ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ದೇಶದ ರೈಲ್ವೆ ಇತಿಹಾಸದಲ್ಲಿ ಮತ್ತೊಂದು ಮಹತ್ವದ ಮೈಲಿಗಲ್ಲು ಸ್ಥಾಪಿತವಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಅವರು ಶನಿವಾರ ವಾರಾಣಸಿ (ಕಾಶಿ) ಮತ್ತು ದೆಹಲಿ ನಡುವೆ ಸಂಚರಿಸಲಿರುವ ದೇಶದ ಎರಡನೇ ‘ವಂದೇ ಭಾರತ್ ಸ್ಲೀಪರ್’ ರೈಲಿಗೆ ಅಧಿಕೃತವಾಗಿ ಚಾಲನೆ ನೀಡಿದ್ದಾರೆ.
ಈ ಆಧುನಿಕ ಸ್ಲೀಪರ್ ರೈಲು ಪ್ರಯಾಣಿಕರಿಗೆ ಕೇವಲ ವೇಗವನ್ನಷ್ಟೇ ಅಲ್ಲದೆ, ವಿಶ್ವದರ್ಜೆಯ ಅತ್ಯಾಧುನಿಕ ಸೌಕರ್ಯಗಳು ಮತ್ತು ಅತ್ಯಂತ ಆರಾಮದಾಯಕ ಪ್ರಯಾಣದ ಅನುಭವವನ್ನು ಒದಗಿಸಲಿದೆ ಎಂದು ಪ್ರಧಾನಿ ಸಂತಸ ವ್ಯಕ್ತಪಡಿಸಿದ್ದಾರೆ.
ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಮತ್ತು ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರು ವಾರಾಣಸಿ ರೈಲು ನಿಲ್ದಾಣದಲ್ಲಿ ಉಪಸ್ಥಿತರಿದ್ದು, ಈ ಮುಂದಿನ ಪೀಳಿಗೆಯ ಹೈಟೆಕ್ ರೈಲಿಗೆ ಹಸಿರು ಬಾವುಟ ಪ್ರದರ್ಶಿಸಿದರು.
ಯಾವ ಮಾರ್ಗದಲ್ಲಿ ಸಂಚಾರ?
ಈ ಹೊಸ ವಂದೇ ಭಾರತ್ ಸ್ಲೀಪರ್ ರೈಲು ಕಾಶಿಯಿಂದ ಹೊರಟು ಪ್ರಯಾಗ್‌ರಾಜ್ ಮತ್ತು ಕಾನ್ಪುರ್ ಸೆಂಟ್ರಲ್ ಮಾರ್ಗವಾಗಿದೆಹಲಿಯನ್ನು ತಲುಪಲಿದೆ. ಈ ಮಾರ್ಗವು ದೇಶದ ಲಕ್ಷಾಂತರ ಭಕ್ತಾದಿಗಳಿಗೆ, ಪ್ರವಾಸಿಗರಿಗೆ, ಉದ್ಯಮಿಗಳಿಗೆ ಹಾಗೂ ಯುವಜನತೆಗೆ ಅನುಕೂಲ ಮಾಡಿಕೊಡಲಿದೆ ಎಂದು ಪ್ರಧಾನಿ ಮೋದಿ ತಿಳಿಸಿದ್ದಾರೆ. “ಬಾಬಾ ವಿಶ್ವನಾಥನ ದರುಶನ ಪಡೆಯುವ ಭಕ್ತರಿಗಾಗಲಿ ಅಥವಾ ಪ್ರಯಾಗ್‌ರಾಜ್‌ನ ತ್ರಿವೇಣಿ ಸಂಗಮಕ್ಕೆ ಪವಿತ್ರ ಸ್ನಾನ ಮಾಡಲು ಹೋಗುವವರಿಗಾಗಲಿ, ಈ ರೈಲು ಭಕ್ತಿ ಮತ್ತು ಆಧುನಿಕತೆಯನ್ನು ಬೆಸೆಯುವ ಕೊಂಡಿಯಾಗಲಿದೆ” ಎಂದು ಅವರು ‘X’ ನಲ್ಲಿ ಬರೆದುಕೊಂಡಿದ್ದಾರೆ.
ಏನೆಲ್ಲಾ ವಿಶೇಷತೆಗಳಿವೆ?
2026ರ ಜನವರಿಯಲ್ಲಿ ಹೌರಾ-ಗುವಾಹಟಿ ಮಾರ್ಗದಲ್ಲಿ ದೇಶದ ಮೊದಲ ವಂದೇ ಭಾರತ್ ಸ್ಲೀಪರ್ ರೈಲನ್ನು ಪರಿಚಯಿಸಲಾಗಿತ್ತು. ಈಗ ಉತ್ತರ ಭಾರತದ ಪ್ರಯಾಣಿಕರಿಗಾಗಿ ದೇಶದ 2ನೇ ರೈಲನ್ನು ಹಳಿಗೆ ಇಳಿಸಲಾಗಿದೆ.
ರಾತ್ರಿ ಪ್ರಯಾಣ ಮಾಡುವವರಿಗಾಗಿಯೇ ಈ ರೈಲನ್ನು ಅತ್ಯಂತ ಆಪ್ತವಾಗಿ ವಿನ್ಯಾಸಗೊಳಿಸಲಾಗಿದೆ. ಇದರಲ್ಲಿ ಅತ್ಯಾಧುನಿಕ ಸುರಕ್ಷತಾ ಫೀಚರ್‌ಗಳು ಮತ್ತು ಸುರಕ್ಷಿತ ಸಂಚಾರಕ್ಕಾಗಿ ‘ಸ್ಟೇಟ್ ಆಫ್ ದಿ ಆರ್ಟ್’ ಸುರಕ್ಷತಾ ವ್ಯವಸ್ಥೆಯನ್ನು ಅಳವಡಿಸಲಾಗಿದೆ.
ರೈಲಿನಲ್ಲಿ ಸುಧಾರಿತ ಸಸ್ಪೆನ್ಷನ್ ಇರುವುದರಿಂದ ಪ್ರಯಾಣಿಕರು ಯಾವುದೇ ಅಡೆತಡೆಯಿಲ್ಲದೆ ನಿಶ್ಚಿಂತೆಯಾಗಿ ಮಲಗಬಹುದು. ಅತ್ಯಾಧುನಿಕ ಇಂಟೀರಿಯರ್ ಹಾಗೂ ಸ್ವಚ್ಛತೆಗೆ ಮೊದಲ ಆದ್ಯತೆ ನೀಡಲಾಗಿದೆ.
ಭಾರತದ ಪ್ರಮುಖ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಕೇಂದ್ರವನ್ನು ದೇಶದ ರಾಜಧಾನಿಗೆ ಬೆಸೆಯುವ ಈ ರೈಲು, ಕಾವೇರಿ ಕಣಿವೆಯ ಜನರಿಗೂ ಉತ್ತರ ಭಾರತದ ಪ್ರವಾಸದ ವೇಳೆ ಅತ್ಯುತ್ತಮ ಕನೆಕ್ಟಿವಿಟಿ ಒದಗಿಸಲಿದೆ.
