ಹೊಸದಿಗಂತ ಡಿಜಿಟಲ್‌ ಡೆಸ್ಕ್:
ಕೇಂದ್ರ ಸರ್ಕಾರ ಹಾಗೂ ರಕ್ಷಣಾ ಸಚಿವಾಲಯವು ‘ಅಗ್ನಿಪಥ್’ ನೇಮಕಾತಿ ನಿಯಮಾವಳಿಯಲ್ಲಿ ಭಾರಿ ಬದಲಾವಣೆ ತರುವ ಮೂಲಕ ವರ್ಷಾಂತ್ಯಕ್ಕೆ ಹೊರಹೋಗಬೇಕಿದ್ದ ಸಾವಿರಾರು ಯುವಕರಿಗೆ ದೀಪಾವಳಿ ಉಡುಗೊರೆ ನೀಡಿದೆ. ಮೊದಲ ಬ್ಯಾಚ್‌ನ ಅಗ್ನಿವೀರರ ಸೇವೆ ಮುಕ್ತಾಯದ ಹಂತದಲ್ಲೇ ಈ ಮಹತ್ವದ ಪರಿಷ್ಕೃತ ಆದೇಶ ಹೊರಬಿದ್ದಿದೆ.
18,000ಕ್ಕೂ ಹೆಚ್ಚು ಯುವ ಸೈನಿಕರಿಗೆ ನೇರ ಲಾಭ
ಭಾರತೀಯ ಭೂಸೇನೆ, ನೌಕಾಪಡೆ ಮತ್ತು ವಾಯುಪಡೆಯಲ್ಲಿ 4 ವರ್ಷಗಳ ಅವಧಿ ಮುಗಿಸಿ ಈ ವರ್ಷದ ನವೆಂಬರ್ ಹಾಗೂ ಡಿಸೆಂಬರ್ ತಿಂಗಳಲ್ಲಿ ನಿವೃತ್ತರಾಗಬೇಕಿದ್ದ ಸುಮಾರು 18,000ಕ್ಕೂ ಅಧಿಕ ಅಗ್ನಿವೀರರಿಗೆ ಈ ನಿರ್ಧಾರದಿಂದ ದೊಡ್ಡ ನೆಮ್ಮದಿ ಸಿಕ್ಕಿದೆ.
ನೌಕಾಪಡೆಯ ಮೊದಲ ಬ್ಯಾಚ್
ನೌಕಾಪಡೆಯ ಮೊದಲ ಬ್ಯಾಚ್‌ನ 2,100 ಅಗ್ನಿವೀರರ ಪೈಕಿ ಕೇವಲ 550 ಜನರಿಗೆ (ಶೇ. 25) ಮಾತ್ರ ಕಾಯಂ ನೌಕರಿ ಸಿಗಬೇಕಿತ್ತು. ಉಳಿದ ಸಿಬ್ಬಂದಿ ನವೆಂಬರ್ 21ರಂದು ಬಿಡುಗಡೆಯಾಗಬೇಕಿತ್ತಾದರೂ, ಈಗ ಅವರೆಲ್ಲರಿಗೂ 2 ವರ್ಷಗಳ ಹೆಚ್ಚುವರಿ ಸೇವಾ ಅವಕಾಶ ಲಭ್ಯವಾಗಲಿದೆ. ಭೂಸೇನೆ ಮತ್ತು ವಾಯುಪಡೆಯ ಎರಡು ಪಡೆಗಳ ಮೊದಲ ಬ್ಯಾಚ್ ಅಗ್ನಿವೀರರ ಅವಧಿ ಡಿಸೆಂಬರ್ 31ಕ್ಕೆ ಪೂರ್ಣಗೊಳ್ಳಬೇಕಿತ್ತು, ಈಗ ಅವರೆಲ್ಲರ ಸೇವೆಯೂ ಮುಂದುವರಿಯಲಿದೆ.
ವೇತನ ಪ್ಯಾಕೇಜ್ ಹೇಗಿರಲಿದೆ?
ಅಗ್ನಿಪಥ್ ಯೋಜನೆಯಡಿ ಸದ್ಯ ಆಯ್ಕೆಯಾಗುವ ಅಭ್ಯರ್ಥಿಗಳಿಗೆ ಮೊದಲ ವರ್ಷದಲ್ಲಿ ತಿಂಗಳಿಗೆ 30,000 ರೂಪಾಯಿ ನಿಗದಿತ ವೇತನ ಸಿಗಲಿದ್ದು, ನಾಲ್ಕನೇ ವರ್ಷದ ವೇಳೆಗೆ ಇದು 40,000 ರೂಪಾಯಿಗೆ ಹೆಚ್ಚಳವಾಗುತ್ತದೆ. ಈ ವೇತನದ ಶೇಕಡಾ 70 ರಷ್ಟು ಭಾಗ ಕೈಗೆ ಸಿಕ್ಕರೆ, ಬಾಕಿ ಶೇ. 30 ರಷ್ಟು ಮೊತ್ತ ‘ಅಗ್ನಿವೀರ್ ಕಾರ್ಪಸ್ ಫಂಡ್’ ಖಾತೆಗೆ ಜಮೆಯಾಗುತ್ತದೆ. ಅಷ್ಟೇ ಪ್ರಮಾಣದ ಹಣವನ್ನು ಕೇಂದ್ರ ಸರ್ಕಾರವೂ ಸಹ ನೀಡುತ್ತದೆ.
ಇದನ್ನೂ ಓದಿ:
ರಕ್ಷಣಾ ಪಡೆಗಳ ಮುಖ್ಯಸ್ಥ ಜನರಲ್ ಎನ್.ಎಸ್. ರಾಜಾ ಸುಬ್ರಮಣ್ಯಂ ಅವರು ಮಾಧ್ಯಮ ಗೋಷ್ಠಿಯಲ್ಲಿ ಈ ಮಾಹಿತಿ ಹಂಚಿಕೊಂಡಿದ್ದು, 2 ವರ್ಷಗಳ ವಿಸ್ತರಿತ ಅವಧಿಯ ನಂತರವೂ ಆಸಕ್ತ ಸೈನಿಕರನ್ನು ಕೌಶಲ್ಯದ ಆಧಾರದ ಮೇಲೆ ಕಾಯಂ ಹುದ್ದೆಗಳಿಗೆ ಪರಿಗಣಿಸಲಾಗುವುದು ಎಂದು ಸ್ಪಷ್ಟಪಡಿಸಿದ್ದಾರೆ.
