CINE | ಬಾಕ್ಸ್ ಆಫೀಸ್‌ನಲ್ಲಿ ರಣಬೀರ್–ಯಶ್ ಜೋಡಿ ಮ್ಯಾಜಿಕ್:1,000 ಕೋಟಿ ರೂ. ಕ್ಲಬ್ ಸೇರಿದ ‘ರಾಮಾಯಣ’

ಹೊಸದಿಗಂತ ಡಿಜಿಟಲ್‌ ಡೆಸ್ಕ್:

ಭಾರತೀಯ ಚಿತ್ರರಂಗದ ಬಾಕ್ಸ್ ಆಫೀಸ್‌ನಲ್ಲಿ ಮತ್ತೊಂದು ಹೊಸ ದಾಖಲೆ ನಿರ್ಮಾಣವಾಗಿದೆ. ನಿತೇಶ್ ತಿವಾರಿ ನಿರ್ದೇಶನದ, ರಣಬೀರ್ ಕಪೂರ್ ಮತ್ತು ಯಶ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ‘ರಾಮಾಯಣ’ ಸಿನಿಮಾ ಬಿಡುಗಡೆಯಾದ ಕೇವಲ ಎಂಟು ದಿನಗಳಲ್ಲೇ ವಿಶ್ವಾದ್ಯಂತ 1,000 ಕೋಟಿ ಗಳಿಕೆಯ ಗಡಿ ದಾಟಿದೆ.

ನವೆಂಬರ್ 5ರಂದು ಜಾಗತಿಕವಾಗಿ ತೆರೆಕಂಡ ಈ ಚಿತ್ರ, ಆರಂಭಿಕ ವಾರದಲ್ಲೇ ಭರ್ಜರಿ ಕಲೆಕ್ಷನ್ ಮಾಡುವ ಮೂಲಕ ಸಿನಿರಂಗದ ಗಮನ ಸೆಳೆದಿದೆ.

ಗುರುವಾರ ಮಧ್ಯಾಹ್ನದ ವೇಳೆಗೆ ಭಾರತದಲ್ಲಿ ನಡೆದ ಸ್ಪಾಟ್ ಬುಕ್ಕಿಂಗ್ ಸೇರಿದಂತೆ ವಿದೇಶಗಳಲ್ಲಿನ ಗಳಿಕೆಯಿಂದ ಸಿನಿಮಾ 1,000 ಕೋಟಿ ರೂ ಮೈಲಿಗಲ್ಲು ತಲುಪಿದೆ ಎಂದು ವಾಣಿಜ್ಯ ವಲಯದ ಅಂದಾಜುಗಳು ತಿಳಿಸಿವೆ. ಬಿಡುಗಡೆಯಾದ ಮೊದಲ ವಾರದಲ್ಲೇ ಈ ಸಾಧನೆ ಮಾಡಿರುವ ಚಿತ್ರ, ಆರಂಭಿಕ ವಾರಾಂತ್ಯದಲ್ಲೇ ಈ ಮಟ್ಟದ ಗಳಿಕೆ ದಾಖಲಿಸಿದ ಮೂರನೇ ಭಾರತೀಯ ಸಿನಿಮಾ ಎಂಬ ಹೆಗ್ಗಳಿಕೆಗೂ ಪಾತ್ರವಾಗಿದೆ. ಅಷ್ಟೇ ಅಲ್ಲ, 1,000 ಕೋಟಿ ಕ್ಲಬ್ ಸೇರಿದ ಮೂರನೇ ಅತ್ಯಂತ ವೇಗದ ಚಿತ್ರ ಎಂಬ ದಾಖಲೆ ಕೂಡ ನಿರ್ಮಿಸಿದೆ.

ಇದನ್ನೂ ಓದಿ:

ಮೊದಲ ದಿನ ಸಾಧಾರಣ ಆರಂಭ, ನಂತರ ಕಲೆಕ್ಷನ್‌ನಲ್ಲಿ ಏರಿಕೆ

ನವೆಂಬರ್ 5ರಂದು ತೆರೆಕಂಡ ‘ರಾಮಾಯಣ’ ಮೊದಲ ದಿನ ವಿಶ್ವಾದ್ಯಂತ 128 ಕೋಟಿ ಗಳಿಸಿತ್ತು. ಆರಂಭದಲ್ಲಿ ಉತ್ತಮ ಪ್ರತಿಕ್ರಿಯೆ ಪಡೆದಿದ್ದರೂ, ದೀಪಾವಳಿ ಹಬ್ಬದ ಸಂಭ್ರಮದಿಂದ ದೇಶೀಯ ಮಾರುಕಟ್ಟೆಯಲ್ಲಿ ನಿರೀಕ್ಷಿತ ಮಟ್ಟದ ವೇಗ ಸಿಗಲಿಲ್ಲ. ಆದರೆ ವಿದೇಶಗಳಲ್ಲಿ ಪ್ರೇಕ್ಷಕರಿಂದ ದೊರೆತ ಸಕಾರಾತ್ಮಕ ಪ್ರತಿಕ್ರಿಯೆ ಚಿತ್ರದ ಗಳಿಕೆಗೆ ಬಲ ತುಂಬಿತು. ಮೊದಲ ನಾಲ್ಕು ದಿನಗಳಲ್ಲೇ ಸಿನಿಮಾ 507 ಕೋಟಿ ಕಲೆಕ್ಷನ್ ಮಾಡಿತ್ತು.

ಸೋಮವಾರದಿಂದ ಚಿತ್ರದ ಗಳಿಕೆ ಮತ್ತಷ್ಟು ವೇಗ ಪಡೆದುಕೊಂಡಿತು. ಗೋವರ್ಧನ ಪೂಜೆ ಹಾಗೂ ಭಾಯ್ ದೂಜ್ ರಜೆಗಳ ಸಂದರ್ಭದಲ್ಲಿ ಸತತವಾಗಿ ಎರಡು ದಿನ 150 ಕೋಟಿಗೂ ಅಧಿಕ ಗಳಿಕೆ ದಾಖಲಿಸಿತು. ಬುಧವಾರವೂ ಉತ್ತಮ ಪ್ರದರ್ಶನ ಮುಂದುವರಿಸಿದ ಸಿನಿಮಾ, ಏಳು ದಿನಗಳ ಅಂತ್ಯಕ್ಕೆ ವಿಶ್ವಾದ್ಯಂತ 935 ಕೋಟಿ ಗಳಿಸಿತ್ತು.

ಗುರುವಾರದ ಮುಂಗಡ ಬುಕ್ಕಿಂಗ್‌ನಿಂದ ಭಾರತದಲ್ಲಿ ಸುಮಾರು 29 ಕೋಟಿ ಹಾಗೂ ವಿದೇಶಗಳಲ್ಲಿ ಸುಮಾರು 1.5 ಮಿಲಿಯನ್ ಡಾಲರ್ ಗಳಿಕೆ ನಿರೀಕ್ಷಿಸಲಾಗಿತ್ತು. ಬಳಿಕದ ಟಿಕೆಟ್ ಮಾರಾಟದೊಂದಿಗೆ 1,000 ಕೋಟಿ ಗಡಿ ದಾಟಿದೆ.