಲಕ್ಷಾಂತರ ಸೂಕ್ಷ್ಮಾಣುಜೀವಿಗಳು ಅಸ್ತಿತ್ವದಲ್ಲಿವೆ. ಚುಂಬನದ ಸಮಯದಲ್ಲಿ ಅವುಗಳು ವಿನಿಮಯವಾಗುತ್ತವೆ. ಸ್ವಚ್ಛತೆ ಇಲ್ಲದ ಬಾಯಿ ಹೊಂದಿರುವ ವ್ಯಕ್ತಿಯೊಂದಿಗೆ ಚುಂಬಿಸಿದರೆ ರೋಗಕಾರಕ ಬ್ಯಾಕ್ಟಿರಿಯಾಗಳು ಬಾಯಿ ಸೇರುತ್ತವೆ. ಇದರಿಂದ ಒಸಡು, ಹಲ್ಲು ಉದುರುವುದು, ದುರ್ವಾಸನೆ ಮತ್ತು ಇತರ ಸೋಂಕಿನಂತಹ ಸಮಸ್ಯೆಗಳು ಉಂಟಾಗುವ ಸಾಧ್ಯತೆ ಇದೆ.
ತಜ್ಞರ ಅಭಿಪ್ರಾಯದ ಪ್ರಕಾರ, ಕೇವಲ ಚುಂಬನವೇ ಅಪಾಯದ ಮೂಲವಲ್ಲ. ಬಾಯಿ ಸ್ವಚ್ಛತೆ ಕಾಪಾಡದಿದ್ದಾಗ ಮಾತ್ರ ಬ್ಯಾಕ್ಟಿರಿಯಾ ಹರಡುವ ಅಪಾಯ ಹೆಚ್ಚಾಗುತ್ತದೆ. ಉತ್ತಮ ಓರಲ್ ಹೈಜಿನ್ ಪಾಲಿಸಿದರೆ ಈ ಸಮಸ್ಯೆಗಳನ್ನು ಬಹುತೇಕ ತಪ್ಪಿಸಬಹುದು.
ಬಾಯಿಯ ಆರೈಕೆಗೆ ಪಾಲಿಸಬೇಕಾದ ನಿಯಮಗಳು
ದಿನಕ್ಕೆ ಎರಡು ಬಾರಿ ಕನಿಷ್ಠ ಎರಡು ನಿಮಿಷಗಳ ಕಾಲ ಹಲ್ಲು ಬ್ರಶ್ ಮಾಡಬೇಕು.
ನಿತ್ಯ ಒಂದು ಬಾರಿ ಮೌತ್‌ವಾಶ್ ಬಳಸುವುದು ಅಗತ್ಯ.
ನಿಯಮಿತವಾಗಿ ದಂತಪರಿಶೀಲನೆ ಮಾಡಿಸಿಕೊಳ್ಳಬೇಕು.
ಬಾಯಿಯಲ್ಲಿ ಸೋಂಕು ಅಥವಾ ಕೆಂಪು ಒಸಡು ಕಂಡುಬಂದರೆ ತಕ್ಷಣ ಚಿಕಿತ್ಸೆ ಪಡೆಯಬೇಕು.
