ಶ್ರೀರಂಗಪಟ್ಟಣದಲ್ಲಿ ದುರಂತ: ವೇಗವಾಗಿ ಚಲಿಸುತ್ತಿದ್ದ ರೈಲಿಗೆ ಸಿಲುಕಿ ಯುವತಿ ದಾರುಣ ಸಾ*ವು

ಹೊಸದಿಗಂತ ವರದಿ ಶ್ರೀರಂಗಪಟ್ಟಣ:

 ತಾಲೂಕಿನ ಚಿಂದಗಿರಿಕೊಪ್ಪಲು ಗ್ರಾಮದ ಬಳಿ ವೇಗವಾಗಿ ಚಲಿಸುತ್ತಿದ್ದ ರೈಲಿನ ಸೆಳೆತಕ್ಕೆ ಸಿಲುಕಿ ಯುವತಿ ಯೋರ್ವಳು ಧಾರುಣವಾಗಿ ಮೃತಪಟ್ಟಿರುವ ಘಟನೆ ಸಂಭವಿಸಿದೆ.

ಗ್ರಾಮದ ಸುರೇಶ್ ಎಂಬುವವರ ಪುತ್ರಿ ಬಿಸಿಎ ವಿದ್ಯಾರ್ಥಿನಿ ಸಿ.ಎಸ್ ಲಿಖಿತ (19) ಮೃತ ದುರ್ದೈವಿ. ಚಿನಕುರಳಿ ಬಳಿಯ ಕಾಲೇಜುವೊಂದರಲ್ಲಿ ವ್ಯಾಸಂಗ ಮಾಡುತ್ತಿದ್ದ ಈಕೆಯನ್ನ ತಾಯಿ ಭವ್ಯ ಪ್ರತಿನಿತ್ಯ ಗ್ರಾಮದಿಂದ ಪಾಂಡವಪುರ ಪಟ್ಟಣಕ್ಕೆ ಬೆಳಿಗ್ಗೆ ಬಿಟ್ಟು, ಪುನಃ ವಾಪಸ್ಸು ತಮ್ಮ ದ್ವಿಚಕ್ರ ವಾಹನದಲ್ಲಿ ಕರೆತರುತ್ತಿದ್ದರು. ಎಂದಿನಂತೆ ಶನಿವಾರವೂ ಸಹ ಪುತ್ರಿಯನ್ನ ಸ್ವಗ್ರಾಮಕ್ಕೆ ಕರೆತರುತ್ತಿದ್ದ ವೇಳೆ ಗ್ರಾಮ ಸಮೀಪದಲ್ಲಿ ರೈಲು ಹಾದು ಹೋಗಲು ಗೇಟ್ ಹಾಕಲಾಗಿತ್ತು. ರೈಲನ್ನು ನೋಡುವ ಖುಷಿಯಿಂದ ದ್ವಿಚಕ್ರ ವಾಹನದಿಂದ ಕೆಳಗೆ ಇಳಿದ ಈಕೆ ತೀರ ಸಮೀಪಕ್ಕೆ ದಾವಿಸಿದ್ದ ಹಿನ್ನಲೆ ವೇಗವಾಗಿ ಬಂದ ರೈಲಿನ ಮುಂಭಾಗ ಯುವತಿಯ ತಲೆಗೆ ಬಡಿದು, ಬಳಿಕ ರಬಸದ ಸೆಳತಕ್ಕೆ ಹಳಿಯೊಳಗೆ ಸಿಲುಕಿ ಮೃತಪಟ್ಟಿದ್ದಾಳೆ ಎಂದು ತಿಳಿದು ಬಂದಿದೆ.

ಈ ಎಲ್ಲಾ ಘಟನೆಯು ಯುವತಿ ತಾಯಿಯ ಎದುರೇ ಕ್ಷಣ ಕಾಲದಲ್ಲೇ ನಡೆದು ಹೋಗಿದ್ದು, ಆಘಾತಕ್ಕೆ ಸಿಲುಕಿದ ತಾಯಿ ಭವ್ಯ ಸ್ಥಳದಲ್ಲಿ ಕುಸಿದು ಬಿದಿದ್ದಾರೆ. ಮೃತಳ ಪೋಷಕರು, ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದ್ದು, ಸಂಪೂರ್ಣ ಗ್ರಾಮವು ಶೋಕಸಾಗರದಲ್ಲಿ ಮುಳುಗಿತ್ತು. ಶವವನ್ನು ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಗೆ ರವಾನಿಸಿದ್ದು, ಮರಣೋತ್ತರ ಪರೀಕ್ಷೆಗೆ ಒಳಪಡಿಸಲಾಯಿತು.

ಈ ಸಂಬಂಧ ರೈಲ್ವೆ ಪೊಲೀಸರು ಪರಿಶೀಲನೆ ನಡೆಸಿ, ಪ್ರಕರಣ ದಾಖಲಿಸಿಕೊಂಡಿದ್ದಾರೆ.