ಕಿಚಡಿ ಅಂದ್ರೆ ಮನೆಯಲ್ಲಿ ತಯಾರಿಸುವ ಒಂದು ಹೋಮ್ಲಿ ಅಡುಗೆ. ಬೆಳಿಗ್ಗೆ ತಿಂಡಿಯಾಗಿ ಕಿಚಡಿ ಸೇವಿಸಿದರೆ ದಿನವಿಡೀ ಶಕ್ತಿ ಹಾಗೂ ಉತ್ಸಾಹದಿಂದಿರಲು ಇದು ಸಹಾಯ ಮಾಡುತ್ತದೆ. ಸಾಮಾನ್ಯವಾಗಿ ಅಕ್ಕಿಯಿಂದ ಕಿಚಡಿ ಮಾಡಲಾಗುತ್ತದೆ. ಆದರೆ ನಾವು ಇವತ್ತು ಗೋಧಿ ಹಾಗೂ ತರಕಾರಿ ಕಿಚಡಿ ಮಾಡೋದು ಹೇಗೆ ಅಂತ ನೋಡೋಣ.
ಬೇಕಾಗುವ ಪದಾರ್ಥಗಳು:
ಗೋಧಿ – ಅರ್ಧ ಕಪ್ (6 ಗಂಟೆ ನೆನೆಸಿಡಿ)
ಹೆಸರು ಬೇಳೆ – ಅರ್ಧ ಕಪ್ (20 ನಿಮಿಷ ನೆನೆಸಿಡಿ)
ಎಣ್ಣೆ – 1 ಟೀಸ್ಪೂನ್
ಕಾಳು ಮೆಣಸು – 2-3
ಲವಂಗ – 2
ದಾಲ್ಚಿನ್ನಿ ಚಕ್ಕೆ – 1 ಇಂಚು
ಜೀರಿಗೆ – 1 ಟೀಸ್ಪೂನ್
ಹಿಂಗ್ – ಚಿಟಿಕೆ
ತೆಳ್ಳಗೆ ಕತ್ತರಿಸಿದ ಈರುಳ್ಳಿ – ¼ ಕಪ್
ಸಣ್ಣಗೆ ಹೆಚ್ಚಿದ ಮಿಶ್ರ ತರಕಾರಿಗಳು – 1 ಕಪ್
ಉಪ್ಪು – ರುಚಿಗೆ ತಕ್ಕಷ್ಟು
ಅರಿಶಿನ – ½ ಟೀಸ್ಪೂನ್
ಮೆಣಸಿನ ಪುಡಿ – 1½ ಟೀಸ್ಪೂನ್
ಕೊತ್ತಂಬರಿ, ಜೀರಿಗೆ ಪುಡಿ – 1½ ಟೀಸ್ಪೂನ್
ಹೆಚ್ಚಿದ ಕೊತ್ತಂಬರಿ ಸೊಪ್ಪು – 1 ಟೀಸ್ಪೂನ್
ಮಾಡುವ ವಿಧಾನ:
ಮೊದಲಿಗೆ ನೆನೆಸಿಟ್ಟಿದ್ದ ಗೋಧಿಯನ್ನು ಬ್ಲೆಂಡರ್‌ನಲ್ಲಿ ಅರ್ಧ ಕಪ್ ನೀರು ಹಾಕಿ ತರಿತರಿಯಾಗಿ ರುಬ್ಬಿ.
ಪ್ರೆಶರ್ ಕುಕ್ಕರ್‌ನಲ್ಲಿ ಎಣ್ಣೆ ಬಿಸಿ ಮಾಡಿ, ಕಾಳು ಮೆಣಸು, ಲವಂಗ, ದಾಲ್ಚಿನ್ನಿ ಚಕ್ಕೆ ಹಾಗೂ ಜೀರಿಗೆ ಹಾಕಿ ಹುರಿಯಿರಿ. ಜೀರಿಗೆ ಸಿಡಿದ ಬಳಿಕ ಹಿಂಗ್ ಹಾಕಿ ಸ್ವಲ್ಪ ಹುರಿದುಕೊಳ್ಳಿ.
ಈಗ ಈರುಳ್ಳಿ ಸೇರಿಸಿ 1–2 ನಿಮಿಷ ಬೇಯಿಸಿ. ನಂತರ ಹೆಚ್ಚಿದ ತರಕಾರಿಗಳನ್ನು ಹಾಕಿ 2–3 ನಿಮಿಷ ಫ್ರೈ ಮಾಡಿ. ಬಳಿಕ ರುಬ್ಬಿದ ಗೋಧಿ ಮತ್ತು ನೆನೆಸಿಟ್ಟ ಹೆಸರು ಬೇಳೆ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ.
ಉಪ್ಪು, ಅರಿಶಿನ, ಮೆಣಸಿನ ಪುಡಿ, ಕೊತ್ತಂಬರಿ–ಜೀರಿಗೆ ಪುಡಿ ಹಾಕಿ, 3 ಕಪ್ ನೀರು ಸೇರಿಸಿ ಕಲಸಿ.
ಕುಕ್ಕರ್ ಮುಚ್ಚಳ ಹಾಕಿ 3 ಸೀಟಿ ಬರುವವರೆಗೆ ಬೇಯಿಸಿ. ಮುಚ್ಚಳ ತೆರೆದು ಕೊತ್ತಂಬರಿ ಸೊಪ್ಪು ಹಾಕಿ ಅಲಂಕರಿಸಿ ಬಿಸಿ ಬಿಸಿ ಕಿಚಡಿ ಸವಿಯಿರಿ.
