ಹೊಸ ದಿಗಂತ ಡಿಜಿಟಲ್ ಡೆಸ್ಕ್:
ʼಕಾಂತಾರ ಚಾಪ್ಟರ್‌ 1′ ಸಿನಿಮಾ ಕನ್ನಡ ಚಿತ್ರರಂಗದಲ್ಲಿ ಇದುವರೆಗೆ ಯಾರೂ ಮಾಡಿರದ ಅಪರೂಪದ ಸಾಧನೆಯೊಂದನ್ನು ಮಾಡಿದ್ದೂ, ಕರ್ನಾಟಕವೊಂದರಲ್ಲೇ 268 ಕೋಟಿ ರೂ. ಗಳಿಸಿದೆ .
ಅಕ್ಟೋಬರ್‌ 2ರಂದು ತೆರೆ ಕಂಡ ಹೊಂಬಾಳೆ ಫಿಲ್ಮ್ಸ್‌ ,ರಿಷಬ್‌ ಶೆಟ್ಟಿ ಕಾಂಬಿನೇಷನ್‌ನಲ್ಲಿ ಮೂಡಿಬಂದ ಸಿನಿಮಾ, ಕರ್ನಾಟಕದಲ್ಲಿ 250 ಕೋಟಿ ರೂ. ಗಡಿ ದಾಟಿದ ಮೊದಲ ಕನ್ನಡ ಚಲನಚಿತ್ರ ಎನ್ನುವುದು ವಿಶೇಷ. ಸದ್ಯ ಈ ವಿಚಾರವನ್ನು ಸ್ವತಃ ಚಿತ್ರತಂಡವೇ ಹೆಮ್ಮೆಯಿಂದ ಹಂಚಿಕೊಂಡಿದೆ.
ʼಕಾಂತಾರ ಚಾಪ್ಟರ್‌ 1′ ತೆರೆಕಂಡು 29 ದಿನ ಕಳೆದಿದ್ದು, ಜಾಗತಿಕವಾಗಿ 867 ಕೋಟಿ ರೂ. ಬಾಚಿಕೊಂಡು ಮುನ್ನಡೆಯುತ್ತಿದೆ. ಆ ಮೂಲಕ 2025ರಲ್ಲಿ ಅತೀ ಹೆಚ್ಚು ಗಳಿಸಿದ ಭಾರತೀಯ ಸಿನಿಮಾ ಎನಿಸಿಕೊಂಡಿದೆ. ಇನ್ನು ಭಾರತದಲ್ಲಿ ಗಳಿಕೆ 600.72 ಕೋಟಿ ರೂ. ದಾಟಿದೆ.
ʼಕಾಂತಾರ ಚಾಪ್ಟರ್‌ 1′ ಇದುವರೆಗೆ ಭಾರತದಲ್ಲಿ 601.68 ಕೋಟಿ ರೂ. ಗಳಿಸಿದೆ. ಮೊದಲ ಸ್ಥಾನದಲ್ಲಿರುವ ʼಛಾವಾʼ ಭಾರತೀಯ ಬಾಕ್ಸ್‌ ಆಫೀಸ್‌ನಲ್ಲಿ ಒಟ್ಟು 615.39 ಕೋಟಿ ರೂ. ದೋಚಿಕೊಂಡಿದೆ. ಸದ್ಯ ದಾಖಲೆ ಮುರಿಯಲು ರಿಷಬ್‌ ಚಿತ್ರಕ್ಕೆ 13.71 ಕೋಟಿ ರೂ. ಹರಿದು ಬಂದರೆ ಸಾಕು. ಈ ಇತಿಹಾಸ ರಚನೆ ಕಷ್ಟವೇನಲ್ಲ ಎನ್ನುವುದು ಸಿನಿಪಂಡಿತರ ಭವಿಷ್ಯ.
ಸದ್ಯ ಭಾರತೀಯ ಚಿತ್ರರಂಗ ಮಹತ್ವದ ಮೈಲಿಗಲ್ಲು ಎನಿಸಿಕೊಂಡಿರುವ 1 ಸಾವಿರ ಕೋಟಿ ರೂ. ಕ್ಲಬ್‌ಗೆ ಚಿತ್ರ ಎಂಟ್ರಿ ಕೊಡುತ್ತಾ ಎನ್ನುವ ಕುತೂಹಲ ಮನೆ ಮಾಡಿದೆ. ಅಕ್ಟೋಬರ್‌ 31ರಂದು ಚಿತ್ರ ಒಟಿಟಿಯಲ್ಲಿ ರಿಲೀಸ್‌ ಆಗಿದೆ. ಅಮೆಜಾನ್‌ ಪ್ರೈಂನಲ್ಲಿ ಕನ್ನಡ, ತೆಲುಗು, ತಮಿಳು ಮತ್ತು ಮಲಯಾಳಂ ಸ್ಟ್ರೀಮಿಂಗ್‌ ಆಗುತ್ತಿದೆ. ಸದ್ಯ ಹಿಂದಿ ವರ್ಷನ್‌ ಒಟಿಟಿಗೆ ಬಂದಿಲ್ಲ. ಇನ್ನೂ ಥಿಯೇಟರ್‌ನಲ್ಲಿ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಜತೆಗೆ ಅಕ್ಟೋಬರ್‌ 31ರಂದು ಇಂಗ್ಲಿಷ್‌, ಸ್ಪಾನಿಷ್‌ ವರ್ಷನ್‌ ರಿಲೀಸ್‌ ಆಗಿದೆ. ಹೀಗಾಗಿ ಚಿತ್ರ 1 ಸಾವಿರ ಕೋಟಿ ರೂ. ಕ್ಲಬ್‌ ಸೇರುವ ಸಾಧ್ಯತೆ ಇದೆ.
