ಬಂಗಾಳಕೊಲ್ಲಿಯಲ್ಲಿ ವಾಯುಭಾರ ಕುಸಿತದಿಂದ ಸೃಷ್ಟಿಯಾಗಿರುವ ‘ಅಕ್ವಾನ್’ ಚಂಡಮಾರುತವು ಭಾರತದ ಪೂರ್ವ ಕರಾವಳಿಯಾದ ಆಂಧ್ರಪ್ರದೇಶ, ಒಡಿಶಾ ಮತ್ತು ತಮಿಳುನಾಡು ರಾಜ್ಯಗಳಲ್ಲಿ ಭಾರಿ ಆತಂಕ ಮೂಡಿಸಿದೆ. ಆದರೆ, ಭಾರತಕ್ಕೆ ಅಪ್ಪಳಿಸುತ್ತಿರುವ ಈ ಬಿರುಗಾಳಿಗೆ ‘ಅಕ್ವಾನ್’ ಎಂಬ ವಿಭಿನ್ನ ಹೆಸರು ಹೇಗೆ ಬಂತು ಮತ್ತು ಇದರ ಅರ್ಥವೇನು ಎಂಬ ಕುತೂಹಲ ಎಲ್ಲರಲ್ಲೂ ಮೂಡಿದೆ.
ಭಾರತದ ಚಂಡಮಾರುತಕ್ಕೆ ಇರಾನ್ ಹೆಸರಿಟ್ಟಿದ್ದು ಏಕೆ?
ಉತ್ತರ ಹಿಂದೂ ಮಹಾಸಾಗರದಲ್ಲಿ (ಬಂಗಾಳಕೊಲ್ಲಿ ಮತ್ತು ಅರಬ್ಬಿ ಸಮುದ್ರ) ಏಳುವ ಚಂಡಮಾರುತಗಳಿಗೆ ಹೆಸರಿಡಲು ವಿಶ್ವ ಹವಾಮಾನ ಸಂಸ್ಥೆಯ ಅಡಿಯಲ್ಲಿ ಭಾರತ, ಇರಾನ್, ಬಾಂಗ್ಲಾದೇಶ, ಶ್ರೀಲಂಕಾ ಸೇರಿದಂತೆ ಒಟ್ಟು 13 ದೇಶಗಳ ಒಕ್ಕೂಟವಿದೆ. ಚಂಡಮಾರುತಗಳ ಬಗ್ಗೆ ಜನರಿಗೆ, ಮೀನುಗಾರರಿಗೆ ಮತ್ತು ರಕ್ಷಣಾ ಪಡೆಗಳಿಗೆ ಸುಲಭವಾಗಿ ಎಚ್ಚರಿಕೆ ನೀಡಲು ಈ 13 ದೇಶಗಳು ತಲಾ 13 ಹೆಸರುಗಳನ್ನು ಮೊದಲೇ ಸೂಚಿಸಿ ಪಟ್ಟಿ ಸಿದ್ಧಪಡಿಸಿರುತ್ತವೆ. ಚಂಡಮಾರುತ ಯಾವ ದೇಶಕ್ಕೇ ಅಪ್ಪಳಿಸಲಿ, ಈ ಪಟ್ಟಿಯಲ್ಲಿರುವ ದೇಶಗಳ ಸರದಿಯ ಪ್ರಕಾರವೇ ಹೆಸರನ್ನು ಇಡಲಾಗುತ್ತದೆ. ಅದರಂತೆ ಈ ಬಾರಿ ಇರಾನ್ ದೇಶದ ಸರದಿ ಇದ್ದಿದ್ದರಿಂದ, ಅದು ಸೂಚಿಸಿದ್ದ ‘ಅಕ್ವಾನ್’ ಎಂಬ ಹೆಸರನ್ನು ಇಡಲಾಗಿದೆ.
ಪರ್ಷಿಯನ್ ಪುರಾಣದ ಮಾಯಾವಿ ರಾಕ್ಷಸ ‘ಅಕ್ವಾನ್’!
