ಮನೆಯ ಸಾಕುಪ್ರಾಣಿಗಳಿಗೆ ದೀಪಾವಳಿ ನರಕವಾಗದಿರಲಿ: ಪೆಟ್ ಪೇರೆಂಟ್ಸ್ ತಿಳಿಯಲೇಬೇಕಾದ ಸಂಗತಿ

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ದೀಪಾವಳಿ ಎಂದರೆ ಬೆಳಕು, ಸಿಹಿ ಮತ್ತು ಸಂಭ್ರಮದ ಹಬ್ಬ. ಆದರೆ ನಮಗೆ ಖುಷಿ ತರುವ ಪಟಾಕಿಗಳ ಶಬ್ದ ಮತ್ತು ಪ್ರಖರ ಬೆಳಕು ಮನೆಯ ಮೂಕ ಪ್ರಾಣಿಗಳಿಗೆ ತೀವ್ರ ಭಯ ಹಾಗೂ ಆತಂಕವನ್ನು ಉಂಟುಮಾಡುತ್ತದೆ. ಮನುಷರಿಗಿಂತ ನಾಯಿ ಮತ್ತು ಬೆಕ್ಕುಗಳ ಶ್ರವಣ ಶಕ್ತಿ ಬಹಳ ತೀಕ್ಷ್ಣವಾಗಿರುವುದರಿಂದ, ದೊಡ್ಡ ಶಬ್ದಗಳು ಅವುಗಳಲ್ಲಿ ಮಾನಸಿಕ ಒತ್ತಡವನ್ನು ಸೃಷ್ಟಿಸುತ್ತವೆ. ಈ ದೀಪಾವಳಿಯಲ್ಲಿ ನಿಮ್ಮ ಮುದ್ದಿನ ಪ್ರಾಣಿಗಳನ್ನು ಸುರಕ್ಷಿತವಾಗಿಡಲು ಇಲ್ಲಿವೆ ಪ್ರಮುಖ ಉಪಯುಕ್ತ ಮಾರ್ಗಗಳು:

ಸುರಕ್ಷಿತ ಜಾಗ ಕಲ್ಪಿಸಿ

ಹಬ್ಬದ ಸಮಯದಲ್ಲಿ ಪಟಾಕಿಗಳ ಸದ್ದು ಹೆಚ್ಚಿರುವ ಕಾರಣ, ಮನೆಯ ಪ್ರಾಣಿಗಳನ್ನು ಕಿಟಕಿ ಮತ್ತು ಬಾಗಿಲುಗಳನ್ನು ಮುಚ್ಚಿದ ಪ್ರಶಾಂತವಾದ ಒಂದು ಕೋಣೆಯಲ್ಲಿಡಿ. ಆ ಕೋಣೆಯಲ್ಲಿ ಅವುಗಳ ಮಲಗುವ ಹಾಸಿಗೆ, ಆಟಿಕೆಗಳು ಹಾಗೂ ಕುಡಿಯಲು ಶುದ್ಧ ನೀರನ್ನು ಇರಿಸಿ. ಇದು ಹೊರಗಿನ ಸದ್ದು ಮತ್ತು ಬೆಳಕಿನ ಪ್ರಖರತೆಯನ್ನು ಕಡಿಮೆ ಮಾಡಿ, ಅವುಗಳಿಗೆ ಭದ್ರತೆಯ ಅನುಭವ ನೀಡುತ್ತದೆ.

ಸಂಗೀತ, ಧ್ವನಿ ಬಳಸಿ

ಹೊರಗಿನ ಪಟಾಕಿಗಳ ಭಯಾನಕ ಸದ್ದು ಪ್ರಾಣಿಗಳನ್ನು ಬೆಚ್ಚಿಬೀಳಿಸದಂತೆ ತಡೆಯಲು, ಮನೆಯೊಳಗೆ ಮೃದುವಾದ ಸಂಗೀತವನ್ನು ಅಥವಾ ಟಿವಿ ಶಬ್ದವನ್ನು ಮೀಡಿಯಂ ವಾಲ್ಯೂಮ್‌ನಲ್ಲಿ ಪ್ಲೇ ಮಾಡಿ. ಈ ಹಿನ್ನೆಲೆ ಶಬ್ದವು ಪಟಾಕಿಗಳ ದೊಡ್ಡ ಶಬ್ದವನ್ನು ಮರೆಮಾಚಲು ಸಹಾಯ ಮಾಡುತ್ತದೆ ಮತ್ತು ಪ್ರಾಣಿಗಳು ಆರಾಮವಾಗಿರಲು ನೆರವಾಗುತ್ತದೆ.

ನಿಮ್ಮ ಸಾಮೀಪ್ಯ ಇರಲಿ

ಭಯದಿಂದ ನಿಮ್ಮ ಸಾಕುಪ್ರಾಣಿಗಳು ಯಾವುದಾದರೂ ಮೂಲೆಯಲ್ಲಿ ಅಡಗಿ ಕುಳಿತರೆ, ಅವುಗಳನ್ನು ಬಲವಂತವಾಗಿ ಹೊರಗೆಳೆಯಲು ಹೋಗಬೇಡಿ. ಬದಲಿಗೆ, ಅವುಗಳ ಹತ್ತಿರವೇ ಕುಳಿತು ಪ್ರೀತಿಯಿಂದ ಮೈದಡವಿ, ಮೃದುವಾದ ಧ್ವನಿಯಲ್ಲಿ ಧೈರ್ಯ ತುಂಬಿ. ಕಷ್ಟದ ಸಮಯದಲ್ಲಿ ಒಡೆಯನ ಸಾಮೀಪ್ಯವೇ ಅವುಗಳಿಗೆ ದೊಡ್ಡ ಧೈರ್ಯ ಹಾಗೂ ರಕ್ಷಣೆಯ ಭಾವನೆಯನ್ನು ನೀಡುತ್ತದೆ.

ಮುಸ್ಸಂಜೆ ಮುನ್ನವೇ ವಾಕಿಂಗ್ ಮುಗಿಸಿ

ಪಟಾಕಿ ಸಿಡಿಸುವ ಸಮಯಕ್ಕೆ ಮುನ್ನವೇ ಅಂದರೆ ಸಂಜೆ ಕತ್ತಲಾಗುವುದಕ್ಕಿಂತ ಮುಂಚಿತವಾಗಿ ನಿಮ್ಮ ನಾಯಿಗಳನ್ನು ವಾಕಿಂಗ್ ಕರೆದೊಯ್ದು ಬನ್ನಿ. ಇದರಿಂದ ಅವುಗಳ ದೈನಂದಿನ ನೈಸರ್ಗಿಕ ಚಟುವಟಿಕೆಗಳು ಸುಲಭವಾಗಿ ನೆರವೇರುತ್ತವೆ ಮತ್ತು ಸಂಜೆ ವೇಳೆ ಹೊರಗಿನ ಅಬ್ಬರದಿಂದ ಸುರಕ್ಷಿತವಾಗಿ ಮನೆಯೊಳಗೆ ಇರಬಹುದು.

ಜೊತೆಗೆ, ಹಬ್ಬದ ಸಿಹಿತಿಂಡಿಗಳನ್ನು ಪ್ರಾಣಿಗಳಿಗೆ ನೀಡಬೇಡಿ. ಜವಾಬ್ದಾರಿಯುತವಾಗಿ ಹಬ್ಬ ಆಚರಿಸಿ, ನಿಮ್ಮ ಮುದ್ದಿನ ಪ್ರಾಣಿಗಳನ್ನೂ ಜೋಪಾನ ಮಾಡಿ.