ಹೊಸದಿಗಂತ ಡಿಜಿಟಲ್ ಡೆಸ್ಕ್:
ಪ್ರೀತಿ ಎನ್ನುವುದು ಜೀವನದ ಸುಂದರ ಭಾವನೆ. ಆದರೆ, ಅದೇ ಪ್ರೀತಿ ನಮ್ಮ ಮಾನಸಿಕ ನೆಮ್ಮದಿಯನ್ನು ಹಾಳುಮಾಡಿ, ಪ್ರತಿದಿನವೂ ನೋವು ನೀಡಲು ಪ್ರಾರಂಭಿಸಿದರೆ? ಆಗ ನಮಗೆ ಉಳಿಯುವ ಒಂದೇ ಹಾದಿ ಅಲ್ಲಿಂದ ದೂರ ನಡೆಯುವುದು.
ಮಾನಸಿಕವಾಗಿ ಗಟ್ಟಿಯಾಗಿರುವ ಜನರು ಎಂದಿಗೂ ಹಾರ್ಟ್‌ಲೆಸ್ ಅಲ್ಲ. ಅವರಲ್ಲೂ ಅತಿಯಾದ ಪ್ರೀತಿಯಿರುತ್ತದೆ, ನೆನಪುಗಳು ಕಾಡುತ್ತವೆ, ಎದುರಿಗಿರುವ ವ್ಯಕ್ತಿ ಬದಲಾಗಲಿ ಎಂದು ಅಪೇಕ್ಷಿಸುವ ಕಳಕಳಿಯಿರುತ್ತದೆ. ಅಯ್ಯೋ, ಎಲ್ಲವೂ ಮೊದಲಿನಂತೆ ಚಂದವಾಗಿರಬಾರದಿತ್ತೇ? ಎಂಬ ಹಂಬಲ ಅವರ ಮನಸ್ಸಿನ ಮೂಲೆಯಲ್ಲಿ ಸದಾ ಜೀವಂತಿರುತ್ತದೆ. ರಾತ್ರಿ ವೇಳೆ ಕಣ್ಣೀರಿಡುತ್ತಾರೆ, ಹಳೆಯ ಸುಂದರ ಕ್ಷಣಗಳನ್ನು ನೆನೆದು ಕೊರಗುತ್ತಾರೆ. ಆದರೂ, ಅವರು ಆ ಟಾಕ್ಸಿಕ್ ಸಂಬಂಧದಿಂದ ಹೊರಬರಲು ನಿರ್ಧರಿಸುತ್ತಾರೆ.
ಏಕೆಂದರೆ, ಬಲವಾದ ಮನಸ್ಸಿನವರು ತಮ್ಮ ಅರಿವಿನ ಗಡಿಯನ್ನು ಸ್ಪಷ್ಟವಾಗಿ ತಿಳಿದುಕೊಂಡಿರುತ್ತಾರೆ. ಪ್ರೀತಿಯ ಹೆಸರಿನಲ್ಲಿ ತಮ್ಮ ಸ್ವಾಭಿಮಾನವನ್ನು ಬಲಿ ಕೊಡಲು ಅವರು ಎಂದಿಗೂ ಸಿದ್ಧರಿರುವುದಿಲ್ಲ. ಕೇವಲ ಪ್ರೀತಿ ಇದ್ದರೆ ಸಾಲದು, ಅಲ್ಲಿ ಗೌರವ, ನಂಬಿಕೆ ಮತ್ತು ಶಾಂತಿ ಇರಬೇಕು ಎಂಬುದು ಅವರಿಗೆ ಚೆನ್ನಾಗಿ ತಿಳಿದಿರುತ್ತದೆ. ತಮ್ಮ ನಗುವನ್ನು ಕಸಿದುಕೊಳ್ಳುವ, ಪ್ರತಿದಿನವೂ ಮಾನಸಿಕವಾಗಿ ಕುಗ್ಗಿಸುವ ಜಾಗದಲ್ಲಿ ಇರುವುದು ತಮ್ಮದೇ ಆತ್ಮಕ್ಕೆ ಮಾಡುವ ದ್ರೋಹ ಎಂದು ಅವರು ಭಾವಿಸುತ್ತಾರೆ.
ಒಮ್ಮೆ ಯೋಚಿಸಿ ನೋಡಿ
ವಿಷಕಾರಿ ವ್ಯಕ್ತಿಯಿಂದ ದೂರ ಸರಿಯುವುದು ಎಂದರೆ ಅವರ ಮೇಲೆ ದ್ವೇಷ ಸಾಧಿಸುವುದು ಎಂದರ್ಥವಲ್ಲ. ದೂರ ನಿಂತೂ ಅವರ ಒಳಿತಿಗಾಗಿ ಹಾರೈಸಬಹುದು. ತಮ್ಮ ಸ್ವಂತ ಆರೋಗ್ಯಕ್ಕಾಗಿ ದೂರ ಸರಿಯುವುದು ಸ್ವಾರ್ಥವಲ್ಲ, ಅದು ಪ್ರಬುದ್ಧತೆ.