‘ಅಕ್ವಾನ್’ ಎಂಬುದು ಕೇವಲ ಒಂದು ಹೆಸರಲ್ಲ, ಅದರ ಹಿಂದೆ ಸಾವಿರ ವರ್ಷಗಳ ಹಳೆಯ ಪರ್ಷಿಯನ್ (ಇರಾನ್) ಪುರಾಣದ ಕಥೆಯಿದೆ. 10ನೇ ಶತಮಾನದ ಪ್ರಸಿದ್ಧ ಪರ್ಷಿಯನ್ ಕವಿ ಫಿರ್ದೌಸಿ ಬರೆದ ‘ಶಾಹನಾಮೆ’ ಎಂಬ ಮಹಾಕಾವ್ಯದಲ್ಲಿ ‘ಅಕ್ವಾನ್-ಎ-ದೀವ್’ ಎಂಬ ಮಾಯಾವಿ ರಾಕ್ಷಸನ ಉಲ್ಲೇಖವಿದೆ. ರೂಪ ಬದಲಿಸುವ ಶಕ್ತಿ ಹೊಂದಿದ್ದ ಈ ದೈತ್ಯ, ಯಾವಾಗಲೂ ಜನರು ಹೇಳಿದ್ದಕ್ಕೆ ತದ್ವಿರುದ್ಧವಾಗಿ ನಡೆದುಕೊಳ್ಳುವ ಸ್ವಭಾವದವನಾಗಿದ್ದ.
ವೀರ ರುಸ್ತಮ್ ಮತ್ತು ಅಕ್ವಾನ್ ಕಾಳಗ
ಪುರಾಣದ ಪ್ರಕಾರ, ಅಕ್ವಾನ್ ಒಮ್ಮೆ ಪರ್ಷಿಯಾದ ಮಹಾನ್ ಯೋಧ ರುಸ್ತಮ್ನನ್ನು ಆಕಾಶಕ್ಕೆ ಎತ್ತಿಕೊಂಡು ಹೋಗಿ, “ನಿನ್ನನ್ನು ಸಮುದ್ರಕ್ಕೆ ಎಸೆಯಲೋ ಅಥವಾ ಬೆಟ್ಟದ ಮೇಲೆ ಎಸೆಯಲೋ?” ಎಂದು ಕೇಳುತ್ತಾನೆ. ರಾಕ್ಷಸನ ಕುತಂತ್ರ ಅರಿತಿದ್ದ ರುಸ್ತಮ್, “ನನ್ನನ್ನು ಬೆಟ್ಟದ ಮೇಲೆ ಎಸೆ” ಎನ್ನುತ್ತಾನೆ. ತದ್ವಿರುದ್ಧವಾಗಿ ಮಾಡುವ ಚಾಳಿಯ ಅಕ್ವಾನ್, ರುಸ್ತಮ್ನನ್ನು ಸಮುದ್ರಕ್ಕೆ ಎಸೆಯುತ್ತಾನೆ. ಸಮುದ್ರದಿಂದ ಈಜಿ ದಡ ಸೇರಿದ ರುಸ್ತಮ್, ಮುಂದೆ ಆ ಮಾಯಾವಿ ರಾಕ್ಷಸನನ್ನು ಸಂಹರಿಸುತ್ತಾನೆ.
ಈಗ ಇದೇ ಮಾಯಾವಿ ರಾಕ್ಷಸನ ಹೆಸರನ್ನು ಹೊತ್ತಿರುವ ‘ಅಕ್ವಾನ್’ ಚಂಡಮಾರುತವು ದಿಕ್ಕು ಬದಲಿಸುತ್ತಾ, ಪೂರ್ವ ಕರಾವಳಿಯಲ್ಲಿ ತನ್ನ ರೌದ್ರಾವತಾರ ತೋರಲು ಸಜ್ಜಾಗಿದೆ.



