ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ತಿಂಗಳಿಗೆ ಲಕ್ಷ ಲಕ್ಷ ಸಂಬಳ ತರುತ್ತಿದ್ದ ವಿದೇಶಿ ಕೆಲಸಕ್ಕೆ ಗುಡ್‌ಬೈ ಹೇಳಿ, ಮೈಸೂರಿನಲ್ಲಿ ನೆಮ್ಮದಿಯ ಬದುಕು ಕಟ್ಟಿಕೊಂಡ ಭಾರತೀಯ ಯುವಕನ ಸ್ಪೂರ್ತಿದಾಯಕ ಕಥೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ.
ಮನೆಯವರ ವಿರೋಧದ ನಡುವೆಯೂ ಮೂರು ವರ್ಷಗಳ ಹಿಂದೆ ಕತಾರ್‌ನ ಪ್ರತಿಷ್ಠಿತ ಏರ್‌ಲೈನ್ಸ್ ಕೆಲಸವನ್ನು ತೊರೆದು ಬಂದಿದ್ದ ಆದಿತ್ಯ ಸಿಂಗ್, “ನನ್ನ ಈ ನಿರ್ಧಾರಕ್ಕೆ ನನಗೆ ಯಾವುದೇ ಪಶ್ಚಾತ್ತಾಪವಿಲ್ಲ, ಸದ್ಯ ನಾನು ಭಾರತದ ಅತ್ಯಂತ ಸ್ವಚ್ಛ ನಗರಿ ಮೈಸೂರಿನಲ್ಲಿ ಮದುವೆಯಾಗಿ ನೆಮ್ಮದಿಯಿಂದ ನನ್ನದೇ ನಿಯಮಗಳ ಮೇಲೆ ಬದುಕುತ್ತಿದ್ದೇನೆ” ಎಂದು ಸಂತಸ ಹಂಚಿಕೊಂಡಿದ್ದಾರೆ.
ಕೈತುಂಬಾ ಸಂಬಳ ನೀಡುತ್ತಿದ್ದ ವಿದೇಶಿ ಕೆಲಸದ ತ್ಯಾಗ
ಮೂರು ವರ್ಷಗಳ ಹಿಂದೆ ಆದಿತ್ಯ ಅವರು ಕತಾರ್‌ನ ಪ್ರಮುಖ ವಿಮಾನಯಾನ ಸಂಸ್ಥೆಯೊಂದರಲ್ಲಿ ತಿಂಗಳಿಗೆ ಬರೋಬ್ಬರಿ 2.5 ಲಕ್ಷ ರೂಪಾಯಿ ಸಂಬಳ ಪಡೆಯುತ್ತಿದ್ದರು. ಇಷ್ಟೊಂದು ದೊಡ್ಡ ಸಂಬಳದ ಕೆಲಸವನ್ನು ಬಿಟ್ಟು ಭಾರತಕ್ಕೆ ಮರಳುವ ಅವರ ತೀರ್ಮಾನಕ್ಕೆ ಕುಟುಂಬದವರಿಂದ ಯಾವುದೇ ಬೆಂಬಲ ಸಿಗಲಿಲ್ಲ, ಅವರ ನಿರ್ಧಾರ ಮನೆಯವರಿಗೆ ತೀವ್ರ ಅಸಮಾಧಾನ ತಂದಿತ್ತು.
ಕೇವಲ ಹಣದ ಹಿಂದೆ ಓಡುವುದಕ್ಕಿಂತ ಸ್ವಂತ ತಾಯ್ನಾಡಿನಲ್ಲಿ ನೆಮ್ಮದಿಯ ಜೀವನ ನಡೆಸಬೇಕು ಎಂಬ ಹಂಬಲದಿಂದ ಆದಿತ್ಯ ಆ ದೊಡ್ಡ ಕೆಲಸಕ್ಕೆ ರಾಜೀನಾಮೆ ನೀಡಿದ್ದರು.
ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ಹೊಸ ಬದುಕು
ಭಾರತಕ್ಕೆ ಮರಳಿದ ಬಳಿಕ ಆದಿತ್ಯ ಅವರು ಮೈಸೂರನ್ನು ತಮ್ಮ ಹೊಸ ಬದುಕಿನ ತಾಣವಾಗಿ ಆರಿಸಿಕೊಂಡರು. ಮೈಸೂರಿನ ಪ್ರಶಾಂತ ವಾತಾವರಣ ಮತ್ತು ಅಲ್ಲಿನ ಜೀವನ ಶೈಲಿ ತಮಗೆ ಅಪಾರ ಸಂತಸ ನೀಡಿದೆ ಎಂದು ಅವರು ಹೇಳಿದ್ದಾರೆ. “ಮೂರು ವರ್ಷಗಳ ನಂತರ ನನ್ನ ಬದುಕನ್ನು ತಿರುಗಿ ನೋಡಿದರೆ, ನನಗೆ ಮದುವೆಯಾಗಿದೆ, ಭಾರತದ ಅತ್ಯಂತ ಸ್ವಚ್ಛ ಮತ್ತು ಸುಂದರ ನಗರಗಳಲ್ಲಿ ಒಂದಾದ ಮೈಸೂರಿನಲ್ಲಿ ನೆಲೆಸಿದ್ದೇನೆ. ಇಲ್ಲಿನ ಜೀವನದ ಗುಣಮಟ್ಟ ಅದ್ಭುತವಾಗಿದೆ” ಎಂದು ಆದಿತ್ಯ ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ.