ಹಳೆಯ ಸಿಹಿ ನೆನಪುಗಳು ನೆನಪಾದಾಗ ಮನಸ್ಸು ಹಂಬಲಿಸುವುದು ಸಹಜ. ಆದರೆ ಮಾನಸಿಕವಾಗಿ ಗಟ್ಟಿಯಿರುವವರು ಆ ನೆನಪುಗಳಿಗೆ ಮರುಳಾಗಿ ಮತ್ತೆ ಅದೇ ಕಹಿ ಜೀವನಕ್ಕೆ ಹಿಂತಿರುಗುವುದಿಲ್ಲ.
ಮತ್ತೊಬ್ಬರನ್ನು ಬದಲಾಯಿಸುವುದು ನಮ್ಮ ಕೈಲಿಲ್ಲ, ನಾವು ಬದಲಾಗುವುದು ಮಾತ್ರ ನಮ್ಮ ಕೈಲಿದೆ. ಈ ಸತ್ಯವನ್ನು ಅರಿತುಕೊಂಡಾಗ ಟಾಕ್ಸಿಕ್ ಸಂಬಂಧದಿಂದ ದೂರವಾಗುವುದು ಸುಲಭವಾಗುತ್ತದೆ.
ಕ್ಷಣಿಕ ಪ್ರೀತಿ ಅಥವಾ ಕರುಣೆಗಿಂತ ದೀರ್ಘಾವಧಿಯ ಮಾನಸಿಕ ನೆಮ್ಮದಿ ಮುಖ್ಯ. ಪ್ರತಿದಿನ ಮಾನಸಿಕ ಹಿಂಸೆ ಅನುಭವಿಸುವುದಕ್ಕಿಂತ, ಒಮ್ಮೆ ನೋವಾದರೂ ಸರಿ, ಧೈರ್ಯದಿಂದ ಹೊರಬರುವುದು ಭವಿಷ್ಯಕ್ಕೆ ಒಳ್ಳೆಯದು.
ಟಾಕ್ಸಿಕ್ ಸಂಬಂಧದಲ್ಲಿ ನಿಮ್ಮ ಶಕ್ತಿ, ಸಮಯ ಮತ್ತು ನೆಮ್ಮದಿಯನ್ನು ಹಾಳು ಮಾಡಿಕೊಳ್ಳುವ ಬದಲು, ಅದನ್ನು ನಿಮ್ಮ ಬೆಳವಣಿಗೆಗೆ, ನಿಮ್ಮ ಕನಸುಗಳಿಗೆ ಮತ್ತು ನಿಮ್ಮನ್ನು ನಿಜವಾಗಿ ಗೌರವಿಸುವ ಇತರ ಸಂಬಂಧಗಳಿಗೆ ಬಳಸಿ.
ಜೀವನದಲ್ಲಿ ಕೆಲವು ಬಾಗಿಲುಗಳನ್ನು ಮುಚ್ಚುವುದು ಎಂದರೆ ನಾವು ಸೋತಿದ್ದೇವೆ ಎಂದರ್ಥವಲ್ಲ. ಬದಲಿಗೆ ನಮಗೆ ಅದಕ್ಕಿಂತ ಉತ್ತಮವಾದದ್ದು ಕಾಯುತ್ತಿದೆ ಎಂದರ್ಥ.
ನಿಮ್ಮ ಜೀವನದಲ್ಲಿ ಯಾರಾದರೂ ನಿಮ್ಮ ನೆಮ್ಮದಿಯನ್ನು ಕೆಡಿಸುತ್ತಿದ್ದರೆ, ಅವರ ಮೇಲಿನ ಪ್ರೀತಿ ಅಥವಾ ಕಾಳಜಿ ನಿಮ್ಮನ್ನು ಬಂಧಿಸಿಡದಿರಲಿ. ಪ್ರೀತಿ ಇರಲಿ, ಆದರೆ ಅದು ನಿಮ್ಮ ಉಸಿರನ್ನು ಕಟ್ಟಿಸುವಂತಿರಬಾರದು. ಮಾನಸಿಕವಾಗಿ ದೃಢವಾಗಿರಿ, ನಿಮ್ಮ ನೆಮ್ಮದಿಗೆ ಮೊದಲ ಆದ್ಯತೆ ನೀಡಿ.
