November 22, 2026
Sunday, November 22, 2026
spot_img

ವೆಲ್ಲಿಂಗ್ಟನ್‌ನಲ್ಲಿ ಟೀಮ್ ಇಂಡಿಯಾ ಅಬ್ಬರ: ಡಫಿ ಬೆನ್ನಟ್ಟಿದ 201 ರನ್‌ಗಳ ಕರಾಳ ದಾಖಲೆ!

ಹೊಸದಿಗಂತ ಡಿಜಿಟಲ್ ಡೆಸ್ಕ್:

ವೆಲ್ಲಿಂಗ್ಟನ್‌ನ ಬೇಸಿನ್ ರಿಸರ್ವ್ ಮೈದಾನದಲ್ಲಿ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಭಾರತದ ಬ್ಯಾಟರ್‌ಗಳು ನ್ಯೂಜಿಲೆಂಡ್ ಬೌಲಿಂಗ್ ಪಡೆಯ ಮೇಲೆ ಸಂಪೂರ್ಣ ಪ್ರಾಬಲ್ಯ ಸಾಧಿಸಿದ್ದಾರೆ. ಮೊದಲ ಇನ್ನಿಂಗ್ಸ್‌ನಲ್ಲಿ ನ್ಯೂಜಿಲೆಂಡ್ ಗಳಿಸಿದ 368 ರನ್‌ಗಳಿಗೆ ಪ್ರತಿಯಾಗಿ ಭಾರತ, 9 ವಿಕೆಟ್ ಕಳೆದುಕೊಂಡು 720 ರನ್‌ಗಳ ಬೃಹತ್ ಮೊತ್ತ ಪೇರಿಸಿ ಇನ್ನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿತು.

ಕೆ.ಎಲ್. ರಾಹುಲ್ (136) ಮತ್ತು ರಿಷಭ್ ಪಂತ್ (128) ಅವರ ಆಕರ್ಷಕ ಶತಕಗಳು ಭಾರತದ ಇನ್ನಿಂಗ್ಸ್‌ಗೆ ಭದ್ರ ಬುನಾದಿ ಹಾಕಿದವು. ಇವರಿಗೆ ಸಾಥ್ ನೀಡಿದ ನಾಯಕ ಶುಭ್‌ಮನ್ ಗಿಲ್ (98), ಯಶಸ್ವಿ ಜೈಸ್ವಾಲ್ (85), ದೇವದತ್ ಪಡಿಕ್ಕಲ್ (80) ಮತ್ತು ಧ್ರುವ್ ಜುರೆಲ್ (78) ಅವರ ಅರ್ಧಶತಕಗಳು ಕಿವೀಸ್ ಬೌಲರ್‌ಗಳನ್ನು ಹೈರಾಣಾಗಿಸಿದವು.

ಭಾರತದ ಈ ರನ್ ಪ್ರವಾಹದ ನಡುವೆ ನ್ಯೂಜಿಲೆಂಡ್ ವೇಗಿ ಜೇಕಬ್ ಡಫಿ ಅಕ್ಷರಶಃ ಕಂಗಾಲಾದರು. ಕೇವಲ 33 ಓವರ್‌ಗಳಲ್ಲಿ 201 ರನ್ ಬಿಟ್ಟುಕೊಟ್ಟು ಕೇವಲ ಒಂದು ವಿಕೆಟ್ ಮಾತ್ರ ಪಡೆದರು. ಇದರೊಂದಿಗೆ ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಇನ್ನಿಂಗ್ಸ್‌ವೊಂದರಲ್ಲಿ 200ಕ್ಕೂ ಹೆಚ್ಚು ರನ್ ನೀಡಿದ ನ್ಯೂಜಿಲೆಂಡ್‌ನ ಮೊದಲ ವೇಗದ ಬೌಲರ್ ಎಂಬ ಅನಪೇಕ್ಷಿತ ದಾಖಲೆ ಅವರ ಪಾಲಾಯಿತು.

ಪ್ರತಿ ಓವರ್‌ಗೆ ಸರಾಸರಿ 6.09 ರನ್ ನೀಡಿದ ಡಫಿ, ಟೆಸ್ಟ್ ಇತಿಹಾಸದಲ್ಲಿ 6ಕ್ಕಿಂತ ಹೆಚ್ಚಿನ ಎಕಾನಮಿಯಲ್ಲಿ 200ಕ್ಕೂ ಅಧಿಕ ರನ್ ಬಿಟ್ಟುಕೊಟ್ಟ ವಿಶ್ವದ ಎರಡನೇ ಬೌಲರ್ ಎನಿಸಿಕೊಂಡರು. ಅಲ್ಲದೆ, ಇನ್ನಿಂಗ್ಸ್‌ವೊಂದರಲ್ಲಿ ಅತಿ ಹೆಚ್ಚು ರನ್ ನೀಡಿದ ವೇಗದ ಬೌಲರ್‌ಗಳ ಸಾಲಿನಲ್ಲಿ ಆಸ್ಟ್ರೇಲಿಯಾದ ಬ್ರೆಟ್ ಲೀ ಅವರೊಂದಿಗೆ ಐದನೇ ಸ್ಥಾನ ಹಂಚಿಕೊಂಡರು.

ಈ ದುಬಾರಿ ಪ್ರದರ್ಶನದೊಂದಿಗೆ ಜೇಕಬ್ ಡಫಿ, ನ್ಯೂಜಿಲೆಂಡ್ ಟೆಸ್ಟ್ ಇತಿಹಾಸದಲ್ಲೇ ಇನ್ನಿಂಗ್ಸ್‌ವೊಂದರಲ್ಲಿ ಅತಿ ಹೆಚ್ಚು ರನ್ ನೀಡಿದ ಬೌಲರ್ ಎಂಬ ಬೇಡದ ದಾಖಲೆಯನ್ನೂ ತಮ್ಮದಾಗಿಸಿಕೊಂಡರು. ಈ ಹಿಂದೆ ಮಾಜಿ ಸ್ಪಿನ್ನರ್ ಡೇನಿಯಲ್ ವೆಟ್ಟೋರಿ 200 ರನ್ ಬಿಟ್ಟುಕೊಟ್ಟಿದ್ದೇ ಕಿವೀಸ್ ಪರ ಅತಿ ಹೆಚ್ಚು ರನ್ ನೀಡಿದ ದಾಖಲೆಯಾಗಿತ್ತು.

Must Read

Skip to toolbar