ಸವಾಲುಗಳಿದ್ದರೂ ಸಿಕ್ಕಿದೆ ಸ್ವಾತಂತ್ರ್ಯ
ವಿದೇಶಿ ಕೆಲಸ ಬಿಟ್ಟ ತಕ್ಷಣ ಎಲ್ಲವೂ ಸುಲಭವಾಗಿರಲಿಲ್ಲ ಎಂದು ಆದಿತ್ಯ ಒಪ್ಪಿಕೊಳ್ಳುತ್ತಾರೆ. ಪ್ರಸ್ತುತ ಉದ್ಯೋಗದಲ್ಲಿ ಸವಾಲುಗಳಿವೆ, ಐಷಾರಾಮಿಯ ಬದುಕಿಲ್ಲದಿದ್ದರೂ, ನೆಮ್ಮದಿ ಇದೆ. “ಕೆಲವೊಮ್ಮೆ ತಡರಾತ್ರಿಯವರೆಗೂ ಕೆಲಸ ಮಾಡಬೇಕಾದ ದಿನಗಳಿರುತ್ತವೆ. ಆದರೆ ಯಾವುದೇ ಒತ್ತಡವಿಲ್ಲದೆ, ನಮ್ಮದೇ ಇಷ್ಟದಂತೆ ಕೆಲಸ ಮಾಡುವಾಗ ಸಿಗುವ ಸ್ವಾತಂತ್ರ್ಯವೇ ಬೇರೆ. ಈ ಜೀವನಕ್ಕೆ ನಾನು ಸದಾ ಕೃತಜ್ಞ” ಎನ್ನುತ್ತಾರೆ ಆದಿತ್ಯ.
ನೆಟ್ಟಿಗರಿಂದ ಮೆಚ್ಚುಗೆ
ಆದಿತ್ಯ ಅವರ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಲಕ್ಷಾಂತರ ಜನರ ಮನ ಗೆದ್ದಿದ್ದು, ಅನೇಕರು ತಮ್ಮದೇ ಆದ ಅನುಭವಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. “ನಾನು ಸಹ ಕತಾರ್ ಏರ್‌ವೇಸ್‌ನಲ್ಲಿ ಕೆಲಸ ಮಾಡುತ್ತಿದ್ದೆ. ನಾನು ಕೆಲಸ ಬಿಟ್ಟಾಗ ಎಲ್ಲರೂ ತಪ್ಪು ನಿರ್ಧಾರ ಎಂದಿದ್ದರು. ಆದರೆ ಇಂದು ನಾನು ಸ್ವಂತವಾಗಿ ನನ್ನದೇ ಆದ ಸಾಮ್ರಾಜ್ಯ ಕಟ್ಟುತ್ತಿದ್ದೇನೆ” ಎಂದು ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ:
“ನಾನು ಹಡಗಿನಲ್ಲಿ ಕೆಲಸ ಮಾಡುತ್ತೇನೆ, ನಿಮ್ಮ ಮಾತುಗಳು ನನಗೆ ತಟ್ಟಿದವು. ಪಂಜರದಂತಹ ಬದುಕಿಗಿಂತ, ನಮಗೆ ಇಷ್ಟ ಬಂದವರ ಜೊತೆ, ಇಷ್ಟ ಬಂದ ಜಾಗದಲ್ಲಿ ಸ್ವಚ್ಛಂದವಾಗಿ ಇರುವುದೇ ನಿಜವಾದ ಸ್ವಾತಂತ್ರ್ಯ” ಎಂದಿದ್ದಾರೆ.
“ನಮ್ಮ ಬದುಕನ್ನು ಹೊರಗಿನ ಪ್ರಪಂಚದ ಮಾನದಂಡಗಳೊಂದಿಗೆ ಅಳೆಯುವುದರಿಂದ ಎಂದಿಗೂ ಶಾಂತಿ ಸಿಗಲಾರದು. ನೀವು ತಾತ್ಕಾಲಿಕ ಸಂತೋಷದ ಬದಲಾಗಿ ಶಾಶ್ವತ ನೆಮ್ಮದಿಯ ಹಾದಿ ಹಿಡಿದಿದ್ದೀರಿ, ನಿಮಗೆ ಒಳ್ಳೆಯದಾಗಲಿ” ಎಂದು ಹಾರೈಸಿದ್ದಾರೆ.
