ಯುನಿಕಾರ್ನ್ ಲೋಕದಲ್ಲಿ ರಾಹ ಬರ್ತ್‌ಡೇ: ಕ್ಯೂಟ್ ಫೋಟೋ ಹಂಚಿಕೊಂಡ ಆಲಿಯಾ ಭಟ್

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ಬಾಲಿವುಡ್‌ನ ಜನಪ್ರಿಯ ಜೋಡಿ ಆಲಿಯಾ ಭಟ್ ಮತ್ತು ರಣಬೀರ್ ಕಪೂರ್ ತಮ್ಮ ಮುದ್ದು ಮಗಳು ರಾಹಳ ನಾಲ್ಕನೇ ವರ್ಷದ ಹುಟ್ಟುಹಬ್ಬವನ್ನು ಅತ್ಯಂತ ಸಂಭ್ರಮ ಹಾಗೂ ಪ್ರೀತಿಯಿಂದ ಆಚರಿಸಿದ್ದಾರೆ. ತಮ್ಮ ಮಗಳ ಖಾಸಗಿತನಕ್ಕೆ ಮೊದಲಿನಿಂದಲೂ ಆದ್ಯತೆ ನೀಡುತ್ತಿರುವ ದಂಪತಿ, ಈ ಬಾರಿಯೂ ಫೋಟೋಗಳಲ್ಲಿ ರಾಹ ಮುಖ ಕಾಣಿಸದಂತೆ ಎಚ್ಚರ ವಹಿಸಿದ್ದಾರೆ.

ಈ ವಿಶೇಷ ದಿನಕ್ಕಾಗಿ ಸಿದ್ಧಪಡಿಸಿದ ಅಲಂಕಾರವು ಎಲ್ಲರ ಗಮನ ಸೆಳೆಯಿತು. ವರ್ಣರಂಜಿತ ಬಲೂನ್‌ಗಳು ಮತ್ತು “ರಾಹಸ್ 4th ಬರ್ತ್‌ಡೇ” ಎಂಬ ಬೋರ್ಡ್‌ನೊಂದಿಗೆ ಸಜ್ಜಾಗಿದ್ದ ಪೇಸ್ಟೆಲ್-ಬ್ಲೂ ಬಣ್ಣದ ಕ್ಯಾಂಪರ್ ವ್ಯಾನ್ ಸಂಭ್ರಮಕ್ಕೆ ಮೆರಗು ನೀಡಿತ್ತು. ಈ ಸಂಭ್ರಮದ ಫೋಟೋಗಳನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡ ಆಲಿಯಾ ಭಟ್, “ಆಕೆಗೆ ಈಗ 4 ವರ್ಷ. ನಮ್ಮ ಪುಟ್ಟ ಯುನಿಕಾರ್ನ್… ಸದಾ ಪ್ರೀತಿಯಿಂದ” ಎಂದು ಭಾವನಾತ್ಮಕವಾಗಿ ಬರೆದುಕೊಂಡಿದ್ದಾರೆ. ಆಲಿಯಾ ಅವರು ಪಾರ್ಟಿಯಲ್ಲಿ ಧರಿಸಿದ್ದ ಫ್ಲೋರಲ್ ಡ್ರೆಸ್ ನೋಡುಗರ ಗಮನ ಸೆಳೆಯಿತು.

https://www.instagram.com/p/Dfbd1cwDC1p/?utm_source=ig_web_button_share_sheet

ಬರ್ತ್‌ಡೇ ಆಚರಣೆಯ ಪ್ರಮುಖ ಆಕರ್ಷಣೆಯೆಂದರೆ ‘ಬ್ಲೂಯಿ’ ಕಾರ್ಟೂನ್ ಥೀಮ್‌ನ ಕೇಕ್. ಆಲಿಯಾ ಮತ್ತು ರಣಬೀರ್ ಮಗಳ ಕೈ ಹಿಡಿದು ಕೇಕ್ ಕತ್ತರಿಸಲು ನೆರವಾಗುತ್ತಿರುವ ದೃಶ್ಯ ಎಲ್ಲರ ಹೃದಯ ಗೆದ್ದಿದೆ. ಇದರ ಜೊತೆಗೆ ಮೂರು ಜನರ ಕುಟುಂಬವನ್ನು ಬಿಂಬಿಸುವ ಸರಳ ಹಾಗೂ ಸುಂದರ ಚಿತ್ರವಿರುವ ಇನ್ನೊಂದು ವಿಶೇಷ ಕೇಕ್ ಕೂಡ ಅಲ್ಲಿತ್ತು.

ಹುಟ್ಟುಹಬ್ಬದ ಸಂಭ್ರಮದಲ್ಲಿ ರಾಹ ಹಲವು ಆಟಗಳಲ್ಲಿ ತೊಡಗಿಸಿಕೊಂಡಿದ್ದಳು. ಮರದ ಮೇಜಿನ ಬಳಿ ಕುಳಿತು ಹಳದಿ ಕ್ರೇಯಾನ್‌ನಿಂದ ಕಾಮನಬಿಲ್ಲನ್ನು ಬಿಡಿಸುತ್ತಿದ್ದ ಕ್ಷಣಗಳು, ಬೂದು ಬಣ್ಣದ ಚೆಕ್ಸ್ ಉಡುಪಿನಲ್ಲಿ ಮಿಂಚುತ್ತಿದ್ದ ಮಗಳಿಗೆ ಆಲಿಯಾ ಪ್ರೀತಿಯಿಂದ ಮುತ್ತಿಕ್ಕಿದ ಫೋಟೋಗಳು ಅತ್ಯಂತ ಮುದ್ದಾಗಿದ್ದವು. ಒಟ್ಟಿನಲ್ಲಿ, ಪ್ರೀತಿ, ನಗು ಮತ್ತು ಮಧುರ ನೆನಪುಗಳಿಂದ ಕೂಡಿದ ಈ ಹುಟ್ಟುಹಬ್ಬದ ಸಂಭ್ರಮವು ಸಾಮಾಜಿಕ ಜಾಲತಾಣಗಳಲ್ಲಿ ಅಭಿಮಾನಿಗಳ ಮನ ಗೆದ್ದಿದೆ.